കൊച്ചി: ക്രൂഡ് ഓയിലിന്റെ വിലക്കുറവിന് ആനുപാതികമായി പെട്രോളിയം ഉല്പ്പന്നങ്ങളുടെ വില കുറയ്ക്കാതെ അധിക നികുതി അടിച്ചേല്പ്പിച്ച് ലാഭമുണ്ടാക്കുന്ന കേന്ദ്ര സംസ്ഥാന സര്ക്കാരുകളുടെ നടപടി ജനദ്രോഹപരമാണെന്ന് ഓള് കേരള ഫെഡറേഷന് ഓഫ് പെട്രോളിയം ട്രേഡേഴ്സ്. കൊച്ചിയിലെ ഒരു ലിറ്റര് പെട്രോളിന്റെ വില 60.91 രൂപയും ഡീസലിന് 50.34 രൂപയുമാണ്. ഇതില് ഒരു ലിറ്റര് പെട്രോളിന്മേല് 24 രൂപയും ഡീസലില് 11 രൂപയും കേന്ദ്ര സര്ക്കാര് എക്സൈസ് കസ്റ്റംസ് ഡ്യൂട്ടിയായി ഈടാക്കുകയാണ്.
സംസ്ഥാന സര്ക്കാരിന് പെട്രോളിന്മേല് 11.45 രൂപയും ഡീസലിന് ഒമ്പത് രൂപയും വില്പന നികുതിയായി ലഭിക്കുന്നുണ്ട്. കമ്പനികള് പെട്രോളിന്മേല് 3.50 രൂപയും ഡിസലിന്മേല് 2.50 രൂപയും ലാഭമുണ്ടാക്കുന്നുണ്ട്. ഈ സാഹചര്യത്തിലാണ് വീണ്ടും വില വര്ധിപ്പിച്ച് ജനങ്ങളുടെ മേല് അധികഭാരം ഏല്പ്പിക്കാന് സര്ക്കാരുകളും കമ്പനികളും ശ്രമിക്കുന്നതെന്നും പറഞ്ഞു. ഇതോടൊപ്പം ഡീലര്മാരുടെ പെട്രോള് കമ്മീഷന് ലിറ്ററിന് 2.04 രൂപയായിരുന്നത് 1.97 ആയി കുറച്ചു. ഇതിന്റെ ഫലമായി ലക്ഷക്കണക്കിന് രൂപ ഡീലര്മാര്ക്ക് നഷ്ടപ്പെട്ടുവെന്നും ചൂണ്ടിക്കാട്ടി.
പെട്രോളിന്റെ വിലകൂടുമ്പോള് കമ്പനിക സ്റ്റോക്ക് തരാതിരിക്കുകയും വില കുറയുമ്പോള് സ്റ്റോക്ക് അടിച്ചേല്പ്പിക്കുകയും ചെയുന്നു. നിലവിലുള്ള പമ്പുകളുടെ സെയില്സ് വോളിയം പരിശോധിക്കാതെയും നിശ്ചിത ദൂരം പാലിക്കാതെയും പുതിയ പമ്പുകള് ആരംഭിക്കാന് കമ്പനികള് മത്സരിക്കുകയാണ്. നിലവിലുള്ള കമ്പനികളുടെ നവീകരണ പ്രവര്ത്തനങ്ങള് നടത്താന് പണമില്ലാത്ത കമ്പനികള് പുതിയ പമ്പുകള് ആരംഭിക്കുന്നതിന്റെ പിന്നിലെ ലക്ഷ്യങ്ങള് വ്യക്തമാക്കണമെന്നും അവര് പറഞ്ഞു.
കേന്ദ്രസര്ക്കാരിന്റെ പട്ടികജാതി ഫണ്ടുപയോഗിച്ച് പട്ടികജാതിക്കാര്ക്കായി ആരംഭിച്ച പമ്പുകള് കമ്പനികളുടെ അറിവോടെ ബിനാമികള് കൈയടക്കി വച്ചിരിക്കുന്നത് അവസാനിപ്പിക്കണം, പുതിയ പമ്പുകള് ആരംഭിക്കാന് പുറപ്പെടുവിച്ച നോട്ടിഫിക്കേഷന് റദ്ദാക്കണം, നിലവില് നഷ്ടത്തിലോടുന്ന പമ്പുകളെ പുരോഗതിയിലെത്തിക്കാനുള്ള പദ്ധതി ആസൂത്രണം ചെയുക, നഷ്ടത്തിലോടുന്ന പമ്പുകളുടെ ഉടമകള് ആവശ്യപ്പെട്ടാല് ഡീലര്ഷിപ്പ് എഗ്രിമെന്റ് റദ്ദാക്കി ഭൂമി വിട്ടുകൊടുക്കുക, പമ്പുകളുടെ ലൈസന്സ് പുതുക്കുന്നതിന്റെ ഉത്തരവാദിത്വം കമ്പനികള് ഏറ്റെടുക്കണമെന്നും ആവശ്യപ്പെട്ടു. വാര്ത്താസമ്മേളനത്തില് ഓള് കേരള ഫെഡറേഷന് ഓഫ് പെട്രോളിയം ട്രേഡേഴ്സ് പ്രസിഡന്റ് തോമസ് വൈദ്യന്, സെക്രട്ടറി എം. രാധാകൃഷ്ണന് എന്നിവര് പങ്കെടുത്തു.
