ജെക്കാര്ത്ത: യാത്രയ്ക്കിടെ കാണാതായ എയര് ഏഷ്യ വിമാനത്തില് സഞ്ചരിക്കേണ്ടിയിരുന്ന ഇന്തോനേഷ്യന് കുടുംബത്തിലെ പത്തുപേര് അദ്ഭുതകരമായി രക്ഷപ്പെട്ടു. വിമാനസമയം അറിയാതെ വൈകിയെത്തിയതു മൂലമാണ് ഈ കുടുംബം രക്ഷപ്പെട്ടത്.
ക്രിസ്ത്യാനവതി (36), അമ്മ, ഇളയ സഹോദരനും കുടുംബവും ആണ് ഈ വിമാനത്തില് സിംഗപ്പൂരില് നവവര്ഷ ആഘോഷിക്കാനായി പോകാനിരുന്നത്. സംഘത്തില് ആറു മുതിര്ന്നവരും നാല് കുട്ടികളുമാണ് ഉണ്ടായിരുന്നത്.
ഇവര് രാവിലെ 7.30ന് പോകേണ്ട എയര് ഏഷ്യ വിമാനത്തിലാണ് ടിക്കറ്റ് ബുക്കു ചെയ്തിരുന്നത്. എന്നാല് വിമാനക്കമ്പനിക്കാര് അതിനും രണ്ടു മണിക്കൂര് മുമ്പ് പോകേണ്ട വിമാനത്തിലേക്ക് ഇവരുടെ ടിക്കറ്റുകള് മാറ്റി നല്കി.
വിവരം ധരിപ്പിക്കാനായി ഡിസംബര് 15നും 16നും കമ്പനി അധികൃതര് വിളിച്ചെങ്കിലും ആ കോള് സ്വീകരിക്കാന് കഴിയാതിരുന്നതാണ് തങ്ങള് അദ്ഭുതകരമായ രക്ഷപ്പെടലിന് കാരണമെന്ന് ക്രിസ്ത്യാനാവതി പറഞ്ഞു.
7.30ന് പുറപ്പെടുന്ന വിമാനത്തില് പോകാനാണ് തങ്ങള് വിമാനത്താവളത്തിലെത്തിയത്. എന്നാല് തങ്ങളുടെ വിമാനം 5.30ന് പോയിക്കഴിഞ്ഞിരുന്നു. അപ്പോള് കുടുംബത്തിലെ എല്ലാവര്ക്കും വലിയ നിരാശയും അമര്ഷവുമുണ്ടായെന്ന് അവര് വ്യക്തമാക്കി.
തുടര്ന്ന് പുതിയ ടിക്കറ്റ് വിതരണം ചെയ്യാന് നടപടി സ്വീകരിക്കവെയാണ് മുമ്പേ പോയ വിമാനത്തിന്റെ ദുരന്തം അറിയുന്നത്. ഉടന് തന്നെ തങ്ങള് യാത്ര റദ്ദു ചെയ്തതായി അവര് പറഞ്ഞു. എത്രയും വേഗം വിമാനം കണ്ടെത്തട്ടെയെന്നും യാത്രക്കാര് എല്ലാവരും സുരക്ഷിതരായിരിക്കട്ടെയെന്നും പ്രാര്ഥിക്കുന്നതായി ക്രിസ്ത്യാനാവതി കൂട്ടിച്ചേര്ത്തു.
