ന്യൂദല്ഹി: മനുഷ്യ ജീവനേക്കാള് വലുതായി മറ്റൊന്നുമില്ലെന്ന് പ്രധാനമന്ത്രി നരേന്ദ്ര മോദി. ആം ആദ്മി പാര്ട്ടി ഇന്നലെ നടത്തിയ റാലിയില് കര്ഷകന് ആത്മഹത്യ ചെയ്ത സംഭവത്തെക്കുറിച്ച് ലോക്സഭയില് സംസാരിക്കുകയായിരുന്നു ആദ്ദേഹം.
വര്ഷങ്ങളായി കര്ഷക ആത്മഹത്യ എല്ലാ ഗവണ്മെന്റിന്റേയും വലിയ പ്രശ്നങ്ങളില് ഒന്നാണ്. കഴിഞ്ഞ ദിവസത്തെ സംഭവത്തില് തനിക്ക് വേദനയുണ്ട്.
പ്രശ്നം പഴയതും ആഴമേറിയതുമാണ്. ഇതിനൊരു പരിഹാരം കാണണം. ഇതിലേക്കാവശ്യമായ എല്ലാ നിര്ദേശങ്ങളും സര്ക്കാര് സ്വീകരിക്കുമെന്നും മോദി പറഞ്ഞു.
കര്ഷകരെ നിസ്സഹായരാക്കില്ല. അവരുടെ ഭാവിയെക്കുറിച്ച് സര്ക്കാര് ആശങ്കാകുലരാണ് . ഇവര്ക്കു വേണ്ടി എല്ലാവരും ഒത്തുചേര്ന്ന് പ്രവര്ത്തിക്കണമെന്നും മോദി പറഞ്ഞു.
ഇന്നലെയുണ്ടായ സംഭവം രാജ്യമൊട്ടാകെ വിഷമുണ്ടാക്കുന്നതാണ്. എല്ലാവരും ഇതില് വേദന രേഖപ്പെടുത്തി. ഇതില് താനും അതിയായി ദുഃഖിക്കുന്നു മോദി പറഞ്ഞു.
കര്ഷകന് ആത്മഹത്യ ചെയ്ത സംഭവം രാജ്യത്തിനുതന്നെ നാണക്കേടാണെന്ന് കേന്ദ്ര ആഭ്യന്തരമന്ത്രി രാജ്നാഥ് സിങ് ലോക്സഭയില് അറിയിച്ചു. ആത്മഹത്യയ്ക്കൊരുങ്ങിയ കര്ഷകനെ രക്ഷിക്കാന് ദല്ഹി പൊലീസ് കഴിയുന്നതെല്ലാം ചെയ്തുവെന്നും അദ്ദേഹം പറഞ്ഞു.
സംഭവത്തെ കുറിച്ച് പോലീസ് അന്വേഷണം വേഗത്തില് പൂര്ത്തിയാക്കുമെന്നും രാജ്നാഥ് സിങ് ലോക്സഭയില് അറിയിച്ചു.
തന്റേയും പ്രധാനമന്ത്രിയുടേയും രാജ്യത്തിന്റേയും പേരില് ഗജേന്ദ്ര സിംഗിന്റെ കുടുംബത്തിന് ആഭ്യന്തരമന്ത്രി രാജ്നാഥ് സിംഗ് സഭയില് അനുശോചനം രേഖപ്പെടുത്തി.
