യജമാനനും ഭൃത്യരുമെന്ന നില എല്‍ഡിഎഫില്‍ അനുവദിക്കില്ല

മണ്ണഞ്ചേരി: യജമാനനും ഭൃത്യരും എന്ന നില ഒരു കാരണവശാലും എല്‍ഡിഎഫില്‍ അനുവദിക്കില്ലെന്ന് സിപിഐ സംസ്ഥാന സെക്രട്ടറി പന്ന്യന്‍ രവീന്ദ്രന്‍. സിപിഐ വടക്കനാര്യാട് ലോക്കല്‍ കമ്മറ്റി ഓഫീസ് മന്ദിരം ഉദ്ഘാടനം ചെയ്യുകയായിരുന്നു അദ്ദേഹം. വിപ്ലവം പേരിനുമാത്രം പോര പ്രയോഗത്തിലും വരുത്തണം. സ്വന്തം വര്‍ഗത്തില്‍പ്പെട്ടവരെ അവര്‍തന്നെ കൊലപ്പെടുത്തുന്നത് രാഷ്‌ട്രീയ അന്ധതയാണ്. അതാണ് ആപ്രസ്ഥാനത്തിന്റെ പ്രശ്‌നമെന്നും സിപിഎമ്മിന്റെ പേര് പറയാതെ പന്ന്യന്‍ രവീന്ദ്രന്‍ ചൂണ്ടിക്കാട്ടി. 1957, 67, 80 കളിലെ ഭരണത്തെക്കുറിച്ച് പറയുന്നവര്‍ 70 മുതല്‍ 77 വരെ കേരളത്തില്‍ ഒരു ഭരണമുണ്ടായിരുന്ന കാര്യം വിസ്മരിക്കുന്നു. കേരളത്തിലിപ്പോള്‍ ഏറ്റവും കൂടതല്‍ പഴികേള്‍ക്കുന്ന പ്രസ്ഥാനം സിപിഐയാണ് അഴിമതിക്കെതിരെ ശക്തമായ നിലപാടെടുക്കുന്നതാണ് സി.പിഐയെ വളഞ്ഞിട്ട് അക്രമിക്കുന്നതിന് കാരണമെന്നും പന്ന്യന്‍ രവീന്ദ്രന്‍ പറഞ്ഞു. എ.എം. ഹനീഫ് അദ്ധ്യക്ഷതവഹിച്ചു.