താനാരാണെന്ന് അറിയാതെ കഴിയുന്നവരെ ഉദ്ധരിക്കണമെങ്കില് അവരുടെ തലത്തിലേക്കിറങ്ങിച്ചെല്ലുകതന്നെ വേണം. അവരുടെ മുന്നില് ജീവിച്ചു കാട്ടിക്കൊടുക്കണം. അവര്ക്കു കീര്ത്തനവും ധ്യാനവും സേവനവും എല്ലാം ആവശ്യമാണ്. അവരെ ഉദ്ധരിക്കുവാന് അമ്മ അനേകം വേഷങ്ങള് സ്വീകരിക്കുന്നു. ഈ വേഷങ്ങളെല്ലാം ലോകത്തിനു വേണ്ടിയാണ്.
ആശ്രമത്തില് വിമാനത്തിലും ട്രെയിനിലും കാറിലും ബസ്സിലും ബോട്ടിലും ആളുകള് വരാറുണ്ട്. പക്ഷേ, ”നീ ഏതു വാഹനത്തിലാണു വന്നതെന്ന്” അമ്മ ചോദിക്കാറില്ല. ”വിമാനത്തിലേ ഇവിടെ വരാവൂ” എന്ന് ആവശ്യപ്പെടാറില്ല. ഓരോരുത്തരും അവരുടെ കഴിവിനനുസരിച്ചുള്ള വഴി കണ്ടെത്തുന്നു. അതുപോലെ ആത്മസ്വരൂപത്തെ അറിയുവാനും അനേകം മാര്ഗ്ഗങ്ങളുണ്ട്.
ഓരോരുത്തരുടെയും സംസ്കാരത്തിനനുസരിച്ചുള്ള മാര്ഗ്ഗമാണ് അമ്മ നിര്ദ്ദേശിക്കുന്നത്. കണക്കിനു മിടുക്കുള്ളവര് വേണം കോളേജില് ഫസ്റ്റ്ഗ്രൂപ്പ് എടുക്കേണ്ടത്. കാരണം, മറ്റുള്ളവരെക്കാള് വേഗത്തില് അതവര്ക്കു പഠിക്കുവാന് കഴിയും. അതില്വേഗം മുന്നേറുവാന് സാധിക്കും. ശാസ്ത്രഗ്രന്ഥങ്ങള് വായിച്ചു മനസ്സിലാക്കാന് വേണ്ടത്ര ബുദ്ധിയുള്ളവര്ക്കു ബുദ്ധിതലത്തില് നേതി നേതി എന്നു മനനം ചെയ്തു മുന്നോട്ടുപോകാന് കഴിഞ്ഞെന്നിരിക്കും.
