ആലപ്പുഴ: ദേശീയഗെയിംസിന്റെ ഭാഗമായി ആലപ്പുഴയില് നടക്കുന്ന ജലകായികമത്സരങ്ങളുടെ ഒരുക്കങ്ങള് അവസാനഘട്ടത്തില്.
വേമ്പനാട്ട് കായലില് മണ്ണഞ്ചേരി പഞ്ചായത്തിലെ ആസ്പിന്വാള് ജെട്ടിക്കു സമീപം 2,000 മീറ്ററില് ഒരുക്കിയിരിക്കുന്ന ട്രാക്കിലാണു റോവിംഗ് , കനോയിംഗ്-കയാക്കിംഗ് മത്സരങ്ങള് നടക്കുക.
റോവിംഗില് 18 സ്വര്ണം ഉള്പ്പെടെ 54 മെഡലുകളും കനോയിംഗിലും കയാക്കിംഗിലുമായി 36 സ്വര്ണമുള്പ്പടെ 108 മെഡലുകളാണ് വിജയികളെ കാത്തിരിക്കുന്നത്.
തെങ്ങിന് കുറ്റികളും, കമുകും ഉപയോഗിച്ച് കായലില് ട്രാക്കുകളുടെ നിര്മ്മാണം പൂര്ത്തിയായി കഴിഞ്ഞു. പായലുകള് ഒഴുകിയെത്താതിരിക്കുന്നതിന് വല ഉപയോഗിച്ച് ട്രാക്കുകളെ വേര്തിരിച്ചിട്ടുണ്ട്.
2,000 മീറ്റര് വരുന്ന ഫോട്ടിങ് പ്ലാറ്റ്ഫോമുകളുടെ നിര്മ്മാണവും അവാസനഘട്ടത്തില്. ഒഫീഷ്യലുകള്ക്ക് മത്സരങ്ങള് സുഗമമായി നടത്തുന്നതിനാണ് ഈ താത്കാലിക പ്ലാറ്റ്ഫോമുകള്. റോവിംഗിലാണ് ആദ്യ മത്സരങ്ങള് അരങ്ങേറുക.
16 ടീമുകള് ഇതില് മാറ്റുരയ്ക്കും. 450 കളിക്കാരും നൂറോളം ഒഫീഷ്യലുകളും റോവിംഗ് പോരാട്ടങ്ങളുടെ ഭാഗമാകും.
30ന് മത്സരാര്ത്ഥികള് ആലപ്പുഴയിലെത്തും. സ്വകാര്യ റിസോര്ട്ടിലാണ് ഇവര്ക്കുള്ള താമസസൗകര്യമൊരുക്കിയിരിക്കുന്നത്. താരങ്ങള്ക്ക് താമസസ്ഥലത്ത് നിന്നും മത്സരവേദിയിലെത്തുന്നതിന് വാഹനസൗകര്യവും ഒരുക്കിയിട്ടുണ്ട്. 31, ഫെബ്രുവരി ഒന്ന് തീയതികളില് പരിശീലനം.
മൂന്ന് മുതല് അഞ്ച് വരെയുള്ള തീയതികളിലാണ് പുന്നമടകായലില് തുഴച്ചില് മത്സരങ്ങള് നടക്കുക. ഫെബ്രുവരി ഒമ്പതു മുതല് 14 വരെ കനോയിംഗും കയാക്കിംഗും മത്സരങ്ങള് നടത്തും. അഞ്ഞൂറോളം താരങ്ങള് ഈയിനങ്ങളില് മത്സരിക്കും.
മുന് ഗെയിംസിനെ അപേക്ഷിച്ച് കനോയിംഗ്-കയാക്കിംഗ് ഇനങ്ങളില് മൂന്നും റോവിംഗില് ഒരിനവും അധികമായി ഉള്പ്പെടുത്തിയിട്ടുണ്ട്. മുന് ഗെയിംസുകളിലെ നേട്ടം ഇത്തവണയും തുഴച്ചിലില് ആവര്ത്തിക്കാനുള്ള കഠിന പരിശീലനം കേരള ടീമംഗങ്ങള് വേമ്പനാട്ട് കായലില് ആരംഭിച്ചു കഴിഞ്ഞു.
ആന്ധ്രാപ്രദേശ്, ആന്ഡമാന്, സര്വീസസ്, മണിപ്പൂര്, മധ്യപ്രദേശ് എന്നീ ടീമുകളില് നിന്നാവും ഇത്തവണ കേരളത്തിന് വെല്ലുവിളി നേരിടേണ്ടി വരുക.
