മുണ്ടക്കയം:’ഓട്ടംവിളിച്ചു കൊണ്ടുപോയി ഓട്ടോ ഡ്രൈവറെ കൊലപ്പെടുത്താന് ശ്രമം. മുണ്ടക്കയം വണ്ടന്പതാല് അസംബനി രാജേഷ്(27)ആണ് മര്ദ്ദനത്തില് ഗുരുതരമായി പരിക്കേറ്റ് മുണ്ടക്കയത്തെ സ്വകാര്യാശുപത്രിയില് പ്രവേശിപ്പിച്ചത്.
ശനിയാഴ്ച ഉച്ചക്ക് മുപ്പത്തിയഞ്ചാം മൈലില് നിന്നും ഓട്ടം കഴിഞ്ഞ് രാജേഷ് വരുന്നതിനിടയില് മുപ്പത്തിയഞ്ചാംമൈല്-വണ്ടന്പതാല് റോഡില് റോഡിനു മദ്ധ്യഭാഗത്തായി സ്വകാര്യകാര് പാര്ക്കു ചെയ്തിരിക്കുന്നതി കാണാനിടയായി. മറുവശത്തു നിന്നും ആംബുലന്സ് കൂടിയെത്തിയതോടെ മുന്നോട്ടു പോകാനാവാതെ ഓട്ടോയും ആംബുലന്സും ദീര്ഘനേരം ഹോണ് മുഴക്കിയെങ്കിലും കാര് മാറ്റാതിരുന്നതോടെ ഓട്ടോയില് നിന്നിറങ്ങി നോക്കിയതോടെ കാറില് നാലംഗ സംഘം മദ്യപിക്കുന്നത് കാണാനിടയായി. ഇതു ശരിയല്ലന്നും സൈഡു തരണമെന്നും രാജേഷ് പറഞ്ഞതോടെ അസംഭ്യം പറഞ്ഞ ശേഷം സംഘം വാഹനത്തിനു വഴി സൗകര്യമൊരുക്കി നല്കി.
പിന്നീട് വൈകിട്ട് 5മണിയോടെ സംഘത്തിലുണ്ടായിരുന്ന മുന് ഓട്ടോ ഡ്രൈവര് കൂടിയായിരുന്ന അനസ് വണ്ടന്പതാലിലെത്തി രാജേഷിനോട് മുപ്പത്തയഞ്ചാമൈലിലേക്കു ഓട്ടംപോകണമെന്ന് ആവശ്യപ്പെടുകയും താന് ഓട്ടോ ഓടിച്ചു കൊളളാമെന്നു പറഞ്ഞ് രാജേഷുമായി ഓടിച്ചു പോകുകയുമായിരുന്നുവത്രെ. മുപ്പത്തിയഞ്ചാം മൈല് – വണ്ടന്പതാല് റോഡിലൂടെ പോയി വിജനമായ സ്ഥലത്ത് എത്തിയപ്പോള് മറ്റുമൂന്നുപേര് കാത്തു നില്പ്പുണ്ടായിരുന്നു. തുടര്ന്നു നാലുപേരും ചേര്ന്നു രാജേഷിനെ മര്ദ്ദിക്കുകയായിരുന്നു. ഉച്ചക്കു നീ ഞങ്ങളെ അസഭ്യം പറഞ്ഞതിനു പകരം വീട്ടലാണന്നു ഉച്ചത്തില് വിളിച്ചായിരുന്നു മര്ദനം.
കമ്പിവടി, പട്ടിക എന്നിവകൊണ്ടു മര്ദ്ദിച്ചശേഷം ഓടി രക്ഷപ്പെടാനുളള ശ്രമത്തില് കല്ലു കൊണ്ടു സംഘം രാജേഷിനെ എറിഞ്ഞു താഴെയിട്ടു. മര്ദനത്തില് ഗുരുതരമായി പരിക്കേറ്റ രാജേഷിനെ വഴിയാത്രക്കാരാണ് ആശുപത്രിയില് എത്തിച്ചത്. തല, ചെവി, കാല് എന്നിവയ്ക്ക് ഗുരുതരമായി പരിക്കേറ്റിട്ടുണ്ട്. നിലത്തിട്ടു മൂവര് സംഘം ചവിട്ടിയതിനാല് ദേഹമാസകലം മര്ദ്ദനത്തിന്റെ പാടുകളുണ്ട്. സംഭവത്തില് പ്രതിഷേധിച്ച് വണ്ടന്പതാലില് രാഷ്ട്രീയപാര്ട്ടികള് സംയുക്തമായി ചേര്ന്ന് ആക്ഷന് കൗണ്സില് ചേര്ന്ന് മുപ്പത്തിയഞ്ചാംമൈലിലും മുണ്ടക്കയം ടൗണിലും വണ്ടന്പതാലിലും പ്രതിഷേധ പ്രകടനം നടത്തി. വണ്ടന്പതാലില് ഓട്ടോക്കാര് ഹര്ത്താല് ആചരിച്ചു.
പ്രകടനത്തിനു ശേഷം മുണ്ടക്കയത്തു ചേര്ന്ന യോഗം സിഐടിയു നേതാവ് പി.എസ്. സുരേന്ദ്രന് ഉദ്ഘാടനം ചെയ്തു. കോണ്ഗ്രസ് നേതാവും പഞ്ചായത്തംഗവുമായ സെബാസ്റ്റ്യന് ചുളളിത്തറ, നവാസ് തോപ്പില് (മുസ്ലിം ലീഗ്)അഭിലാഷ്(ബിജെപി), പി,എന്. സത്യന്(സിപിഎം), നയാസ് കല്ലുപുരക്കല്, സന്തോഷ്, ഷാജി എന്നിവര് സംസാരിച്ചു. സംഭവവുമായി ബന്ധപ്പെട്ട് അനസ്സ്, ജോഷി, വിനീത്, അഖില് എന്നിവര്ക്കെതിരെ പോലീസ് കേസെടുത്തു.
