സദാചാരഗുണ്ടായിസത്തേക്കാള് കേരളം ഇപ്പോള് ഭയക്കുന്നത് ഒരുവിഭാഗം ഞരമ്പുരോഗികള് കാണിക്കുന്ന ചുംബനസമരങ്ങളെയാണ്. കമിതാക്കളല്ലെങ്കില് പോലും ആണും പെണ്ണും കാണിക്കുന്ന തെറ്റുകള് ചൂണ്ടിക്കാട്ടാന് സമൂഹം ഭയക്കുന്നു. കാരണം നാളെ ചുംബനതൊഴിലാളികള് അവരുടെ കണ്മുന്നില് പടുകൂറ്റന് കിസ് ഓഫ് ലവ് സംഘടിപ്പിച്ചാലോ.
സദാചാരഗുണ്ടായിസത്തിന്റെ പേരില് പ്രതിഷേധഭാഗമായി തെരുവുകളിലും പൊതുസ്ഥലങ്ങളിലും നടക്കുന്ന ആഭാസവും വൈകൃതവും അഹന്തയും നിറഞ്ഞ ചുംബനസമരങ്ങള് പലപ്പോഴും പോലീസുകാരെ പോലും കാഴ്ചക്കാരാക്കിമാറ്റുന്നതാണ്.
കുപ്പിയില് നിന്നും തുറന്നുവിട്ട ഭൂതത്തെ പോലെയാണ് ഈ സമരമെന്ന് ആദ്യം ഇതിനെ അനുകൂലിച്ചിരുന്ന മാര്ക്സിസ്റ്റ് പാര്ട്ടിയും അതിന്റെ യുവജനസംഘടനയും തിരിച്ചറിഞ്ഞിരിക്കുന്നു. മൂല്യവത്തായ ഒരു സംസ്കാരം അവകാശപ്പെട്ടവരാണ് മലയാളികള്.
സാംസ്കാരിക ജീര്ണതകള് വച്ചുപൊറുപ്പിക്കാനാവാത്ത ഒരു നാടിന്റെ സ്പന്ദനം ഇത്തരത്തില് പാളുന്ന അവസരത്തില് അത് തിരിച്ചറിഞ്ഞ് പെരുമാറേണ്ടവര് കാട്ടിയ രാഷ്ട്രീയ നാടകത്തിന്റെ അനന്തരഫലമായി തെരുവുകള് തോറും ചുംബനസമരങ്ങള് കാട്ടുതീപോലെ പടരുന്നതാണ് കാണുന്നത്. വിമര്ശനത്തിന്റെ പേരില് പോലും ചുംബനക്കാരെ ലൈംഗികതൊഴിലാളികളെന്ന് വിശേഷിപ്പിക്കാനാവില്ല. കാരണം അവര് പോലും സ്വന്തം തൊഴിലിന് ഒളിവും മറയും ആവശ്യപ്പെടുന്നവരാണ്.
പാശ്ചാത്യനാടുകളിലെ രതിവൈകൃതങ്ങളും ശീലങ്ങളും അന്ധമായി അനുകരിക്കാന് വെമ്പിനില്ക്കുന്ന ഒരു തലമുറയുടെ നിയന്ത്രണം വിടലാണ് ഇതിന് പിന്നില് എന്നത് ഏറെ കുറെ വ്യക്തമാകുന്നു. സാമൂഹ്യ-സാംസ്കാരികതലങ്ങളില് നുഴഞ്ഞുകയറ്റത്തിന് ശ്രമിക്കുന്ന തീവ്രവാദസംഘടനകളുടെ സാന്നിധ്യവും ഇതിലുണ്ട്.
പത്രങ്ങളും ചാനലുകളും ചുംബനതൊഴിലാളികള്ക്ക് നല്കുന്ന പ്രാധാന്യം തലമുറകളുടെ നാശത്തിന് കൂടി വഴിതെളിക്കുന്നതാണെന്ന് പറയാതെ വയ്യ. ഇത്തരം ആഭാസങ്ങള് കണ്ടുവളരുന്ന ഇളംതലമുറ സ്വത്വം തിരിച്ചറിയാതെ മായാവലയത്തില് പെട്ടുപോകും. കേരളമാകെ ചുവന്ന തെരുവായി മാറുകയാകും ഇതിന്റെ പരിണിതഫലം. ഇത്തരം സമരങ്ങളുടെ വേലിയേറ്റം കേരളമെന്ന ദൈവത്തിന്റെ സ്വന്തം നാടിനെ സെക്സ് ടൂറിസ്റ്റ് കേന്ദ്രമായി മുദ്ര കുത്തപ്പെടുന്നതിലേക്കും നയിക്കും.
സമരക്കാര് വീണ്ടുവിചാരമില്ലാത്തവരാണെന്ന് ദിനംപ്രതി തെളിയിച്ചുകൊണ്ടിരിക്കുന്നു. പക്ഷേ മലയാളിസമൂഹത്തിന് തങ്ങളുടെ തലമുറയെ നേര്വഴിക്ക് കൊണ്ടുപോകണം. ഇതിനെ തുടര്ന്നും കണ്ടിരിക്കാനാവില്ല. ഇനിയുള്ള ഏക മറുപടി തെരുവിലിറങ്ങുകയാണ്; ചൂരലുമായി.
ചുംബനക്കാരെ നേരിടാന് ചൂരലിന് കഴിയും. പണ്ട് പള്ളിക്കൂടത്തില് പോയിട്ടുള്ള വികൃതിപിള്ളേര്ക്ക് അധ്യാപന് നേര്വഴി കാട്ടുന്നത് ഔഷധഗുണമുള്ള മുളയുടെ നാമ്പായ ചൂരല് ഉപയോഗിച്ചാണ്. നല്ല പോലെ പ്രഹരമേല്ക്കുന്നവന് ഒരിക്കലും വഴിതെറ്റി സഞ്ചരിക്കില്ല.
