പള്ളുരുത്തി: പെരുമ്പടപ്പ് പ്രദേശത്തെ കുടിവെള്ളക്ഷാമം പരിഹരിക്കണമെന്നാവശ്യപ്പെട്ട് നൂറുകണക്കിന് വീട്ടമ്മമാര് കരുവേലിപ്പടി ജല അതോറിറ്റി ഓഫീസിന് മുന്നില് പ്രതിഷേധസമരം സംഘടിപ്പിച്ചു. ജല അതോറിറ്റി ഓഫീസ് ഉപരോധിച്ച വീട്ടമ്മമാര് ഓഫീസിന് മുന്നില് കപ്പപുഴുങ്ങി പ്രതിഷേധിച്ചു.
ബിജെപി സംസ്ഥാന വൈസ് പ്രസിഡന്റ് ശ്യാമള എസ്. പ്രഭു ഉദ്ഘാടനം ചെയ്തു. കുപ്പക്കാട്ടുപ്രദേശം, മൂന്തുംപുളി, കോണം പ്രദേശങ്ങളില് മാസങ്ങളായി കുടിവെള്ളം ലഭിക്കുന്നില്ലെന്ന് സമരക്കാര് ആരോപിച്ചു. ബിജെപി പെരുമ്പടപ്പ് സൗത്ത് യൂണിറ്റാണ് സമരം സംഘടിപ്പിച്ചത്. ബിജെപി തൃപ്പൂണിത്തുറ മണ്ഡലം മീഡിയ കണ്വീനര് കെ.കെ. റോഷന്കുമാര് ആമുഖപ്രസംഗം നടത്തി.
യൂണിറ്റ് പ്രസിഡന്റ് വി.ബി. ഷിബു അധ്യക്ഷത വഹിച്ചു. ജോയി കുപ്പക്കാട്ട്, കെ.സി. ഷാബു, സി.കെ. അരുണ്, ഇ.കെ. കുഞ്ഞുമോന്, ആനി ജോയി, ജയ നൗഷാദ്, ഷീന തങ്കച്ചന്, ഷീമാ ശിവന്, സിന്ധു ദിലീപ് എന്നിവര് നേതൃത്വം നല്കി. എറണാകുളം വാട്ടര് അതോറിറ്റി അസി. എഞ്ചിനീയറുടെ നിര്ദ്ദേശപ്രകാരം കരുവേലിപ്പടി അസി.എക്സി. എഞ്ചിനീയര് പി.ആര്. രതിയപ്പന് ഉറപ്പ് എഴുതി നല്കിയത് സമരക്കാരെ അറിയിച്ചു. പെരുമ്പടപ്പ് പ്രദേശത്ത് കൃത്യമായ ജലവിതരണം ഉറപ്പാക്കുമെന്ന് അസി.എക്സി. എഞ്ചിനീയര് അറിയിച്ചതിനെത്തുടര്ന്ന് സമരം അവസാനിപ്പിക്കുകയായിരുന്നു.
