തിമൂര്ത്തികളുടെ സംഹാരതാണ്ഡവം….
നൗകാമ്പ്: സ്പാനിഷ് ലീഗില് ഞായറാഴ്ച രാത്രി വൈകി നടന്ന സൂപ്പര് ക്ലാസ്സിക്ക് പോരാട്ടത്തില് ബാഴ്സലോണക്ക് മിന്നുന്ന വിജയം. നിലവിലെ ചാമ്പ്യന്മാരായ അത്ലറ്റികോ മാഡ്രിഡിനെ ഒന്നിനെതിരെ മൂന്ന് ഗോളുകള്ക്കാണ് മെസ്സിപ്പട തകര്ത്തു വിട്ടത്. ത്രിമൂര്ത്തികളായ മെസ്സി, നെയ്മര്, സുവാരസ് എന്നിവര് ബാഴ്സക്കായി ഗോളുകള് നേടി. അത്ലറ്റികോയുടെ ആശ്വാസഗോള് നേടിയത് മരിയോ മാന്സുകിച്ചാണ്.
ബാഴ്സയുടെ സ്റ്റേഡിയമായ നൗകാമ്പില് നടന്ന ക്ലാസ്സിക്ക് പോരാട്ടത്തില് അവര്ക്ക് തന്നെയായിരുന്നു മേധാവിത്വം. കളിയുടെ 68 ശതമാനവും പന്ത് നിയന്ത്രിച്ചുനിര്ത്തിയ കറ്റാലന് പട പായിച്ച 17 ഷോട്ടുകളില് ഏഴെണ്ണവും ലക്ഷ്യത്തിലേക്കായിരുന്നു. അതേസമയം അത്ലറ്റികോ മാഡ്രിഡിന് ഏഴ് ഷോട്ടുകള് മാത്രമാണ് ഉതിര്ക്കാന് കഴിഞ്ഞത്. അതില് തന്നെ മൂന്നെണ്ണം മാത്രമാണ് ലക്ഷ്യത്തിലേക്കായിരുന്നത്.
ഒമ്പതാം മിനിറ്റില് മെസ്സി ഒരു അവസരം പാഴാക്കിയതോടെയാണ് കളിക്ക് ചൂടുപിടിച്ചത്. എന്നാല് 12-ാം മിനിറ്റില് ബാഴ്സ ലീഡ് നേടി. സുവാരസ് ഒരുക്കിക്കൊടുത്ത അവസരം മുതലെടുത്ത് ക്ലോസ് റേഞ്ചില് നിന്ന് നെയ്മര് പായിച്ച ഷോട്ടാണ് അത്ലറ്റികോ വല കുലുക്കിയത്. തൊട്ടടുത്ത മിനിറ്റില് ജോര്ഡി ആല്ബയുടെ ഒരു ഷോട്ട് അത്ലറ്റികോ ഗോളി തട്ടിയകറ്റി.
റീബൗണ്ട് പന്ത് പിടിച്ചെടുത്ത് സുവാരസ് ഷോട്ട് ഉതിര്ത്തെങ്കിലും അതും അത്ലറ്റികോ ഗോളി വിഫലമാക്കി. തൊട്ടുപിന്നാലെ അത്ലറ്റികോയുടെ കോകെ ഒരു അവസരം പാഴാക്കി. തുടര്ന്നും നിരവധി തവണ മെസ്സിയും സുവാരസും നെയ്മറും ചേര്ന്ന് അത്ലറ്റികോ ഗോള്മുഖത്ത് ഭീതിപരത്തിയെങ്കിലും ലക്ഷ്യം പിഴച്ചു. തുടര്ച്ചയായ മുന്നേറ്റങ്ങള്ക്കൊടുവില് 35-ാം മിനിറ്റില് ബാഴ്സ ലീഡ് ഉയര്ത്തി. ലയണല് മെസ്സിയുടെ പാസില് നിന്ന് ലൂയി സുവാരസാണ് രണ്ടാം ഗോള് നേടിയത്. ഇതോടെ ആദ്യപകുതി 2-0ന് കലാശിച്ചു.
