225. മന്ത്രതന്ത്രരൂപാഃ – 1. മന്ത്രം: മന്ത്രങ്ങള് ആരാധ്യ ചൈതന്യത്തെ ആഹ്വാനം ചെയ്യാനും പ്രസാദിപ്പിക്കാനും ഉപകരിക്കുന്ന ഉച്ചരിതശബ്ദങ്ങളാണ്. മന്ത്രങ്ങളെക്കുറിച്ച് സാമാന്യമായി ഈ നാമത്തിന്റെ വ്യാഖ്യാനത്തിന്റെ തുടക്കത്തില് പറഞ്ഞു.
2. യന്ത്രം: പ്രപഞ്ചത്തെയും പ്രപഞ്ചശക്തികളെയും പ്രതിനിധാനം ചെയ്യുന്ന നേര്വരകളും വര്ത്തുളരേഖകളും ബിന്ദുക്കളും ചേര്ന്ന ചിത്രങ്ങളാണു യന്ത്രങ്ങള്. യന്ത്രരാജന് എന്നു പ്രസിദ്ധമായ ശ്രീചക്രം ഏറ്റവും നല്ല ഉദാഹരണമാണ്. സാധാരണയായി നാല്പത്തിനാലു കോണുകളുള്ള ശ്രീചക്രമാണ് യന്ത്രരാജനായി പറയപ്പെടുന്നത്. പക്ഷേ മൂകാംബികാദേവി ശീവനോടൊപ്പം സ്ഥിതിചെയ്യുന്ന മൂകാംബികാ ശ്രീചക്രത്തിന് 85 കോണുകളുണ്ട്. മൂകാംബികാ ശ്രീചക്രം ഇതെഴുതുമ്പോള് എന്റെ മുമ്പില് ഉണ്ടെങ്കിലും അതിന്റെ ഘടന വിവരിക്കുന്ന ആധികാരിക ഗ്രന്ഥങ്ങളൊന്നും ഞാന് കണ്ടിട്ടില്ല. പ്രപഞ്ചത്തെ പ്രതിനിധീകരിക്കുന്ന ശ്രീചക്രം തൊട്ട് വെറുമൊരു ബിന്ദുവോ നേര്വരയോ വൃത്തമോ അക്ഷരത്തിന്റെ ലിപി രൂപമോ ഉള്ള കോടിക്കണക്കിന് യന്ത്രങ്ങളുണ്ട്. മന്ത്രസംഖ്യപോലെ യന്ത്രസംഖ്യയും അറുപത്തിനാലു കോടിയാണെന്ന് ആചാര്യന്മാര് പറയുന്നു.
3. ശരീരം: ശരീരവും ആരാധനാതന്ത്രത്തിന്റെ ഒരു പ്രധാന ഘടകമാണ്. മനുഷ്യനു സ്വന്തമെന്നു പറയാവുന്ന സമ്പത്ത് ശരീരമാണ്. മറ്റെല്ലാത്തിനും പല അവകാശികളുണ്ടാകും. ശരീരത്തെ പൂര്ണമായി ആരാധ്യദേവതയ്ക്ക് അര്പ്പിക്കുന്ന ചടങ്ങാണ് നമസ്ക്കാരം. ശരീരസ്ഥമായ ജീവാത്മാവ് ഉപാസ്യമായ പരമാത്മാവുമായി സംവദിക്കുന്നതിനു ശരീരാവയവങ്ങളെ ഉപയോഗിക്കുന്ന തന്ത്രങ്ങളുടെ ഭാഗമാണ് യോഗാസനങ്ങളും ഹസ്തമുദ്രകളും അവയെക്കുറിച്ച് ഇവിടെ വിവരിക്കുന്നില്ല.
4. പ്രകൃതി: പ്രകൃതിയും ആരാധനാ തന്ത്രത്തിന്റെ ഭാഗമാണ്. ഉപാസ്യ ചൈതന്യത്തെ വിഗ്രഹമോ ചിത്രമോ പോലുള്ള പ്രതീകത്തിലേയ്ക്കാവാഹിച്ച് വിശിഷ്ടാതിഥിയെന്നപോലെ ആസനം, സ്നാനം, വസ്ത്രം, ആഭരണം, അനുലേപനം, ധൂപം, ദീപം, നീരാജനം എന്നിങ്ങനെയുള്ള ക്രമത്തില് ആരാധിക്കാനുള്ള ഉപചാരങ്ങള്ക്ക് പ്രകൃതിയില് നിന്നുള്ള വിഭവങ്ങള് കൂടിയേ കഴിയൂ. പൂവും കായും പഴവും എണ്ണയും നെയ്യും തീയും സുഗന്ധവസ്തുക്കളുമെല്ലാം പ്രകൃതിയില്നിന്നു ശേഖരിച്ച് പ്രകൃതിയെ സൃഷ്ടിച്ച പരമചൈതന്യത്തിനു സമര്പ്പിക്കുന്നതും തന്ത്രമാണ്.
…. തുടരും
