സുബ്രഹ്മണ്യപ്രീതികരമായ ഈ വ്രതം അനുഷ്ഠിക്കുന്നവര് ഇക്കാലത്ത് ധാരാളമുണ്ട്. ഷഷ്ഠിവ്രതത്തിനു പിന്നിലുള്ള കഥ ഇപ്രകാരമാണ്. ഒരിക്കല് ശൂരപത്മാസുരനും സുബ്രഹ്മണ്യനും തമ്മില് ഘോരമായ ഒരു യുദ്ധമുണ്ടായി. മായാശക്തികൊണ്ട് അസുരന് തന്നെയും സുബ്രഹ്മണ്യസ്വാമിയെയും ദേവകള്ക്കും മറ്റുളളവര്ക്കും അദൃശ്യനാക്കി. ഭഗവാനെ കാണാതെ വിഷമിച്ച ശ്രീപാര്വതിയും ദേവഗണങ്ങളും അന്നപാനാദികള് ഉപേക്ഷിച്ച് വ്രതമനുഷ്ഠിച്ചു. തുലാമാസത്തിലെണ ഷഷ്ഠിനാളില് ഭഗവാന് ശൂരപത്മാസുരനെ നിഗ്രഹിച്ചു. അതോടെ ഏവര്ക്കും സുബ്രഹ്മണ്യസ്വാമിയെ കാണായി. ശത്രു നശിച്ചതായി കണ്ട ഏവരും ഷഷ്ഠിനാളില് ഉച്ചക്ക് വ്രതമവസാനിപ്പിച്ച് മൃഷ്ടാന്നം ഭുജിച്ചു. മറ്റൊരു കഥയും ഷഷ്ഠിവ്രതവുമായി ബന്ധപ്പെട്ട പ്രചാരത്തിലുണ്ട്. പ്രണവത്തിന്റെ അര്ത്ഥം പറഞ്ഞുതരണമെന്നാവശ്യപ്പെട്ട് സുബ്രഹ്മണ്യന് ഒരിക്കല് ഹംസവാഹിയായ ബ്രഹ്മാവിനെ തടഞ്ഞുനിര്ത്തി. ഞാന് ബ്രഹ്മമാകുന്നു എന്ന ബ്രഹ്മാവിന്റെ മറുപടിയില് തൃപ്തനാകാതെ കുമാരന് കയറുകൊണ്ട് ബ്രഹ്മാവിനെ വരിഞ്ഞുകെട്ടി. ഒടുവില് ശ്രീപരമേശ്വരന് തന്നെ കുമാരനെ ആശ്വസിപ്പിക്കുകയും കാര്യങ്ങള് വിശദീകരിക്കുകയും ചെയ്തു. തെറ്റു മനസ്സിലാക്കിയ സുബ്രഹ്മണ്യന് പ്രായശ്ചിത്തമെന്നോണം ഒരു സര്പ്പത്തിന്റെ വേഷം ധരിച്ചു. പുത്രന്റെ വൈരുപ്യം തീര്ക്കാന് പാര്വതി ശ്രീപരമേശ്വരന്റെ ഉപദേശപ്രകാരം ഷഷ്ഠിവ്രതം അനുഷ്ഠിക്കുകയും ഫലപ്രാപ്തിയിലെത്തുകയും ചെയ്തു. ഒന്പതു വര്ഷങ്ങള്കൊണ്ട് ശ്രീപാര്വതി 108 ഷഷ്ഠിവ്രതം അനുഷ്ഠിച്ചു എന്നാണ് വിശ്വാസം.
സൂരേ്യാദയാല്പ്പരം ആറുനാഴിക ഷഷ്ഠി ഉള്ള ദിവസമാണ് വ്രതമനുഷ്ഠിക്കേണ്ടത്. വെളുത്ത പക്ഷത്തിലെ പഞ്ചമിനാള് ഒരുനേരം മാത്രം ഭക്ഷണം കഴിച്ച് സുബ്രഹ്മണ്യഭജനവുമായി കഴിയണം. ഷഷ്ഠിനാളില് പ്രാതസ്നാനാന്തരം സുബ്രഹ്മണ്യ ക്ഷേത്രദര്ശനം, സുബ്രഹ്മണ്യപൂജ മുതലായവയ്ക്കുശേഷം ഉച്ചയ്ക്ക് പാരണ കഴിക്കാം. ഉദ്ദിഷ്ടകാര്യസിദ്ധിക്ക് വിധിപ്രകാരമുള്ള ഷഷ്ഠിവ്രതാനുഷ്ഠാനം അതീവ ഫലപ്രദമാണെന്നാണ് അനുഭവം. സന്താനസൗഖ്യം, സര്പ്പദോഷശാന്തി, ത്വക് രോഗശാന്തി ആദിയായവയ്ക്കും ഈ വ്രതം അനുഷ്ഠിക്കാറുണ്ട്. വൃശ്ചികമാസത്തില് ആരംഭിച്ച് തുലാമാസത്തില് അവസാനിക്കുന്ന വിധത്തിലും ഒന്പതു വര്ഷങ്ങള്കൊണ്ട് 108 ഷഷ്ഠി എന്ന നിലയിലും വ്രതമനുഷ്ഠിക്കാറുണ്ട്. ഒന്നാം സംവല്സരത്തില് പാല്പ്പായസവും രണ്ടാം സംവത്സരത്തില് ശര്ക്കര പായസവും മൂന്നാം സംവത്സരത്തില് വെള്ളനിവേദ്യവും നാലാം സംവത്സരത്തില് അപ്പവും അഞ്ചാം സംവത്സരത്തില് മോദകവും ആറാം സംവത്സരത്തില് പശുവിന്പാലും ഏഴാം സംവത്സരത്തില് ഇളനീരും എട്ടാം സംവത്സരത്തില് പാനകവും ഒന്പതാം സംവത്സരത്തില് ഏഴുമണി കുരുമുളകും എന്നിങ്ങനെയാണ് പ്രസ്തുത വ്രതവിധി. അമാവാസി മുതല് ഷഷ്ഠിവരെയുള്ള ദിവസങ്ങളില് തുടര്ച്ചയായി വ്രതമനുഷ്ഠിച്ച് വിധിപ്രകാരമുള്ള പദാര്ത്ഥങ്ങള് മാത്രം ഭക്ഷിച്ച് സുബ്രഹ്മണ്യക്ഷേത്രത്തില്തന്നെ ആ ദിവസങ്ങളില് താമസിച്ച് അനുഷ്ഠിക്കുന്ന കഠിന ഷഷ്ഠിയും ചില ഭക്തജനങ്ങള് നോക്കാറുണ്ട്. ജാതകത്തില് ചൊവ്വാദോഷമുള്ളവര് ഷഷ്ഠിവ്രതമനുഷ്ഠിക്കുന്നത് അത്യധികം ഫലപ്രദമായിരിക്കും
. -ഡോ.കെ. ബാലകൃഷ്ണവാര്യര്
