ചേര്ത്തല: വേര്പിരിഞ്ഞത് കബഡി എന്ന കായികവിനോദത്തെ ചേര്ത്തലക്കാര്ക്ക് പരിചയപ്പെടുത്തിയ താരം. കഴിഞ്ഞ ദിവസം കുഴഞ്ഞുവീണ് മരിച്ച ചേര്ത്തല നഗരസഭ 11-ാം വാര്ഡ് അയ്യനാട്ട് നികര്ത്തില് എം.ജി. റോയി (65)യാണ് കബഡിയെ ചേര്ത്തലയില് ജനകീയമാക്കിയത്. കേരളാ കബഡി ടീമില് അംഗമായിരുന്ന റോയി ചേര്ത്തലയിലെ തന്റെ സുഹൃത്തുക്കള്ക്ക് കബഡിയുടെ പാഠങ്ങള് പകര്ന്നു നല്കി. ആലപ്പുഴ ജില്ലയിലെ മികച്ച കബഡി ക്ലബുകളില് ഒന്നായ സെവന്ഹീറോസിന്റെ ഉദയവും ഇവിടെ നിന്നായിരുന്നു.
സെവന് ഹീറോസ് എന്ന ക്ലബിലൂടെ കബഡി എന്ന കായികാഭ്യാസം ചേര്ത്തലക്കാരുടെ ദിനചര്യയാക്കി മാറ്റുവാന് റോയിയുടെ നേതൃത്വലുള്ള ടീമിന് കഴിഞ്ഞു. ക്ലബ്ബിലൂടെ നിരവധിപേര് കേന്ദ്ര സംസ്ഥാന സര്ക്കാര് ജോലികളില് പ്രവേശിച്ചു. അപ്പോഴും പരിശീലകനായും, ദേശീയ റഫറിയായുമൊക്കെ കബഡിക്കുവേണ്ടി ജീവിതം ഉഴിഞ്ഞുവയ്ക്കുകയായിരുന്നു റോയി. 1977-80 കാലഘട്ടങ്ങളില് ദേശീയതലത്തില് കേരളത്തെ പ്രതിനിധീകരിച്ച് നിരവധി മത്സരങ്ങളില് റോയി പങ്കെടുത്തിട്ടുണ്ട്.
ഡിഫന്ഡര്, കോര്ണര് പൊസിഷനില് എതിരാളികളെ പ്രതിരോധത്തിലാക്കുവാനുള്ള റോയിയുടെ കഴിവ് മത്സരങ്ങളില് ശ്രദ്ധിക്കപ്പെട്ടു. കേരളാ യൂണിവേഴ്സിറ്റിയിലെ കബഡി ചാമ്പ്യന്മാരായിരുന്ന ചേര്ത്തല എസ്എന് കോളേജിന്റെ പരിശീലകനായും റോയി സേവനമനുഷ്ഠിച്ചിട്ടുണ്ട്. ശാരീരികാസ്വാസ്ഥ്യങ്ങള് മൂലം കുറേ നാളുകളായി കായികരംഗത്തു നിന്നും വിട്ടു നില്ക്കുകയായിരുന്നു ഇദ്ദേഹം. കഴിഞ്ഞ സപ്തംബറില് ചേര്ത്തലയില് നടന്ന സംസ്ഥാന സബ്ജൂനിയര് കബഡി മത്സരങ്ങളില് ആദ്യാവസാനം റോയിയുടെ സാന്നിദ്ധ്യം ഉണ്ടായിരുന്നു.