രണ്ടാം പകുതി ആരംഭിച്ച് മൂന്ന് മിനിറ്റാകുന്നതിന് മുന്നേ ബാഴ്സ ഗോള് വഴങ്ങുന്നതില് നിന്ന് രക്ഷപ്പെട്ടു. കോകെയുടെ ക്രോസില് നിന്ന് ഡീഗോ ഗോഡിന് ഉതിര്ത്ത ഹെഡ്ഡര് ക്രോസ്ബാറില്ത്തട്ടി തെറിച്ചു. 56-ാം മിനിറ്റില് അത്ലറ്റികോയ്ക്ക് അനുകൂലമായി പെനാല്റ്റി. ബോക്സിനുള്ളില് ജീസസ് ഗോമസിനെ മെസ്സി വലിച്ചിട്ടതിനാണ് അത്ലറ്റികോക്ക് പെനാല്റ്റി ലഭിച്ചത്. ക്ലബിന്റെ ചരിത്രത്തില് ആദ്യമായാണ് മെസ്സി പെനാല്റ്റി വഴങ്ങിയത്.
മാരിയോ മാന്സുകിച്ച് എടുത്ത കിക്ക് ബാഴ്സ ഗോളിയെ നിഷ്പ്രഭനാക്കി വലയില് കയറി. പിന്നീട് 80-ാം മിനിറ്റില് അത്ലറ്റികോക്ക് സമനില നേടാനുള്ള ഒരവസരം ലഭിച്ചെങ്കിലും റൗള് ഗാര്ഷ്യയുടെ ഷോട്ട് ബാഴ്സ ഗോളി രക്ഷപ്പെടുത്തി. പിന്നീട് 83-ാം മിനിറ്റില് മെസ്സിയുടെ ഒരു ശ്രമം അത്ലറ്റികോ ഗോളി വിഫലമാക്കിയപ്പോള് തൊട്ടുപിന്നാലെ ബോക്സിന് പുറത്തുനിന്ന് തിയാഗോ പായിച്ച ബുള്ളറ്റ് ഷോട്ട് ബാഴ്സ ഗോളിയും രക്ഷപ്പെടുത്തി. 87-ാം മിനിറ്റില് ബോക്സിന്റെ മധ്യത്തില് നിന്ന് മെസ്സി പായിച്ച ഇടംകാലന് ഷോട്ട് വലയില് കയറിയതോടെ ബാഴ്സയുടെ ഗോള്പട്ടിക പൂര്ത്തിയായി.
വിജയത്തോടെ ഒന്നാം സ്ഥാനത്തുള്ള റയലുമായുള്ള പോയിന്റ് വ്യത്യാസം ഒന്നായി നിലനിര്ത്താനും ബാഴ്സക്കായി. 17 കളികളില് നിന്ന് റയലിന് 42 പോയിന്റും 18 കളികളില് നിന്ന് ബാഴ്സക്ക് 41 പോയിന്റുമാണുള്ളത്. 18 കളികളില് നിന്ന് 38 പോയിന്റുള്ള അത്ലറ്റികോ മാഡ്രിഡാണ് മൂന്നാം സ്ഥാനത്ത്.
മറ്റ് മത്സരങ്ങൡ സെവിയ മറുപടിയില്ലാത്ത രണ്ട് ഗോളുകള്ക്ക് അല്മേറിയയെ തകര്ത്തപ്പോള് ഏല്ഷെ 2-1ന് അത്ലറ്റിക് ബില്ബാവോയെയും പരാജയപ്പെടുത്തി. റയല് സോസിഡാഡ്-ഗ്രനാഡ പോരാട്ടം 1-1ന് സമനിയില് കലാശിച്ചു. 17 കൡകളില് നിന്ന് 36 പോയിന്റുമായി സെവിയ നാലാം സ്ഥാനത്തേക്ക് മുന്നേറി.
