കോട്ടയം: സാമൂഹ്യ മാറ്റം പൈതൃകത്തിന്റെ വീണ്ടെടുപ്പിലൂടെ എന്ന സന്ദേശവുമായി അമ്പാടിക്കണ്ണന്റെ ജന്മദിനം ആഘോഷിക്കുവാന്‍ നാടു നഗരവും ഒരുങ്ങി. ബാലഗോകുലം ബാലദിനമായി ആഘോഷിക്കുന്ന അഷ്ടമിരോഹിണിയെ വരവേല്‍ക്കുവാന്‍ വിപുലമായ ഒരുക്കങ്ങളാണ് വിവിധ ഹൈന്ദവ സംഘടനകളുടെ സഹകരണത്തോടെ ഒരുക്കിയിരിക്കുന്നത്. കോട്ടയം ഇടുക്കി റവന്യൂ ജില്ലകള്‍ ഉള്‍പ്പെട്ട കോട്ടയം മേഖലയില്‍ 250 ആഘോഷങ്ങളിലായി 900 ശോഭായാത്രകള്‍ നടക്കുമെന്ന് ബാലഗോകുലം കോട്ടയം മേഖലാ കാര്യദര്‍ശി ബിജു കൊല്ലപ്പള്ളിയും മേഖലാ അദ്ധ്യക്ഷന്‍ വി.എസ്. മധുസൂദനനും അറിയിച്ചു.
സപ്തംബര്‍ 9ന് 1300 സ്ഥലങ്ങളില്‍ പതാക ഉയര്‍ത്തിക്കൊണ്ട് തുടക്കം കുറിച്ച ആഘോഷപരിപാടികളില്‍ ഗോപൂജ, വൃക്ഷപൂജ, നദീവന്ദനം, സാംസ്‌കാരിക സമ്മേളനം, ചിത്രരചനാ മത്സരം തുടങ്ങി വിവിധങ്ങളായ പരിപാടികള്‍ ഇതിനോടകം നടന്നുകഴിഞ്ഞു. കോട്ടയത്തു നടക്കുന്ന ശോഭായാത്ര സംഗമം യോഗക്ഷേമസഭ സംസ്ഥാന പ്രസിഡന്റ് അക്കീരമണ്‍ കാളിദാസ ഭട്ടതിരിപ്പാട് ഉദ്ഘാടനം ചെയ്യും. ബാലഗോകുലം സംസ്ഥാന ഉപാദ്ധ്യക്ഷന്‍ ഡി. നാരായണ ശര്‍മ്മ ശ്രീകൃഷ്ണജയന്തി സന്ദേശം നല്‍കും. സ്വാഗതസംഘം അദ്ധ്യക്ഷന്‍ കെ.വി. വിശ്വനാഥന്‍ കുന്നത്തുകളത്തില്‍, വിഭാഗ് സംഘചാലക് എം.എസ്. പത്മനാഭന്‍, ജില്ലാ അദ്ധ്യക്ഷന്‍ ഡോ. കൃഷ്ണന്‍ നമ്പൂതിരി തുടങ്ങിയവര്‍ പങ്കെടുക്കും.
വിവിധ സ്ഥലങ്ങളില്‍ ശോഭായാത്രകള്‍ക്ക് ബാലഗോകുലം സംസ്ഥാന, മേഖലാ, ജില്ലാ ചുമതല വഹിക്കുന്നവര്‍ക്കൊപ്പം സാംസ്‌കാരിക നായകന്മാരും നേതൃത്വം നല്‍കും. ബാലഗോകുലം സംസ്ഥാന സെക്രട്ടറി ബാബുരാജന്‍ മാഷ് പൊന്‍കുന്നത്തും, സംസ്ഥാന നിര്‍വ്വാഹസമിതിയംഗം കെ.എന്‍. സജികുമാര്‍ ഇടുക്കിയിലും, സംസ്ഥാന സഹകാര്യാലയ പ്രമുഖ് അനന്തകൃഷ്ണന്‍ ദേവികുളത്തും, മേഖലാ രക്ഷാധികാരി പി.എന്‍. സുരേന്ദ്രന്‍ ഭരണങ്ങാനത്തും, മേഖലാ അദ്ധ്യക്ഷന്‍ വി.എസ്. മധുസൂദനന്‍ കറുകച്ചാലിലും, മേഖലാ ഉപാദ്ധ്യക്ഷന്‍ കെ.എസ്. ശശിധരന്‍ ചങ്ങനാശ്ശേരിയിലും, മേഖല ഉപാദ്ധ്യക്ഷ വനജാക്ഷിയമ്മ ടീച്ചര്‍ പൂഞ്ഞാറിലും മേഖലാ കാര്യദര്‍ശി ബിജു കൊല്ലപ്പള്ളി പാലായിലും സഹകാര്യദര്‍ശി ഗിരീഷ്‌കുമാര്‍ ഏറ്റുമാനൂരിലും സംഘടനാ കാര്യദര്‍ശി പ്രമോദ് കുമളിയിലും, ഖജാന്‍ജി രഞ്ജിത്ത് മുണ്ടക്കയത്തും, ഭഗിനി പ്രമുഖ എം.എസ്. ലളിതാംബിക കുഞ്ഞമ്മ രാമപുരത്തും, ജില്ലാ സെക്രട്ടറി അജിത്ത് കുമാര്‍ പാമ്പാടിയിലും ജില്ലാ അദ്ധ്യക്ഷന്‍ ഏഴാച്ചേരി രാധാകൃഷ്ണന്‍ കൊല്ലപ്പള്ളിയിലും ജില്ലാ സെക്രട്ടറി അനീഷ് പാലപ്ര പാറത്തോടും, ഇടുക്കി ജില്ലാ സെക്രട്ടറി പി.കെ. പ്രസന്നന്‍ രാമക്കല്‍മേടിലും, ജില്ലാ അദ്ധ്യക്ഷന്‍ വിനു പ്രസാദ് നെടുങ്കണ്ടത്തും, ജില്ലാ സെക്രട്ടറി സത്യന്‍ ദേവികുളത്തും, ജില്ലാ അദ്ധ്യക്ഷന്‍ ഡോ. പൊന്നപ്പന്‍ രാജാക്കാടും ശോഭായാത്രകള്‍ക്ക് നേതൃത്വം കൊടുക്കും. ആര്‍എസ്എസ് വിഭാഗ് കാര്യവാഹ് പി.പി. ഗോപി, വിഭാഗ് പ്രചാരക് അനീഷ് തുടങ്ങിയവര്‍ കോട്ടയം മേഖലയിലെ വിവിധ പ്രദേശങ്ങളിലെ ശോഭായാത്രകളില്‍ പങ്കെടുക്കും.
