231 . മഹാരൂപാ – മഹത്തായ രൂപമുള്ളവള്. എല്ലാ പ്രപഞ്ചത്തെയും ഉള്ക്കൊള്ളുന്നതും എല്ലാത്തിലും അന്തര്ഭവിക്കുന്നതുമായ ദേവീരൂപം ഏറ്റവും മഹത്താണ്. ഏറ്റവും സൂക്ഷ്മമായതാണെന്നും പറയാം. ലളിതോപാഖ്യാനത്തിലുള്ള ലളിതാസ്തവരാജം എന്ന സ്തോത്രത്തില് ദേവിയുടെ രൂപം വര്ണ്ണിച്ചിരിക്കുന്നതു നോക്കുക.
”കലാമുഹൂര്ത്താകാഷ്ഠാഹര്മാസസം വത്സരാത്മനേ
നമഃ സഹസ്രശീര്ഷായൈ സഹസ്രമുഖലോചനേ
നമഃ സഹസ്രഹസ്താബ്ജപാദപങ്കജശോഭിതേ
അണോരണുതരേ ദേവി മഹതോപി മഹീയസി
പരാത്പരതരേ മാതസ്തേജസ്ത്വം തേജസാമസി
അതലന്തു ഭവത്പാദൗ വിതലം ജാനുനീ തവ
രസാതലം കടീദേശഃ കുക്ഷിസ്തേ ധരണീ ഭവേത്
ഹൃദയന്തു ഭുവര്ല്ലോകഃ സ്വസ്തേ മുഖമുദാഹൃതം
ദൃശശ്ചന്ദ്രാര്കദഹനാ ദിശസ്തേ ബാഹവോംബികേ
മരുതസ്തേ തനൂച്ഛ്യാസാ വാചസ്തേ ശ്രുതയോഖിലാഃ
ക്രീഡാ തേ ലോകരചനാ സഖാ തേ ചിന്മയശ്ശിവഃ
ആഹാരസ്തേ ചിദാനന്ദോ വാസസ്തേ ഹൃദയം സതാം
ദൃശ്യാദൃശ്യസ്വരൂപാണി രൂപാണി ഭുവനാനി തേ
ശിരോരുഹാ സഭസ്തേ തു താരകാഃ കുസുമാനി തേ
ധര്മാദ്യാ ബാഹവസ്തേ സ്യുരധര്മദ്യായുധാനി തേ
യമാശ്ച നിയമാശ്ചൈവ കരപാദരുഹാസ്തധാ
സ്തനൗ സ്വാഹാസ്വധാമകാരൗ രസനാ തേ സരസ്വതീ
പ്രത്യാഹാരസ്ത്വിന്ദ്രിയാണി ധ്യാനം തേ ധീസ്തൃഡാസനം
മനസ്തേ ധാരണാശക്തിര് ഹൃദയം തേ സമാധികാ
മഹീരുഹാസ്തേം ഗരുഹാഃ പ്രഭാതം വസനം തവ
ഭൂതം ഭവത് ഭവിഷ്യച്ച നിത്യം ച തവ വിഗ്രഹം
യജ്ഞരൂപാ ജഗദ്ധാത്രീ വിഷ്വഗ്രൂപാ ച പാവനീ
ആധാരം ത്വാം പ്രപശ്യന്തിന സമൃങ്നിഖിലാഃ പ്രജാഃ
(കല, മുഹൂര്ത്തം, കാഷ്ഠാ, അഹസ്സ്, മാസം, സംവത്സരം എന്നിങ്ങനെയുള്ള കാലവിഭാഗങ്ങള് സ്വരൂപമായുള്ളവളേ സഹസ്രശീര്ഷയും സഹസ്രമുഖയും സഹസ്രനേത്രയും ആയ മഹാദേവീ നിന്തുരുവടിക്കു നമസ്ക്കാരം.
ബഹുസഹസ്രം കൈകളാലും കാലുകളാലും ശോഭിക്കുന്നവളേ, അണുവിലും അണുവായും മഹത്തായതിനെക്കാളും മഹത്തായും വര്ത്തിക്കുന്ന അവിടുത്തേക്കു നമസ്കാരം. പരാത്പരതരയായ ദേവിക്കു നമസ്ക്കാരം. നിന്തുരുവടി തേജസ്സുകളുടെ തേജസ്സാകുന്നു.
അതലം അവിടുത്തെ പാദങ്ങളും വിതലം കാല്മുട്ടുകളും രസാതലം കടീപ്രദേശവും ധരണി കക്ഷിയുമാകുന്നു. ഭുവര്ല്ലോകം മുഖവും ആകുന്നു. അല്ലയോ അംബികേ ചന്ദ്രനും സൂര്യനും അഗ്നിയും നിന്തുരുവടിയുടെ കണ്ണുകളും ദിക്കുകള് ബാഹുക്കളും മരുത്തുകള് ശ്വാസവായുക്കളും ശ്രുതികള് വാക്കുകളും ആകുന്നു. അവിടുത്തെ ലീല ചരാചരരചനയാണ് കളിക്കൂട്ടുകാരന് ചിദ്രൂപനായ ശിവന്. നിന്തിരുവടിയുടെ ആഹാരം നിത്യാനന്ദം.
വാസസ്ഥാനം സജ്ജനങ്ങളുടെ ഹൃദയം. ദ്യശ്യാദൃശ്യസ്വരൂപങ്ങളായ ഭുവനങ്ങളെല്ലാം നിന്തിരുവടിയുടെ രൂപങ്ങള്. സദസ്സ് അവിടുത്തെ തലമുടി. താരകള് മുടിയിലണിയുന്ന പൂക്കള്. നിന്തിരുവടിയുടെ ബാഹുക്കള് ധര്മ്മം തുടങ്ങിയവ. ആ കൈകളിലെ ആയുധങ്ങള് അധര്മ്മം തുടങ്ങിയവ. കൈകാലുകളിലെ നഖങ്ങള് യമങ്ങളും നിയമങ്ങളും. ലോകോജ്ജീവകങ്ങളായ അവിടുത്തെ സ്തനങ്ങള് സ്വാഹാകാരവും സ്വധാനങ്ങള്. ധ്യാനം അവിടുത്തെ ബുദ്ധി. മനസ്സ് ധാരണാശക്തി.
ഹൃദയം സമാധി. ആസനം തൃഷ്ണ. വൃക്ഷങ്ങള് നിന്തിരുവടിയുടെ അംഗരോമങ്ങളും പ്രഭാതം വസ്ത്രവും ഭൂതവര്ത്തമാന ഭവിഷ്യത്തുക്കള് വിഗ്രഹവും നിന്തിരുവടി യജ്ഞരൂപവും ജഗദ്ധാത്രിയും വിഷ്വഗ്രൂപയും പാവനിയും ആകുന്നു. എല്ലാത്തിനും ആധാരമായ നിന്തിരുവടിയെ എല്ലാ പ്രജകളും സമ്യക്കാംവണ്ണം ദര്ശിക്കുന്നില്ല.
ഈ വര്ണന മനനം ചെയ്താല് ദേവിയുടെ മഹാരൂപം മനസ്സില് തെളിയും.
… തുടരും
