ചാത്തന്നൂര്: അമിതജനസംഖ്യയും വിപുലമായ വിസ്തീര്ണവുമുള്ള കല്ലുവാതുക്കല് ഗ്രാമപ്പഞ്ചായത്ത് വിഭജിച്ച് പാരിപ്പള്ളി പഞ്ചായത്തുകൂടി രൂപവല്കരിക്കണമെന്ന ആവശ്യം ശക്തമാകുന്നു.
കൊല്ലം ജില്ലയിലെ വിസ്തൃതിയുള്ള പഞ്ചായത്തുകളിലൊന്നാണ് കല്ലുവാതുക്കല് ഗ്രാമപ്പഞ്ചായത്ത് ഭൂമിശാസ്ത്രപരമായ പ്രത്യേകതകള് കൊണ്ടുതന്നെ ആകെയുള്ള 23 വാര്ഡുകളില് പകുതിയിലധികവും പഞ്ചായത്ത് ഓഫീസില് നിന്നും കിലോമീറ്ററുകള് അകലെയാണ്.
വില്ലേജ് അടിസ്ഥാനത്തില് വിഭജിച്ച് പാരിപ്പള്ളി വില്ലേജ് പ്രദേശം ഉള്പ്പെടുത്തിമാത്രം പാരിപ്പള്ളി പഞ്ചായത്ത് രൂപീകരിച്ചാലും പുതിയ പഞ്ചായത്ത് സ്വന്തം നിലയില്തന്നെ വികസനപ്രവര്ത്തങ്ങളുമായി മുന്നോട്ടുപോകും. നിലവിലുള്ള കല്ലുവാതുക്കല് ഗ്രാമപ്പഞ്ചായത്തിലെ പ്രധാനപ്പെട്ട സ്ഥാപനങ്ങളെല്ലാം പാരിപ്പള്ളി വില്ലേജ് പ്രദേശത്താണ്. ഈ പ്രദേശത്തുനിന്നാണ് കല്ലുവാതുക്കല് ഗ്രാമപ്പഞ്ചായത്തിന് ഏറ്റവുമധികം വരുമാനം ലഭിക്കുന്നതും.
എഴിപ്പുറം ഐഒസി പാചകവാതക റീഫില്ലിങ് പ്ലാന്റ്, പാമ്പുറം ഇഎസ്ഐ മെഡിക്കല് കോളേജ്, പാരിപ്പള്ളി പോലീസ്സ്റ്റേഷന്, കുളമട 110 കെവി സബ്സ്റ്റേഷന്, പാരിപ്പള്ളി ഇഎസ്ഐ ഡിസ്പെന്സറി, കെഎസ്ഇബി സെക്ഷന് ഓഫീസ്, വില്ലേജ് ഓഫീസ്, പാരിപ്പള്ളി എഎസ്എച്ച്എസ്എസ്, എഴിപ്പുറം എച്ച്എസ്എസ്, വേളമാനൂര്, കിഴക്കനേല, പാരിപ്പള്ളി െ്രെപമറി സ്കൂളുകള്, പ്രാഥമികാരോഗ്യകേന്ദ്രം, യുകെഎഫ് എഞ്ചിനിയറിങ് കോളേജ്, കൃഷിഭവന് തുടങ്ങി പ്രധാനസ്ഥാപനങ്ങള് പ്രവര്ത്തിക്കുന്നതും പാരിപ്പള്ളി ഗ്രാമപ്പഞ്ചായത്തിലും വില്ലേജിലുമാണ്.
കല്ലുവാതുക്കല് ഗ്രാമപ്പഞ്ചായത്തിന്റെ രണ്ട് ഷോപ്പിങ് കോംപ്ലക്സുകള്, കമ്മ്യൂണിറ്റിഹാള് എന്നിവയും പാരിപ്പള്ളി ജംഗ്ഷനിലാണ്. കല്ലുവാതുക്കല് ഗ്രാമപ്പഞ്ചായത്തിലെ ഏറ്റവും പ്രധാനപ്പെട്ട റസിഡന്ഷ്യല് ഏരിയയും പ്രധാന വ്യാപാരവ്യവസായകേന്ദ്രവും കൊല്ലം ജില്ലയുടെ തെക്കന് അതിര്ത്തിയിലെ ഏറ്റവും പ്രധാനപ്പെട്ട കേന്ദ്രവുമാണ് പാരിപ്പള്ളി. പ്രധാന ബാങ്കുകളുടെ ശാഖകളും പാരിപ്പള്ളിയിലാണ്. പ്രധാനപ്പെട്ട ക്ഷേത്രങ്ങളായ കൊടിമൂട്ടില് ഭദ്രകാളിക്ഷേത്രം, വേളമാനൂര് ഭഗവതിക്ഷേത്രം, പാമ്പുറം വിഷ്ണുപുരംക്ഷേത്രം എന്നിവയും പാരിപ്പള്ളി വില്ലേജിലാണ്. സിനിമാ തീയേറ്ററുകളും ഓഡിറ്റോറിയങ്ങളും ഏറ്റവും കൂടുതല് പാരിപ്പള്ളി ഗ്രാമപ്പഞ്ചായത്തിലാണ്.
ജനസംഖ്യയും ഗ്രാമപ്പഞ്ചായത്തില് 30000 കവിയും. സര്ക്കാര് നിശ്ചയിച്ചിട്ടുള്ള എല്ലാ മാനദണ്ഡങ്ങളെക്കാളും വളരെ ഉയരത്തിലാണ് പാരിപ്പള്ളി ഗ്രാമപ്പഞ്ചായത്ത്. ഭൂപ്രകൃതിയില് സമതലപ്രദേശവുമാണ്.
യാത്രാസൗകര്യങ്ങളും ഏറെയുണ്ട്. സാമൂഹിക, സാമ്പത്തിക, സാംസ്കാരിക, കായികരംഗങ്ങളില് മുന്നില് നില്ക്കുന്ന പ്രദേശവുമാണ് പാരിപ്പള്ളി. പാരിപ്പള്ളി ഗ്രാമപ്പഞ്ചായത്ത് വരുമാനത്തിലും വളരെയേറെ മുന്നിലാണ്.
പാരിപ്പള്ളി മാര്ക്കറ്റിന്റെയും ടോയ്ലറ്റിന്റെയും ശോച്യാവസ്ഥ മനസിലാക്കിയാല് മാത്രം മതിയാവും പാരിപ്പള്ളി പഞ്ചായത്ത് രൂപവല്കരണത്തിന്റെ ആവശ്യകത ബോധ്യപ്പെടാന്. കല്ലുവാതുക്കല് ഗ്രാമപ്പഞ്ചായത്ത് ഓഫീസിന്റെ മൂക്കിന് താഴെയുള്ള പൊതുചന്തയുടെ അവസ്ഥ നേരിട്ടറിയുമ്പോള് ഇപ്പോഴത്തെ കല്ലുവാതുക്കല് ഗ്രാമപ്പഞ്ചായത്തിന്റെ കാര്യക്ഷമതയും കൃത്യനിര്വഹണവും വ്യക്തമാകും. ഇതേ അവസ്ഥയാണ് വിശാലമായ കല്ലുവാതുക്കല് ഗ്രാമപഞ്ചായത്തിന്റേതും. നിര്ജീവമായ ഇപ്പോഴത്തെ ഭരണാവസ്ഥയ്ക്ക് മാറ്റമുണ്ടാകണമെങ്കില് പഞ്ചായത്ത് വിഭജനം മാത്രമേ മാര്ഗമുള്ളൂ.
