പുഷ്കരത്തിന് വായു, ആകാശം, അന്തരീക്ഷം എന്നീ അര്ത്ഥങ്ങളുമുണ്ട്. ഇവ മൂന്നും സര്വവ്യാപ്തമായ പ്രതിഭാസങ്ങളാണ്. പ്രപഞ്ചമായി വ്യാപിച്ച ഭഗവാന്റെ കണ്ണായി ഇവയില് ഓരോന്നിനെയും കരുതാം. പ്രപഞ്ചത്തില് സംഭവിക്കുന്നതും സംഭവിച്ചതും സംഭവിക്കാനുള്ളതുമെല്ലാം കണ്ടറിയാന് ഭഗവാന്റെ ഈ കണ്ണുകള് ഉപയോഗിക്കുന്നു.
പുഷ്കരഃ എന്ന പദത്തിന് സൂര്യന് എന്നും അര്ത്ഥമുണ്ട്. പ്രപഞ്ചത്തിനാവശ്യമായ ഊര്ജ്ജം വെളിച്ചമായും താപമായും ജ്ഞാനമായും പ്രസരിപ്പിക്കാന് ഗുരുവായൂരപ്പന് സ്വീകരിച്ച ഒരു രൂപമാണ് സൂര്യന് എന്ന കണ്ണ്.
പുഷ്കരഃ എന്ന പദത്തിന് ശിവന് എന്നും അര്ത്ഥമുണ്ട്. മംഗളകാരിയായ ശിവനും സംഹാരമൂര്ത്തിയായ ശിവനും ഗുരുവായൂരപ്പന്റെ രണ്ടു കണ്ണുകളാണെന്നും വ്യാഖ്യാനം.
976. യോഗിഹൃത്കമലാലയഃ- യോഗിമാരുടെ ഹൃദയകമലത്തെ ആലയമാക്കിയവന്. ചിത്തവൃത്തിനിരോധത്തിലൂടെ ആത്മസാക്ഷാത്കാരം നേടലാണു യോഗം. അതിനു പലരീതികള് ഭഗവാന് തന്നെ ആചാര്യന്മാരിലൂടെ പ്രചരിപ്പിച്ചിട്ടുണ്ട്. രീതി ഏതായാലും യോഗം അനുഷ്ഠിക്കുന്നയാളെ യോഗി എന്നുപറയും. യോഗമാര്ഗ്ഗത്തില് അഭ്യാസം ചെയ്യുന്നവര്ക്ക് പല തരത്തിലുള്ള വിഘ്നങ്ങളുണ്ടാകാം. അവയെ നിവാരണം ചെയ്ത് യോഗസിദ്ധി നല്കാനായി ഭഗവാന് യോഗിയുടെ ഹൃദയത്തില് കുടികൊണ്ട് മാര്ഗ്ഗനിര്ദ്ദേശനം നല്കും. യോഗിയുടെ ഹൃദയത്തെ ഭഗവാന് ഇരിക്കാന് യോഗ്യമായ കമലമായി രൂപണം ചെയ്ത് യോഗി ഹൃത്കമലം എന്നു പ്രയോഗം. അതില് കുടികൊള്ളുന്നവന്
977. രേണുകാതനയോ രാമഃ- രേണുകാദേവിയുടെ മകനായ രാമന്, പരശുരാമന്. വിഷ്ണുഭഗവാന്റെ ദശാവതാരങ്ങളില് പ്രധാനപ്പെട്ട മൂന്നെണ്ണം രാമന് എന്ന പേരോടെയാണ്. കൗസല്യതനയനായ രാമനില്നിന്നും രോഹിണീതനയനായ രാമനില് നിന്നും വേറിട്ടറിയാന് രേണുകാതനയന് എന്ന പ്രയോഗം. ജമദഗ്നിമഹര്ഷിയുടെയും ഭാര്യയായ രേണുകാദേവിയുടെയും ഇളയമകനായി രാമന് എന്ന പേരോടെ ഭഗവാന് അവതരിച്ചു. ബാഹുബലംകൊണ്ടു മദിച്ച് ലോകത്തിനു ശല്യമായിത്തീര്ന്ന ക്ഷത്രിയവര്ഗ്ഗത്തെ നശിപ്പിക്കാനായിരുന്നു ഈ അവതാരം. ശ്രീപരമേശ്വരന്റെ ശിഷ്യനായി പരശു എന്ന ദിവ്യായുധം നേടി പരശുരാമനായി.
