ബാഗ്ദാദ്: ബന്ദിയാക്കിയ രണ്ടാമത്തെ ജാപ്പനീസ് മാധ്യമ പ്രവര്‍ത്തകനെയും ഇസ്ലാമിക് സ്‌റ്റേറ്റ് ഭീകരര്‍തലയറുത്ത് കൊന്നു. ഫ്രീലാന്‍സ് പത്രപ്രവര്‍ത്തകനായ കെന്‍ജി ഗോട്ടോയെ ആണ് കൊല്ലപ്പെട്ടത്. ഗോട്ടോയുടെ തലവെട്ടിയതായി അവകാശപ്പെടുന്ന വിഡിയോ ഐഎസ് ഇന്റര്‍നെറ്റിലൂടെ പുറത്തുവിട്ടു.
ഗോട്ടോയുടെ കഴുത്തില്‍ കത്തിവച്ച് ഒരാള്‍ നില്‍ക്കുന്നതു കാണിക്കുന്നുണ്ട്. തുടര്‍ന്ന് ശരീരത്തില്‍ നിന്നു തല വേര്‍പെട്ട നിലയാണു കാണിക്കുന്നത്. ഇസ്ലാമിക് സ്‌റ്റേറ്റുമായി ബന്ധപ്പെട്ട ട്വിറ്റര്‍ അക്കൗണ്ടിലൂടെയാണ് വിഡിയോ പുറത്ത് വിട്ടത്.
ജോര്‍ദാനില്‍ തടവിലായ ഭീകരവനിത സാജിദയെ വിട്ടുകൊടുത്താല്‍ ഗോട്ടോയെ മോചിപ്പിക്കാമെന്ന് നേരത്തെ ഐഎസ് വാഗ്ദാനം നല്‍കിയിരുന്നു. എന്നാല്‍ ഭീകരവനിതയെ മോചിപ്പിച്ചില്ല. ഇവരുടെ മോചനത്തിനായി ഐഎസ് അനുവദിച്ച സമയ പരിധി രണ്ടു ദിവസം മുമ്പ് അവസാനിച്ചിരുന്നു. ഗോട്ടോയുടെ മരണത്തിന് കാരണം ജപ്പാന്‍ പ്രധാനമന്ത്രി ഷിന്‍സോ ആബെയാണെന്ന് വിഡിയോയില്‍ കാണുന്ന ഭീകരന്‍ കുറ്റപ്പെടുത്തുന്നുണ്ട്.
ഇതുകൊണ്ടൊന്നും ഭീകരതയ്‌ക്ക് മുന്നില്‍ ജപ്പാന്‍ മുട്ടുമടക്കില്ലെന്ന് ജപ്പാന്‍ പ്രധാനമന്ത്രി ഷിന്‍സോ ആബെ പ്രതികരിച്ചു. ഐഎസിന്റെ നടപടി പൈശാചികമാണെന്ന് പറഞ്ഞ യുഎസ് പ്രസിഡന്റ് ബറാക് ഒബാമയും ഗോട്ടോയുടെ വധത്തെ അപലപിച്ചു.
സൈനിക കരാറുകാരനായ ജപ്പാനീസ് പൗരന്‍ ഹരുന യുകാവയെ കൊലപെടുത്തി ഒരാഴ്ച പിന്നിടും മുമ്പാണ് രണ്ടാമത്തെ ബന്ദിയെയും ഇസ്ലാമിക് സ്‌റ്റേറ്റ് ഭീകരവാദികള്‍ ക്രൂരമായി കൊലപെടുത്തിയത്.
ഒക്ടോബറില്‍ സിറിയയിലെ വിമത കലാപം റിപ്പോര്‍ട്ട് ചെയ്യാനായി ആയിരുന്നു കെന്‍ജി കോട്ടോ സിറിയയിലെത്തിയത്. അവിടെ വച്ചാണ് ഭീകരര്‍ കോട്ടോയെ തട്ടികൊണ്ട് പോയി ബന്ദിയാക്കിയത്. കോട്ടെയെ മോചിപ്പിക്കാന്‍ ജോര്‍ദ്ദാനുമായി ചേര്‍ന്ന് ജപ്പാന്‍ ചര്‍ച്ച നടത്തുന്നതിടെയാണ് കൊലപാതക വാര്‍ത്ത പുറത്ത് വന്നത്. എന്നാല്‍ വീഡിയോ ദൃശ്യം സംബന്ധിച്ച് സ്ഥിരീകരണത്തിന് ശ്രമിക്കുകയാണെന്നാണ് ജപ്പാന്റെ പ്രതികരണം.
മുന്‍പെത്തെ കൊലപാതകത്തിന് സമാനമായ ദൃശ്യമാണ് ഇപ്പോള്‍പുറത്ത് വീട്ട വീഡിയോയിലും ഉള്ളത്. ബന്ദിയാക്കിയ ജോര്‍ദ്ദാന്‍പൈലറ്റ് മൊയാസ് അല്‍കസബെയും വധിക്കുമെന്ന് ഇസ്ലാമിക് സ്‌റ്റേറ്റ് ഭീകരര്‍ വ്യക്തമാക്കിയിരുന്നു.എന്നാല്‍ പൈലറ്റിനെ വധിച്ചാല്‍ അതേ നാണയത്തില്‍ തിരിച്ചടി ഉണ്ടാകുമെന്ന് ജോര്‍ദ്ദാനും വ്യക്തമാക്കിയിട്ടുണ്ട്.
