ന്യൂദല്ഹി: പൊതുപരിപാടികള്ക്കുശേഷം സംഘാടകര് തന്നെ പൊതു സ്ഥലങ്ങള് വൃത്തിയാക്കിയില്ലെങ്കില് നഗരസഭകള്വഴി ഒരുലക്ഷം രൂപവരെ ‘പരോക്ഷ പിഴ’ ഈടാക്കുന്നതിനുള്ള സംവിധാനം നിലവില് വന്നു. കേന്ദ്ര സര്ക്കാരിന്റെ സ്വച്ഛ് ഭാരത് യജ്ഞത്തിന്റെ ഭാഗമായാണ് ഈ സംവിധാനം നടപ്പാക്കാന് നഗര വികസനവകുപ്പു തീരുമാനിച്ചത്. ഇതിനുള്ള നടപടിക്രമം മന്ത്രാലയം പ്രഖ്യാപിച്ചു.
പൊതു സ്ഥലങ്ങള് യോഗങ്ങള്ക്കും പരിപാടികള്ക്കും ഏറ്റെടുക്കുമ്പോള് 10,000 മുതല് ഒരുലക്ഷം രൂപവരെ മുന്കൂര് കൊടുക്കാന് വ്യവസ്ഥയുണ്ടായിരിക്കും. പരിപാടിക്കുശേഷം സംഘാടകര് സ്ഥലം ശുചിയാക്കിയില്ലെങ്കില് ഈ പണം ഉപയോഗിച്ച് ശുചീകരണങ്ങള് നടത്തണം. ഇത് തത്വത്തില് പിഴയീടാക്കുന്നതിനു തുല്യമാണ്.
വകുപ്പു മന്ത്രി എം. വെങ്കയ്യ നായിഡു അംഗീകരിച്ചിറക്കിയ ഈ പുതിയ നടപടിക്രമം പ്രകാരം, സംഘാടകര് പൊതുസ്ഥലങ്ങള് പരിപാടികള്ക്കു വിനിയോഗിക്കണമെങ്കില് ശുചീകരണം സംബന്ധിച്ച സമ്മതപത്രം നല്കണം. പുറമേ, 500 പേര് പങ്കെടുക്കുന്ന പരിപാടികള്ക്കുള്ള സ്ഥലത്തിന് 10,000 രൂപ മുനിസിപ്പാലിറ്റിയില് അടയ്ക്കണം. 50,000 വരെ പേര് പങ്കെടുക്കുന്ന പരിപാടിക്ക് സ്ഥലത്തിന് അര ലക്ഷം രൂപ മുന്കൂര് അടച്ചാലേ നഗരസഭകള് അനുവാദം നല്കൂ. അരലക്ഷത്തിലേറെ പേര് പങ്കെടുക്കുന്ന പരിപാടികള്ക്ക് ഒരുലക്ഷം രൂപ ഈടുവാങ്ങി വേണം അനുവദിക്കാന്. പരിപാടികള് നടത്തിയ ശേഷം സ്ഥലം മലിനമാക്കുന്നതും പ്ലാസ്റ്റിക് കുപ്പികളും ഭക്ഷണാവശിഷ്ടങ്ങളും മറ്റും നിക്ഷേപിക്കുന്നതും ശ്രദ്ധയില് പെട്ടതിനെ തുടര്ന്നാണ് ഈ തീരുമാനം.
നഗരസഭകള് സ്ഥലം അനുവദിക്കുമ്പോള് ഉപയോഗശേഷം സ്വയം, അല്ലെങ്കില് നഗരസഭ നിര്ദ്ദേശിക്കുന്ന ഏജന്സികള് വഴി സ്ഥലം വൃത്തിയാക്കിക്കൊള്ളാമെന്നു വ്യവസ്ഥ വെക്കണം. അവിടവിടെ മാലിന്യ ശേഖരണ സംവിധാനം ഉണ്ടാക്കേണ്ടതും സംഘാടകരുടെ ചുമതലയാണ്. പരിസര ശുചീകരണത്തിന് ആവശ്യമായ ജീവനക്കാരെ നിയോഗിക്കണം. നഗരസഭ നിര്ദ്ദേശിക്കുന്ന മാലിന്യ നിക്ഷേപ സ്ഥലത്ത് മാലിന്യം എത്തിക്കേണ്ടതും സംഘാടകരാണ്. പരിപാടികള് തീര്ന്ന് ആറു മണിക്കൂറിനുള്ളില് സ്ഥലം വൃത്തിയാക്കി തിരികെ ഏല്പ്പിക്കണം. ശുചിത്വം ഉറപ്പാക്കിയാല് ഈടുകൊടുത്ത പണം ഡിമാന്ഡ് ഡ്രാഫ്റ്റായി മൂന്നു ദിവസത്തിനകം സംഘാടകര്ക്കു തിരികെ കൊടുക്കാം.
എന്നാല്, പൊതുപരിപാടികള്ക്കായി നീക്കിവെച്ചിരിക്കുന്ന സ്ഥലങ്ങളില് അനുമതിയെടുക്കേണ്ടത് പോലീസില് നിന്നാണ്. മേല്പറഞ്ഞ സമ്മതപത്രവും ഈടുതുകയും നല്കേണ്ടത് അതത് പോലീസ് സ്റ്റേഷനിലാണ്.
ഇതുകൂടാതെ താഴെപ്പറയുന്ന വ്യവസ്ഥകളും പൊതുപരിപാടികള്ക്കു ബാധകമാണ്. ഹോട്ടല്, റസ്റ്ററന്റ,് വിവാഹ ഓഡിറ്റോറിയങ്ങള്, ഫാം ഹൗസ് എന്നിവിടങ്ങളില് പരിപാടികള് നടത്തുമ്പോള് പൊതു ശൗചാലയങ്ങള് ഉണ്ടാവണം. 75 പേര്ക്ക് ഒരു ശൗചാലയം എന്നതാണ് കണക്ക്. പാര്ക്ക്, ഉദ്യാനം എന്നിവിടങ്ങളില് പരിപാടികള് നടത്തുമ്പോള് കാല് ലക്ഷം പേരുവരെ പങ്കെടുക്കുന്നുവെങ്കില് 500 പേര്ക്ക് ഒരു സീറ്റെന്ന നിലയില് സംവിധാനം വേണം.
കാല് ലക്ഷത്തിലേറെ പേരുണ്ടെങ്കില് 1000 പേര്ക്ക് ഒരു സീറ്റു വീതം വേണം.
ഹോട്ടലുകള്ക്കും റസ്റ്ററന്റുകള്ക്കും പൊതുപരിപാടികള് നടത്തുമ്പോള് ആവശ്യമായ ചവറ്റുകുട്ടകള് നിര്ബന്ധമാണ്. കാല്ലക്ഷം പേര് പങ്കെടുക്കുന്നിടത്ത് 150 പേര്ക്ക് നാലു ചവറ്റുകുട്ടയെന്ന തോതില് സംവിധാനം വേണം, എന്നിങ്ങനെയാണ് വ്യവസ്ഥകള്.
