മുക്കൂട്ടുതറ: ഇടഞ്ഞതിനെ തുടര്ന്ന് ശാന്തനായ ആനയെ ക്രൂരമായി മര്ദ്ദിച്ചവരെ നാട്ടുകാര് തടഞ്ഞുവച്ചു. എരുമേലി മുക്കൂട്ടുതറ വെണ്കുറിഞ്ഞി റോഡിലാണ് സംഭവം.
കഴിഞ്ഞ ദിവസങ്ങളില് രണ്ടു പ്രാവശ്യമായി ഇടഞ്ഞ ആനയെ ഇന്നലെ വളരം കഷ്ടപ്പെട്ടാണ് തളച്ചത്. ചങ്ങലയും വടവും ഉപയോഗിച്ച് കെട്ടിയ ആനയെ അടിച്ചു ഇരുത്തിയതിനുശേഷവും മര്ദ്ദിക്കുകയായിരുന്നു. രാത്രി 10മണിയോടെ ആനയുടെ നിലവിളികേട്ട് നാട്ടുകാരെത്തിയപ്പോഴാണ് ഇടഞ്ഞ ആനയെ ഒരു സംഘം ആളുകള് ക്രൂരമായി മര്ദ്ദിക്കുന്നത് കണ്ടത്.
പട്ടികയുടെ അഗ്രഭാഗത്ത് നട്ട് ബോള്ട്ട് വച്ച് കമ്പികൊണ്ട് കെട്ടിവച്ചതിനുശേഷം മര്ദ്ദിക്കുകയായിരുന്നുവെന്ന് നാട്ടുകാര് പറഞ്ഞു. എന്നാല് ആനയെ മര്ദ്ദിക്കാനെത്തിയ പാപ്പാന്മാരുടെകൂടെ നാട്ടുകാരില് ചിലരും മദ്യപിച്ചെത്തി ആനയെ മര്ദ്ദിക്കാന് സഹായിച്ചുവെന്നും പറയുന്നു. ഇടഞ്ഞ ആനയെ രാവിലെ കൊണ്ടുപോയാല് മതിയെന്ന പോലീസിന്റെ നിര്ദ്ദേശമുണ്ടായിരുന്നുവെങ്കിലും കടുത്ത മര്ദ്ദനത്തിനൊടുവില് രാത്രിതന്നെ ആനയെ ഇത്തിത്താനത്തേക്ക് കൊണ്ടുപോകുകയും ചെയ്തു.
