ബാഴ്സലോണ: സ്പാനിഷ് ലീഗിലെ സൂപ്പര് പോരാട്ടത്തില് വിജയം ബാഴ്സലോണക്കൊപ്പം. ഇന്നലെ പുലര്ച്ചെ നടന്ന എല് ക്ലാസ്സിക്കോയില് റയല് മാഡ്രിഡിനെ ഒന്നിനെതിരെ രണ്ട് ഗോളുകള്ക്കാണ് ബാഴ്സലോണ കീഴടക്കിയത്. നൗകാമ്പില് നടന്ന കളിയില് ജെര്മി മാത്യു, ലൂയി സുവാരസ് എന്നിവര് ബാഴ്സക്കായി ഗോള് നേടിയപ്പോള് റയലിന്റെ ആശ്വാസഗോള് സൂപ്പര്താരം ക്രിസ്റ്റിയാനോ റൊണാള്ഡോ സ്വന്തമാക്കി. വിജയത്തോടെ ഒന്നാം സ്ഥാനത്തുള്ള ബാഴ്സലോണക്ക് നാല് പോയിന്റിന്റെ ലീഡായി. 28 കളികളില് നിന്ന് ബാഴ്സക്ക് 68ഉം റയലിന് 64ഉം പോയിന്റാണുള്ളത്.
ഏകദേശം ഒരുലക്ഷത്തോളം കാണികളെ സാക്ഷിയാക്കി നടന്ന പോരാട്ടം ഏറെ ആവേശകരമായിരുന്നു. പന്തടക്കത്തിലും ഷോട്ടുകള് ഉതിര്ക്കുന്നതിലും ഏറെ തുല്യത ഇരുടീമുകളും പുലര്ത്തി. ബാഴ്സലോണ അഞ്ച് ഷോട്ടുകള് ലക്ഷ്യത്തിലേക്ക് പറത്തിയപ്പോള് റയല് നാലെണ്ണവും പായിച്ചു.
കളിയുടെ തുടക്കത്തില് കരിം ബെന്സേമ അവസരം പാഴാക്കി. അധികം കഴിയും മുന്നേ ക്രിസ്റ്റിയാനോയുടെ തകര്പ്പന് ഷോട്ട് ക്രോസ്ബാറിലിടിച്ച് മടങ്ങുകയും ചെയ്തു. തൊട്ടുപിന്നാലെ ഇസ്കോയുടെ ഒരു ഷോട്ട് ബാഴ്സ പ്രതിരോധനിര താരം തട്ടിത്തെറിപ്പിച്ചപ്പോള് സെര്ജിയോ റാമോസിന്റെ ഒരു ഹെഡ്ഡറും ലക്ഷ്യംതെറ്റിപറന്നു. കളിയുടെ ഗതിക്കെതിരായ 19-ാം മിനിറ്റില് ബാഴ്സ ആദ്യഗോള് നേടി. ലയണല് മെസ്സി നല്കിയ അളന്നുമുറിച്ച ക്രോസ് ജെര്മി മാത്യു ഒരു ബുള്ളറ്റ് ഹെഡ്ഡറിലൂടെ റയല് വലയിലെത്തിച്ചപ്പോള് ഗോളി ഇകര് കസിയസ് കാഴ്ചക്കാരനായി.
ലീഡ് നേടിയതോടെ ബാഴ്സ കളംപിടിച്ചടക്കി. നെയ്മറും മെസ്സിയും സുവാരസും എണ്ണയിട്ട യന്ത്രം കണക്കെ ആക്രമണം അഴിച്ചുവിട്ടപ്പോള് റയല് പ്രതിരോധം പലപ്പോഴും പൊളിഞ്ഞു. എന്നാല് 31-ാം മിനിറ്റില് റയല് സമനില പിടിച്ചു. ഒരു പ്രത്യാക്രമണത്തിനൊടുവില് കരിം ബെന്സേമ നീട്ടിനല്കിയ പന്ത് പിടിച്ചെടുത്ത് ക്രിസ്റ്റിയാനോ റൊണാള്ഡോ ബോക്സിന്റെ മധ്യത്തില് നിന്ന് വലംകാലുകൊണ്ട് പായിച്ച ഷോട്ടാണ് ബാഴ്സ വലയില് കയറിയത്. തുടര്ന്നും ഇരുടീമുകളും നിരവധി തവണ അവസരങ്ങള് സൃഷ്ടിച്ചെങ്കിലും ആദ്യപകുതിയില് കൂടുതല് ഗോളുകളൊന്നും പിറന്നില്ല.
രണ്ടാം പകുതിയുടെ തുടക്കത്തിലും ബെന്സേമയുടെ ഒരു ഷോട്ട് ബാഴ്സ ഗോളി രക്ഷപ്പെടുത്തി. അധികം കഴിയും മുന്നേ ബാഴ്സ ലീഡ് നേടുകയും ചെയ്തു. ലൂയി സുവാരസിന്റെ സുന്ദരമായ ഗോളാണ് ബാഴ്സക്ക് ലീഡ് നേടിക്കൊടുത്തത്. പിന്നീട് സമനിലക്കായി റയല് മാഡ്രിഡ് താരങ്ങള് കിണഞ്ഞു പരിശ്രമിച്ചെങ്കിലും ബാഴ്സ പ്രതിരോധം കോട്ടകെട്ടി കാത്തതോടെ അവയെല്ലാം വിഫലമായി.
മറ്റ് കളികളില് സെവിയ 2-0ന് വിയ്യാറയലിനെയും റയല് സോസിഡാണ് 3-1ന് കോര്ഡോബയെയും പരാജയപ്പെടുത്തിയപ്പോള് ഡിപോര്ട്ടീവോ-എസ്പാനിയോള് പോരാട്ടം ഗോള്രഹിത സമനിലയില് കലാശിച്ചു.
