കുന്നത്തൂര്: ശൂരനാട് തെക്ക് ഗ്രാമപഞ്ചായത്തിലെ ഭരണസമിതിഅംഗങ്ങള് തമ്മിലുള്ള തര്ക്കവും ഭിന്നതയും മൂലം പ്രദേശത്തിന്റെ വികസനപ്രവര്ത്തനങ്ങള് താറുമാറായി. പഞ്ചായത്തില് ഭരണസ്തംഭനമാണെന്ന ആരോപണവും ശക്തമാണ്. പതിനാറംഗസഭയില് പത്തംഗങ്ങളുള്ള യുഡിഎഫാണ് ഇപ്പോള് പഞ്ചായത്തിന്റെ ഭരണം കയ്യാളുന്നത്.
സ്ത്രീസംവരണമുള്ള പ്രസിഡന്റ് പദവി കോണ്ഗ്രസിലെ ഒ. ശ്രീദേവിയാണ് വഹിക്കുന്നത്. കോണ്ഗ്രസിന്റെ തന്നെ എസ്. സുഭാഷായിരുന്നു വൈസ്പ്രസിഡന്റ്. ഭരണകാര്യത്തിലുള്ള പഞ്ചായത്ത് പ്രസിഡന്റിന്റെ പരിചയക്കുറവ് മുതലാക്കി കഴിഞ്ഞ നാലുവര്ഷമായി ഭരണം നിയന്ത്രിച്ചിരുന്നത് വൈസ്പ്രസിഡന്റായിരുന്നു. ഈ കാലയളവില് നടന്ന പല നിര്മ്മാണപ്രവര്ത്തനങ്ങളിലും അഴിമതി നടന്നതായി ഇപ്പോള് ആരോപണം ഉയര്ന്നിട്ടുണ്ട്. തെരഞ്ഞെടുപ്പ് ധാരണപ്രകാരം അവസാന ഒരു വര്ഷം വൈസ്പ്രസിഡന്റ് പദവി യുഡിഎഫ് ഘടകകക്ഷിയായ കേരളാ കോണ്ഗ്രസിന് അവകാശപ്പെട്ടതാണ്. ഈ ധാരണാപ്രകാരം വൈസ്പ്രസിഡന്റ് സ്ഥാനം തുടക്കത്തില് ഒഴിയാന് വിസമ്മതിച്ച എസ്. സുഭാഷ് കടുത്ത സമ്മര്ദ്ദത്തെ തുടര്ന്ന് പിന്നീട് രാജിവയ്ക്കുകയായിരുന്നു.
തുടര്ന്ന് കോണ്ഗ്രസിലെ കെ.കെ. ഡാനിയല് വൈസ്പ്രസിഡന്റായി. എന്നാല് പഞ്ചായത്ത് വികസന സ്റ്റാന്റിങ് കമ്മിറ്റി പദവി രാജിവയ്ക്കാതെയാണ് കെ.കെ. ഡാനിയല് വൈസ്പ്രസിഡന്റ് സ്ഥാനം ഏറ്റെടുത്തതെന്ന് ആരോപിച്ച് സുഭാഷിന്റെ നേതൃത്വത്തില് ഒരു സംഘം കോണ്ഗ്രസ് പ്രവര്ത്തകര് പ്രസിഡന്റിനെയും വൈസ്പ്രസിഡന്റിനെയും തടഞ്ഞുവയ്ക്കുകയുണ്ടായി. തുടര്ന്ന് പോലീസ് എത്തിയാണ് ഇവരെ മോചിപ്പിച്ചത്.
അന്നുമുതല് ഭരണകക്ഷി അംഗങ്ങള് രണ്ട് തട്ടിലാവുകയും ചേരിതിരിഞ്ഞ് പരസ്പരം ഏറ്റുമുട്ടുകയുമാണ്. ഇതുമൂലം പഞ്ചായത്തില് യാതൊരു വികസനപ്രവര്ത്തനങ്ങളും നടക്കുന്നില്ല. കക്കാകുന്ന് പബ്ലിക് മാര്ക്കറ്റിനോട് ചേര്ന്ന് ഷോപ്പിങ് കോംപ്ലക്സ് നിര്മ്മിക്കുവാനും മാര്ക്കറ്റിന്റെ അടിസ്ഥാനസൗകര്യങ്ങള് വികസിപ്പിക്കുന്നതിനുമായി ഒരു ബൃഹദ് പദ്ധതിക്കാണ് പഞ്ചായത്ത് രൂപം നല്കിയിരിക്കുന്നത്. അംഗങ്ങള്ക്കിടയിലെ തര്ക്കംമൂലം ആ പദ്ധതി ഇതുവരെ ആരംഭിച്ചിട്ടില്ല. ബിജെപിയുടെ നിരന്തര പ്രക്ഷോഭങ്ങളെ തുടര്ന്ന് മാര്ക്കറ്റിന്റെ ചുറ്റുമതില് നിര്മ്മാണം മാത്രമാണ് പൂര്ത്തീകരിച്ചത്. അതേപോലെ കുടിവെള്ള വിതരണത്തിനായി പദ്ധതി തയ്യാറാക്കി ജനങ്ങളെ കബളിപ്പിച്ചതല്ലാതെ അവ നടപ്പില് വരുത്തുവാന് പഞ്ചായത്ത് സമിതിയില് നിന്നും യാതൊരു നടപടിയും ഉണ്ടായിട്ടില്ല.
വഴിവിളക്കുകള് സ്ഥാപിക്കാനുള്ള ടെണ്ടറുകളെല്ലാം തന്നെ ഏതാണ്ട് പൂര്ണമായി തകര്ന്ന നിലയിലാണ്. പഞ്ചായത്തിന്റെ പല ബൃഹത്പദ്ധതികളുടെയും നിര്മ്മാണകരാറുകള് ഉദ്യോഗസ്ഥരുടെയും രാഷ്ട്രീയനേതാക്കളുടെയും ബിനാമികള്ക്ക് നല്കാന് നീക്കം നടന്നെങ്കിലും ബിജെപിയുടെ ശക്തമായ പ്രതിഷേധങ്ങളെ തുടര്ന്ന് അവ നിര്ത്തിവയ്ക്കുകയായിരുന്നു.
ഭരണസ്തംഭനത്തിനും അഴിമതിക്കുമെതിരെയുള്ള ജനകീയപ്രക്ഷോഭങ്ങള്ക്ക് ബിജെപിയാണ് നേതൃത്വം നല്കുന്നത്. ഇതിന്റെ ഭാഗമായി പാര്ട്ടി കഴിഞ്ഞമാസം പഞ്ചായത്തോഫീസ് ഉപരോധിച്ചിരുന്നു. അവിമതിക്കെതിരെ വിജിലന്സിനെ സമീപിക്കാന് ഒരുങ്ങുകയാണ് ബിജെപി.
