മണര്‍കാട്: മണര്‍കാട് ഭഗവതീക്ഷേത്രത്തില്‍ നവരാത്രിയോടനുബന്ധിച്ച് ലക്ഷാര്‍ച്ചനയും ലക്ഷദീപവും നടക്കും. 28 മുതല്‍ 30 വരെ ലക്ഷാര്‍ച്ചനയും ഒക്‌ടോബര്‍ ഒന്നിന് രാവിലെ ദ്രവ്യകലശാഭിഷേകവും നടക്കും. ദുര്‍ഗ്ഗാഷ്ടമി ദിവസമായ ഒക്‌ടോബര്‍ ഒന്നിന് വൈകിട്ട് ദീപാരാധനയോടനുബന്ധിച്ച് ലക്ഷദീപവും നടക്കും. ക്ഷേത്രം തന്ത്രി കുരുപ്പക്കാട്ടില്ലത്ത് നാരായണന്‍ നമ്പൂതിരി മുഖ്യകാര്‍മ്മികത്വം വഹിക്കും. രാവിലെ 6 മുതല്‍ 11 വരെയും വൈകിട്ട് 5 മുതല്‍ 6.30 വരെയുമാണ് ലക്ഷാര്‍ച്ചന. എല്ലാ ദിവസങ്ങളിലും വൈകിട്ട് അത്താഴപ്പൂജയ്‌ക്കുമുമ്പായി വാദ്യമേളങ്ങളുടെ അകമ്പടിയോടെ എഴുന്നെള്ളിപ്പും അഭിഷേകവും നടക്കും.
ലക്ഷദീപം തെളിയിക്കല്‍ ചടങ്ങിന് ക്ഷേത്ര മതില്‍ക്കകത്തും മൈതാനത്തും വിപുലമായ ക്രമീകരണങ്ങള്‍ ഏര്‍പ്പെടുത്തും. ലക്ഷദീപ പ്രോജ്വലന ഉദ്ഘാടന ചടങ്ങില്‍ വിവിധ തുറകളില്‍പ്പെട്ട മഹദ് വ്യക്തികള്‍ പങ്കെടുക്കും. മഹാനവമി, വിജയദശമി ദിവസങ്ങളില്‍ നവരാത്രി മണ്ഡപത്തില്‍ സംഗീതാരാധനയും കലോപാസനയും നടക്കും. സംഗീതാരാധനയിലും കലോപാസനയിലും പങ്കെടുക്കുന്നവര്‍ ദേവസ്വത്തില്‍ മുന്‍കൂട്ടി അറിയിക്കണം. ചടങ്ങുകളുടെ വിജയകരമായ നടത്തിപ്പിന് ദേവസ്വം ഭരണസമിതി സെക്രട്ടറി എ.പി. അനില്‍കുമാര്‍ ചെയര്‍മാനായും, ബിജികുമാര്‍ കൊച്ചുപറമ്പില്‍ ജനറല്‍ കണ്‍വീനറായും സ്വാഗതസംഘം രൂപീകരിച്ചു.
