എരുമേലി: ജനകീയാസൂത്രണ പദ്ധതിപ്രകാരം ലക്ഷങ്ങള് ചെലവഴിച്ച് കെട്ടിടനിര്മ്മാണം പൂര്ത്തിയാക്കിയ ചെമ്പകപ്പാറയിലെ വൃദ്ധസദനം നിരാലംബര്ക്കായി തുറന്നുകൊടുക്കണമെന്ന് ബിജെപി നേതാക്കള് പത്രസമ്മേളനത്തില് ആവശ്യപ്പെട്ടു. 1998ല് എരുമേലി ആയുര്വേദാശുപത്രിക്കായി ഏറ്റെടുത്ത ഈ സ്ഥലത്ത് വെള്ളമില്ലെന്ന കാരണത്താല് ആശുപത്രി നിര്മ്മാണം അധികൃതര് അട്ടിമറിക്കുകയായിരുന്നു. എന്നാല് 2002-03ല് കേരള വികസന പദ്ധതിപ്രകാരം വൃദ്ധസദനത്തിന് തുടക്കം കുറിക്കുകയും കെട്ടിടം പണി പൂര്ത്തീകരിക്കുകയുമായിരുന്നു.
എന്നാല് പണി പൂര്ത്തിയാക്കി വര്ഷം ആറു കഴിഞ്ഞിട്ടും വൃദ്ധസദനം തുറന്നുകൊടുക്കാന് കഴിയാത്തത് പഞ്ചായത്തിന്റെ കെടുകാര്യസ്ഥതയാണെന്നും നേതാക്കള് പറഞ്ഞു.
ആയുര്വ്വേദാശുപത്രി എന്ന പദ്ധതിതന്നെ അട്ടിമറിച്ച ലോബി വൃദ്ധസദനത്തിന്റെ നടപടികളും അട്ടിമറിക്കുകയായിരുന്നുവെന്നും നേതാക്കള് പറഞ്ഞു. കെട്ടിടം പണി പൂര്ത്തീകരിച്ച് വയറിങിനും പ്ലംബിങിനുമായി വര്ഷങ്ങളുടെ കാത്തിരിപ്പാണ് പഞ്ചായത്ത് നടത്തിയത്. കാടുകയറി ഇഴജന്തുക്കളും വിഹരിക്കുന്ന കെട്ടിടം സാമൂഹ്യ വിരുദ്ധരുടെ താവളമായി മാറുകയാണെന്നും നേതാക്കള് പറഞ്ഞു.
വൃദ്ധസദനം തുറന്നുകൊടുക്കാത്തതിലും അടിയന്തിരമായി തുറക്കണമെന്നാവശ്യപ്പെട്ടും ബിജെപി മണിപ്പുഴ ബൂത്ത് കമ്മറ്റിയുടെ നേതൃത്വത്തില് ഏപ്രില് 1ന് മണിപ്പുഴ ജങ്ഷനില് നിന്നും പത്തിന് വൃദ്ധസദനത്തിലേക്ക് മാര്ച്ചും ധര്ണയും നടത്തും.
പത്രസമ്മേളനത്തില് ബിജെപി പൂഞ്ഞാര് നിയോജകമണ്ഡലം പ്രസിഡന്റ് വി.സി. അജികുമാര്, കെ.ആര്. സോജി, മാമച്ചന്, സാബുമാഷ് എന്നിവര് പങ്കെടുത്തു.
