തൃശൂര്: പ്രായത്തിന്റെ അവശത മറന്ന് നടന്ന് നേടാനുള്ള തയ്യാറെടുപ്പില് സിസിലി ഗോവയിലേക്ക് വണ്ടി കയറി. 25, 26, 27 തിയ്യതികളില് ഗോവയില് നടക്കുന്ന വെറ്ററന്സ് മീറ്റില് പങ്കെടുക്കുന്നതിനാണ് തൃശൂര് പട്ടിക്കാട് സ്വദേശിനിയായ കെ.വി. സിസിലി യാത്രയായത്.
തന്റെ പ്രധാന ഇനമായ അഞ്ച് കിലോമീറ്റര് നടത്തത്തിലും അതോടൊപ്പം 100, 200 ഓട്ടത്തിലും 400 മീറ്റര് റിലേയിലും സിസിലി തന്റെ കഴിവ് തെളിയിക്കാന് ഇറങ്ങുന്നുണ്ട്. ഗോവയില് സ്വര്ണ്ണ നേട്ടം കൈവരിക്കാന് കഴിയുമെന്നാണ് സിസിലിയുടെ പ്രതീക്ഷ.
നേരത്തെ ഹരിയാന, ചണ്ഡിഗണ്ട്, ചെന്നൈ, കേരളത്തില് കോഴിക്കോട്, കണ്ണൂര്, എറണാകുളം, തൃശൂര് എന്നിവിടങ്ങളില് നടന്നിട്ടുള്ള വെറ്ററന്സ് മീറ്റുകളില് സ്വര്ണ്ണനേട്ടം ഉള്പ്പടെ നിരവധി മെഡലുകള് കരസ്ഥമാക്കിയിട്ടുള്ള ഇവര് ഇന്നലെയാണ് ഗോവയിലേക്ക് യാത്രയായത്.
സ്കൂള് ബസില് ക്ലീനറായും പത്രവിതരണത്തിനും ഇറങ്ങി ഇതില് നിന്ന് ലഭിക്കുന്ന തുച്ഛമായ വരുമാനം കൊണ്ടാണ് ജിവിതം തള്ളിനീക്കുന്നത്. ഇതിനിടയിലും കഴിഞ്ഞ കുറെ കാലങ്ങളായി നിരവധി മത്സരങ്ങളില് പങ്കെടുത്ത് മെഡലുകള് നേടി നാടിന് അഭിമാനമാവുകയാണ് ഇവര്.
കഴിഞ്ഞ മാസം കോഴിക്കോട് നടന്ന മിറ്റില് അഞ്ച് കിലോമീറ്റര് നടത്തത്തില് വെള്ളി മെഡല് നേടിയിരുന്നു. മത്സരങ്ങള് വരുമ്പോള് അതിന് മുന്നോടിയായി കോര്പ്പറേഷന് സ്റ്റേഡിയത്തിലാണ് പരിശിലനം. സ്കൂളിലെ ജോലിക്കും പത്ര ഓഫിസിലേക്കും എത്തും മുമ്പ് പരിശിലനം പൂര്ത്തിയാക്കും. കോര്പ്പറേഷന് സ്റ്റേഡിയത്തില് പത്ത് റൗണ്ട് നടക്കും. അത് കഴിഞ്ഞാല് നട്ടുച്ചക്ക് പൊള്ളുന്ന വെയിലിനെ മറികടന്ന് പത്ര വിതരണവും. ഇതാണ് തന്റെ വിജയത്തിന് പ്രധാനകാരണമെന്ന് സിസിലി പറയുന്നു. ഇപ്പോള് ഗോവയില് നടക്കുന്ന മത്സരത്തില് പങ്കെടുക്കുന്നതിന് ഏറെ കഷ്ടപ്പാട് സഹിച്ചാണ് പോകുന്നത്.
മത്സരത്തിനാവശ്യമായ സാധനങ്ങള് പോലും വാങ്ങാന് പണമില്ലാത്തതിനെ തുടര്ന്ന് പലരും സഹായിച്ചത് മൂലമാണ് മത്സരത്തിന് പോകാന് സാധിച്ചത്. ഇവര്ക്കൊപ്പം റിട്ട. എസ്ഐ. നടത്തറ സ്വദേശിനി എല്സിയും മത്സരിക്കാനായി പുറപ്പെട്ടിട്ടുണ്ട്.
