ഉള്ബോധപ്രകാശമാണ് ആത്മപ്രകാശം. കറന്റ് കമ്പിയില്ക്കൂടി ബള്ബിനുള്ളില് കടന്നാല് വെണ്മയും പ്രകാശവും ലഭിക്കും. എന്നാല് കറന്റു കടന്നുവരുന്ന കമ്പികള് തമ്മില് കൂട്ടിമുട്ടിയാല് തീയുണ്ടാകും. ദൈവശക്തി ചിലരെ വഷളാക്കുന്നുണ്ട്. ശക്തിമൂലം ചിലര്ക്ക് ഒരു ആധിപത്യസ്വഭാവം തോന്നിക്കും. അങ്ങനെ അമ്പോറ്റി ചമഞ്ഞവരെ ആര്ക്കും വേണ്ടാതാകും. അങ്ങനെയുള്ളവര് ഗുരുവിന്റെ ഉച്ചിയില് ചവിട്ടി മറിയുകയാണ്.
തടി പിടിക്കുമ്പോഴും എഴുന്നള്ളിക്കുമ്പോഴും മാത്രമേ ആനയ്ക്കു ശക്തിയുള്ളൂഎന്നു കരുതുന്നത് ഭോഷതമാണ്. വെറുതെ നില്ക്കുന്ന ആനയുടെ അടുത്ത് ശക്തി പരീക്ഷിക്കാന് ചെന്നാല് കുടലു പുറത്തു ചാടും. ഒരുനാളും ഗുരുവിനെ ഉരച്ചു നോക്കരുത്. ശബ്ദം പാലിക്കുക. അതനുഗ്രഹമായി ഭവിക്കും. പത്തുപേരു പാദം തൊട്ടു തൊഴുതാല് ഭഗവാനാകയില്ല. അഹങ്കരിച്ച് അധഃപതിക്കരുത്.
തിരിച്ചെഴുന്നള്ളി രക്ഷിക്കുന്നു എന്ന സ്മരണ വിടരുത്. ഭഗവാന് തന്റെ കരുണയും കഴിവും പ്രയോഗിച്ചപ്പോള് തന്റെ ശിഷ്യരെ അനേകര് പലവിധത്തില് ആദരിക്കും. അഹങ്കരിക്കരുതേ! അഗ്നിയാണെന്നോര്ക്കണം. അഹങ്കരിച്ചാല് കണ്ണിലുണ്ണിയായാലും ശരി തെറിച്ചുപോകും തീര്ച്ചയാണ്. അഹന്തയും കൃത്രിമ ബുദ്ധിയും കാട്ടരുത്.
