കൊച്ചി: ദേശീയ ഗെയിംസിന്റെ കൊച്ചി വേദികളിലെത്തുന്ന താരങ്ങളടക്കമുളള അതിഥികളെ സ്വീകരിക്കുന്നതു മുതല്, താമസസൗകര്യം അടക്കമുളള കാര്യങ്ങളില് ഉന്നത നിലവാരം പ്രകടിപ്പിച്ച് റിസപ്ഷന് ആന്റ് അക്കോമഡേഷന് കമ്മറ്റി മികവു പുലര്ത്തി. മേയര് ടോണി ചമ്മണി ചെയര്മാനും പഞ്ചായത്ത് ഡെപ്യൂട്ടി ഡയറക്ടര് കെ. അര്ജുനന് കണ്വീനറുമായുളള കമ്മറ്റിക്കാണ് ജില്ലയില് സ്വീകരണസജ്ജീകരണ ചുമതല. കായികതാരങ്ങള്, ഔദ്യോഗിക ഭാരവാഹികള്, സാങ്കേതിക വിദഗ്ധര് തുടങ്ങിയവരടങ്ങുന്ന അതിഥികള്ക്കായി രണ്ടു മാസംമുന്പു തന്നെ താമസസൗകര്യം പൂര്ത്തീകരിച്ചിരുന്നു.
മത്സരാര്ത്ഥികള്ക്ക് സൗകര്യപ്രദമായ രീതിയില് വേദികള്ക്ക് സമീപമുളള ഹോട്ടലുകളാണ് തിരഞ്ഞെടുത്തത്. വൈറ്റിലയിലെ എമറാള്ഡ്, മെര്മെയ്ഡ്, റിവേര, അബാദിന്റെ മൂന്ന് ഹോട്ടലുകള്, നെടുമ്പാശ്ശേരിയിലെ എയര്കാസില്, ലോട്ടസ് എയ്റ്റ്, അറ്റ്ലസ് എന്നീ നക്ഷത്ര സൗകര്യമുളള ഹോട്ടലുകളാണ് ഒരിക്കിയത്. ഫുഡ്, റിസപ്ഷന് കമ്മറ്റികളുമായി ആലോചിച്ച്, താമസിക്കുന്ന ഹോട്ടലുകളില് തന്നെ ഭക്ഷണസൗകര്യം ഒരുക്കിയത് അതിഥികള്ക്ക് ഏറെ സൗകര്യപ്രദമായി. മത്സരങ്ങള് തത്സമയം സംപ്രേക്ഷണം ചെയ്യുന്ന ദൂരദര്ശന് വിഭാഗത്തിന് ഫോര്സ്റ്റാര് സൗകര്യമുളള വേദാന്തയിലാണ് താമസസൗകര്യം.
അതിഥികള് എത്തുന്ന എറണാകുളം സൗത്ത്, എറണാകുളം ടൗണ്, ആലുവ റെയില്വെ സ്റ്റേഷനുകള്, നെടുമ്പാശ്ശേരി വിമാനത്താവളം എന്നിവിടങ്ങളിലായി നാല് റിസപ്ഷന് കൗണ്ടറുകള് പ്രവര്ത്തിക്കുന്നുണ്ട്. ഓരോ കൗണ്ടറിലും പത്തംഗങ്ങള് വീതമുളള രണ്ടുടീമുകളുണ്ട്. മത്സരാര്ത്ഥികളെയും ഔദ്യോഗിക ഭാരവാഹികളെയും എത്തിച്ചേരേണ്ടതായ മത്സരവേദികളനുസരിച്ച് സജ്ജീകരിച്ചിരിക്കുന്ന ഹോട്ടലുകളില് എത്തിക്കുവാന് കമ്മറ്റിയുടെ കൂട്ടായ പ്രവര്ത്തനത്തിലൂടെ സാധിച്ചു. ഇത്തരത്തിലുളള 1447 അതിഥികളില് 800പേര് ആദ്യഘട്ടമായി എത്തി.
അടുത്ത അഞ്ച്, ആറ് തീയതികളിലായി എത്തുന്ന 647 പേര്ക്കുളള ക്രമീകരണങ്ങളും ഇതിനകം സജ്ജമാക്കിയിട്ടുണ്ട്. ഇതിനുപുറമെ മറ്റ് സംസ്ഥാനങ്ങളില് നിന്നുളള കായികതാരങ്ങളുടെ ക്ഷേമത്തിനായി അതത് സര്ക്കാരുകള് നിയോഗിച്ചിട്ടുളള 31 ഉന്നത ഉദ്യോഗസ്ഥരുടെയും സംസ്ഥാന സംഘാടക സമിതിയില് നിന്നുളള ഉദ്യോഗസ്ഥരുടെയും സൗകര്യങ്ങള് സജ്ജീകരണ സമതിയാണ് ഒരുക്കുന്നത്. ഫുഡ്, ട്രാന്സ്പോര്ട്ട് കമ്മറ്റികളെയും ഉള്പ്പെടുത്തിയുളള ഏകോപനമാണ് ഒരാക്ഷേപത്തിനും ഇടവരുത്താതെ, റിസപ്ഷന് ആന്റ് അക്കോമഡേഷന് കമ്മറ്റിയുടെ പ്രവര്ത്തനം സുഗമമാക്കുന്നതെന്ന് കമ്മറ്റിയുടെ ജില്ല കണ്വീനര് കെ. അര്ജുനന് പറഞ്ഞു.
