കോട്ടയം: മഹാത്മാ കോളനിയിലെ എല്ലാ കുടുംബങ്ങള്ക്കും പട്ടയവും ബിപിഎല് കാര്ഡും അടിയന്തിരമായി അനുവദിക്കുമെന്ന് മുഖ്യമന്ത്രി ഉമ്മന് ചാണ്ടി പറഞ്ഞു. അയര്ക്കുന്നം പഞ്ചായത്തിലെ അമയന്നൂര് മഹാത്മാ കോളനി സന്ദര്ശന വേളയിലാണ് അദ്ദേഹം ഇക്കാര്യം അറിയിച്ചത്. പഞ്ചായത്തുവക രണ്ടേക്കര് ഭൂമിയിലാണ് 37 കുടുംബങ്ങളുള്ള കോളനി സ്ഥിതി ചെയ്യുന്നത്. ഇത് പുറമ്പോക്കായി റവന്യൂ വകുപ്പിന് കൈമാറി അടിയന്തിരമായി നിവാസികള്ക്ക് പട്ടയം നല്കും. മിച്ചമുള്ള ഭൂമിയും ഗുണഭോക്താക്കളെ കണ്ടെത്തി വിതരണം ചെയ്യും. വര്ഷത്തില് മൂന്നു തവണയെങ്കിലും വെള്ളപ്പൊക്കമുണ്ടാകുന്നതാണ് കോളനിക്കാര് അനുഭവിക്കുന്ന പ്രധാന ദുരിതം. കോളനിക്കു സമീപമുള്ള തോട് അനധികൃത കയ്യേറ്റം കൊണ്ടും വീതി കുറഞ്ഞതും കോളനിക്കു പുറകിലുള്ള മതില്ക്കെട്ടിന് വെള്ളം തടഞ്ഞു നിര്ത്താനുള്ള ബലമില്ലാത്തതുമാണ് കോളനിയും പരിസരവും വെള്ളക്കെട്ടാകുന്നതെന്ന് നിവാസികള് മുഖ്യമന്ത്രിയെ അറിയിച്ചു. തോടിന് വീതികൂട്ടാനും കോളനിയുടെ മതില് ബലപ്പെടുത്താനും അടിയന്തിര നടപടികള് സ്വീകരിക്കാന് മുഖ്യമന്ത്രി ജില്ലാ കളക്ടര് അജിത് കുമാറിന് നിര്ദ്ദേശം നല്കി. വീടും സ്ഥലവും ബലപ്പെടുത്താനുള്ള മാര്ഗങ്ങള് വാര്ഡ് മെമ്പറും പഞ്ചായത്ത് പ്രസിഡന്റും ഇറിഗേഷന്, റവന്യൂ, കൃഷി, ഹൗസിങ് വകുപ്പുകളിലെ ഉദ്യോഗസ്ഥരും ഉള്പ്പെടുന്ന കമ്മറ്റി പഠിച്ച് ഒരാഴ്ചക്കുള്ളില് റിപ്പോര്ട്ട് നല്കണം.
കോളനിയിലെ കുടിവെള്ളപ്രശ്നത്തിനും പരിഹാരമുണ്ടാകും. 900 മീറ്റര് നീളത്തില് രണ്ടിഞ്ചു കനമുള്ള പൈപ്പ്ലൈന് സ്ഥാപിച്ച് അഞ്ച് പൊതു ടാപ്പുകള് വഴി കോളനിയില് കുടിവെള്ളമെത്തിക്കും. കോളനിയിലെ സാംസ്കാരിക കേന്ദ്രത്തിനും അംഗന്വാടിക്കും വൈദ്യുതി കണക്ഷന് നല്കാന് കെഎസ്ഇബി ഉദ്യോഗസ്ഥര്ക്കും ഇതിനായി അപേക്ഷ നല്കാന് പഞ്ചായത്ത് സെക്രട്ടറിക്കും നിര്ദ്ദേശം നല്കി. വയറിങ്ങിനുള്ള തുക എംഎല്എ ഫണ്ടില് നിന്ന് ലഭ്യമാക്കും.
18 എസ്.റ്റി കുടുംബങ്ങളുള്ള കോളനിയില് രണ്ടു കുടുംബങ്ങള്ക്കു മാത്രമേ എസ്. റ്റി സര്ട്ടിഫിക്കറ്റ് ലഭിച്ചിട്ടുള്ളു. സര്ട്ടിഫിക്കറ്റ് ലഭിച്ചിട്ടില്ലാത്ത 16 കുടുംബങ്ങള്ക്ക് സര്ട്ടിഫിക്കറ്റുള്ള രണ്ടു കുടുംബങ്ങളുമായുള്ള രക്തബന്ധം രേഖാമൂലം സ്ഥാപിച്ചു കിട്ടുന്നതിന് വിശദമായ അന്വേഷണം നടത്തി റിപ്പോര്ട്ട് നല്കാന് കോട്ടയം തഹസില്ദാര്ക്ക് നിര്ദ്ദേശം നല്കി. ഈ റിപ്പോര്ട്ട് പൂര്വികരെപ്പറ്റി അന്യേഷിച്ച് ജാതിസംബന്ധമായ കാര്യങ്ങള്ക്ക് ഔദ്യോഗിക സ്ഥിരീകരണം നടത്തുന്ന കിര്ത്താഡ്സിനെ (ഗകഞഠഒഅഉട) മുഖ്യമന്ത്രി നേരിട്ട് ധരിപ്പിക്കും. റിപ്പോര്ട്ടും തുടര്നടപടികളും പരിശോധിച്ച് അന്തിമതീരുമാനം എടുക്കുന്നതിന് ഒക്ടോ 20ന് വൈകിട്ട് അഞ്ചിന് കളക്ട്രേറ്റില് യോഗം ചേരുമെന്നും മുഖ്യമന്ത്രി അറിയിച്ചു. ജില്ലാ കളക്ടര് അജിത് കുമാര്, ജില്ലാ പഞ്ചായത്ത് വൈസ്പ്രസിഡന്റ് അഡ്വ. ഫില്സണ് മാത്യു, പള്ളം ബ്ളോക്ക് പഞ്ചായത്ത് പ്രസിഡന്റ് ഷെര്ലി രവീന്ദ്രന്, അയര്ക്കുന്നം ഗ്രാമ പഞ്ചായത്ത് പ്രസിഡന്റ് ജോണിക്കുട്ടി മാമ്മന്, ജില്ലാ പഞ്ചായത്തംഗം എന്.ജെ. പ്രസാദ്, വാര്ഡ് മെമ്പര് മോനി മോള് ജയമോന്, വിവിധ ഉദ്യോഗസ്ഥര് എന്നിവര് പങ്കെടുത്തു.