അച്ഛന്റെ ആജ്ഞപ്രകാരം പെറ്റമ്മയെയും ജ്യേഷ്ഠന്മാരെയും വധിച്ചുകൊണ്ടാണ് പരശുധരന്റെ വധയജ്ഞം ആരംഭിച്ചത്. പിതാവിന്റെ അനുഗ്രഹംകൊണ്ട് അവര്ക്കു ജീവന് കൊടുത്തുവെങ്കിലും വധിച്ചു എന്ന കീര്ത്തിയോ ദുഷ്കീര്ത്തിയോ സമ്പാദിച്ചു. കാര്ത്തവീര്യാര്ജ്ജുനനെയും അദ്ദേഹത്തിന്റെ പുത്രന്മാരെയും തുടര്ന്നു ക്ഷത്രിയവംശത്തെയും ഇരുപത്തി ഒന്നു യുദ്ധങ്ങളില് നശിപ്പിച്ചു. വധിച്ച ക്ഷത്രിയന്മാരുടെ രക്തംകൊണ്ടു കുരുക്ഷേത്രത്തില് അഞ്ചു ചോരക്കളങ്ങളുണ്ടാക്കി അവയില് പിതൃതര്പ്പണം ചെയ്തു. ക്ഷത്രിയരില്നിന്നു കൈവശപ്പെടുത്തിയ രാജ്യങ്ങള് ദാനം ചെയ്ത് നിസ്വനായി സന്ന്യാസവൃത്തി സ്വീകരിച്ചു.
രാമാവതാരകാലത്ത് വൈഷ്ണവ ധനുസ്സിനോടൊപ്പം വൈഷ്ണവതേജസ്സും ദശരഥപുത്രനായ രാമനിലേയ്ക്കു പകര്ന്നുകൊടത്തു. തുടര്ന്നുള്ള ജീവിതം തപസ്വിയായി കഴിച്ചു. കൃഷ്ണാവതാരകാലത്ത് ദ്രോണരെയും കര്ണ്ണനെയും ആയുധവിദ്യ പഠിപ്പിച്ചതു പരശുരാമനായിരുന്നു. സമുദ്രത്തില് നിന്നുദ്ധരിച്ചു കേരളം സൃഷ്ടിച്ചതും പരശുരാമനായിരുന്നുവെന്ന് കഥ പ്രചാരത്തിലുണ്ടെങ്കിലും പുരാണങ്ങളില് ആ സംഭവം കാണുന്നില്ല. നാരായണീയം 36-ാം ദശകം പരശുരാമാവതാരത്തിലെ പ്രധാന സംഭവങ്ങള് സംഗ്രഹിച്ചിട്ടുള്ളതു വായിക്കുക.
978. കാര്ത്തവീര്യകുലാന്തകഃ- കാര്ത്തവീര്യാര്ജ്ജുനന്റെ വംശത്തെ നശിപ്പിച്ചവന്. ഹേഹയരാജാവായിരുന്ന കൃതവീരന്റെ മകനായിരുന്നു അര്ജ്ജുനന്. പിതാവിന്റെ പേരിനോടു ചേര്ത്ത് കാര്ത്തവീര്യാര്ജ്ജുനന് പ്രസിദ്ധനായി. ഭഗവാന്റെ അംശാവതാരമായ ദത്താശ്രേയന്റെ അനുഗ്രഹംകൊണ്ട് ആയിരം കൈകളും അധൃഷ്യമായ ബലവീര്യങ്ങളും ഭഗവാന്റെ കൈകൊണ്ടുതന്നെ മരണവും വരമായി നേടി. മറ്റു രാജാക്കന്മാരെയെല്ലാം സാമന്തരാക്കി. ലോകകണ്ടകനായി വളര്ന്ന രാവണനെ പിടിച്ചുകെട്ടി കാരാഗൃഹത്തിലടച്ചു.
…. തുടരും
