കോട്ടയം: പള്സ് പോളിയോ ഇമ്മ്യൂണൈസേഷന്റെ രണ്ടാം ഘട്ട മരുന്നു വിതരണം നാളെ നടക്കുമെന്ന് എ.ഡി.എം. ടി.വി. സുഭാഷ് അറിയിച്ചു. ജനുവരി 18ന് നടന്ന ഒന്നാം ഘട്ടത്തില് മരുന്ന് സ്വീകരിച്ച കുട്ടികള് ഉള്പ്പെടെ 5 വയസ്സിനു താഴെയുള്ള എല്ലാ കുട്ടികള്ക്കും മരുന്ന് നല്കാന് രക്ഷാകര്ത്താക്കള് ശ്രദ്ധിക്കണമെന്ന് എ.ഡി.എം അഭ്യര്ത്ഥിച്ചു.
രണ്ടാം ഘട്ട പള്സ് പോളിയോ നിര്മ്മാര്ജ്ജന യജ്ഞത്തിന് എല്ലാ ക്രമീകരണങ്ങളും പൂര്ത്തിയായതായി ജില്ലാ മെഡിക്കല് ആഫീസര് ഡോ. എന്. എം. ഐഷാഭായി അറിയിച്ചു. ജില്ലയില് അഞ്ചുവയസ്സിനു താഴെയുളള 1,24,829 കുട്ടികള്ക്കാണ് ഈ ദിവസങ്ങളില് തുള്ളി മരുന്ന് നല്കുക. ഇതിനായി 1529 ബൂത്തുകള് സജ്ജീകരിച്ചിട്ടുണ്ട്. തുള്ളിമരുന്ന് നല്കാന് പരിശീലനം സിദ്ധിച്ച 3086 സന്നദ്ധപ്രവര്ത്തകരെയും നിയോഗിച്ചിട്ടുണ്ട്. ആരോഗ്യകേന്ദ്രങ്ങള്, അംഗന്വാടികള്, സ്വകാര്യ ആശുപത്രികള്, സന്നദ്ധ സംഘടനകളുടെ കെട്ടിടങ്ങള് എന്നിവയില് രാവിലെ 8 മണി മുതല് വൈകിട്ട് 5 മണിവരെ സാധാരണ ബൂത്തുകള് പ്രവര്ത്തിക്കും.
സാധാരണ ബൂത്തുകള്ക്കു പുറമേ 40 ട്രാന്സിറ്റ് ബൂത്തുകള്, 20 മൊബൈല് ബൂത്തുകള് എന്നിവ ക്രമീകരിക്കും. റെയില്വെ സ്റ്റേഷന്, ബസ്സ്റ്റാന്റ്, ബോട്ടുജെട്ടി എന്നിവിടങ്ങളില് ട്രാന്സിറ്റ് ബൂത്തുകള് പ്രവര്ത്തിക്കും. അന്യസംസ്ഥാന തൊഴിലാളികളുടെ താമസസ്ഥലങ്ങള്, ഉത്സവസ്ഥലങ്ങള്, കല്യാണമണ്ഡപങ്ങള് എന്നിവയുള്പ്പെടെ ജനങ്ങള് എത്തുന്ന സ്ഥലങ്ങളില് എത്തി മരുന്ന് നല്കുന്നതിനാണ് മൊബൈല് ബൂത്തുകള് ക്രമീകരിച്ചിരിക്കുന്നത്.
