വിനായകോ ലംബോദരഃ ഹേരം ബോ വിഘ്നനാശകഃ
ഏകദന്തോ മഹാകായഃ സിദ്ധിബുദ്ധിപ്രദായകഃ
766: വിനായകഃ വിനായകന്. ഗണപതിയുടെ നാമമായി പ്രസിദ്ധം. വിശിഷ്ടനായ നായകന്, നായകനായി മറ്റാരുമില്ലാത്ത സ്വതന്ത്രന്, ലോകത്തെ വിനയിപ്പിക്കുന്നവന്, പഠിപ്പിക്കുന്നവന് എന്നിങ്ങനെ ആചാര്യന്മാര് ഈ നാമത്തെ വ്യാഖ്യാനിക്കുന്നു. ശിവശക്തികളുടെ ചൈതന്യം ഏകീഭവിച്ചുണ്ടായ വിനായകനെ പ്രീതിപ്പെടുത്താതെ ആരംഭിക്കുന്ന പ്രവര്ത്തനങ്ങള് വിജയിക്കുകയില്ലെന്നു വിശ്വാസം. (ഇതുതൊട്ടുള്ള ഏഴുനാമങ്ങള് ഗുരുവായൂരപ്പനെ ഗണേശന്റെ രൂപത്തില് സ്തുതിക്കുന്നു)
767: ലംബോദരഃ തൂങ്ങിക്കിടക്കുന്ന വയറുള്ളവന് എന്നു പദാര്ത്ഥം. സഹോദരനോടു മത്സരിച്ച് അമ്മയുടെ മുലപ്പാല് മുഴുവന് കുടിക്കാന് ശ്രമിച്ച ഗണപതി കുടവയറനാണെന്നും അതുകൊണ്ട് പിതാവായ ശംഭു ലംബോദരന് എന്നു പേരിട്ടു എന്നും ബ്രഹ്മാണ്ഡപുരാണം.
768: ഹേരംബഃ ഹേരംബന്. ”ഹേ ശിവേ രംബതി ഇതി ഹേരംബഃ എന്ന് ആചാര്യന്മാര് ഈ പദത്തെ നിര്വഹിക്കുന്നു. ശിവന്റെ അടുത്തിരുന്നു ശബ്ദിക്കുന്നവന്, ശിവനോടുപോലും ശബ്ദമുയര്ത്തി തര്ക്കിക്കുന്നവന്. ശിവന്റെ മടിയിലിരുന്നു കളിച്ചു ശബ്ദമുണ്ടാക്കുന്നവന് എന്നിങ്ങനെ വ്യാഖ്യാനിച്ചു കാണുന്നു.
769: വിഘ്നനാശകഃ തടസ്സങ്ങളെ നശിപ്പിക്കുന്നവന്. ഏതുകാര്യം ആരംഭിക്കുമ്പോഴും തടസ്സങ്ങളുണ്ടാകാതിരിക്കാന് വിഘ്നേശ്വരനെ പ്രീതിപ്പെടുത്തുന്നത് ഭഗ വാന് വിഘ്നനാശകനായതുകൊണ്ടാണ്.
770: ഏകദന്തഃ ഒറ്റക്കൊമ്പന്. ഗജാനനായ വിനായകന്റെ രണ്ടു കൊമ്പുകളിലൊന്ന് പരശുരാമനുമായുണ്ടായ മത്സരത്തില് മുറിഞ്ഞുപോയി. അങ്ങനെ ഭഗവാന് ഏകദന്തനായി.
771: മഹാകായഃ വലിയ ശരീരമുള്ളവന്. ആനത്തലയുള്ള വിനായകന്റെ ശരീരം ആനയുടെ ആകൃതിയല്ലെങ്കിലും വലിപ്പമുള്ളതാണ്. ഈ പ്രപഞ്ചം തന്നെയാണു വിനായകന്റെ ശരീരമെന്നും അഭിപ്രായമുണ്ട്
.
772: സിദ്ധിബുദ്ധി പ്രദായകഃ സിദ്ധിയും ബുദ്ധിയും പ്രദാനം ചെയ്യുന്നവന്. ഗണേശനെ ആരാധിക്കുന്നവര്ക്ക് ബുദ്ധി സാമര്ത്ഥ്യവും കാര്യസിദ്ധിയുമുണ്ടാകും. ബുദ്ധിയും സിദ്ധിയും ഗണേശന്റെ രണ്ടു പത്നിമാരായി ഭഗവാന്റെ രണ്ടുവശത്തും സേവിച്ചുനില്ക്കുന്ന രീതിയില് സങ്കല്പിക്കാറുണ്ട്.
(തുടരും)
