ആരാര്ക്കു ഗുരുവെന്നോതി
ച്ചിരിക്കുന്ന മഹാ ഗുരോ
ചട്ടമ്പി സ്വാമിയായ് വന്ന
ചൈതന്യത്തിനു വന്ദനം!
ഗുരുവിന് ഗുരുവായോനേ
‘ശിശുനാമ ഗുരോ’ തൊഴാം
ആദിത്യവെട്ട മാത്മാവില്
കണ്ടുകൈവല്ല്യമാര്ന്നു നീ!
വിദ്യാധിരാജനായ് നിന്നു
വിശ്വം തട്ടിയുണര്ത്തിയോന്
വശ്യചേതസ്സിലാനന്ദം
മക്കള്ക്കായ് പങ്കുവെച്ചവന്
‘പട്ടിസ്സദ്യ’ നടത്തിനീ
നാട്ടിന്നുത്സവമൂട്ടിയോന്
വഴിവക്കീന്നു സര്പ്പത്തെ
നെഞ്ചിലേറ്റി നടന്നവന്
കിട്ടുന്ന തകരത്തുണ്ടും
ചെണ്ടയായ് മാറ്റിടുന്നവന്
നീയേ സര്വകലാനാഥന്
ജീവന്റെ താളമായവന്
തീര്ഥപാദ പുരത്തിന്നും
തീര്ഥമായ് കുടിക്കൊള്ളുവോന്
ജന്മ ജന്മാന്തരം കാണാന്
കണ്ണുനേടിയ ഭാഗ്യവാന്!
കാളവണ്ടിവലിക്കുന്ന
കാള മുജ്ജന്മമാരുടെ
കാര്ന്നോരായിരുന്നെന്നു
കൈചൂണ്ടിപ്പറയുന്നവന്
പിന്മുറക്കാര്ക്കു വാത്സല്യം
പെയ്തുനിന്ന ഘനാഘനം
എത്ര ഗ്രാമാന്തരങ്ങളെ
സത്രമായ് പോറ്റിനിന്നവന്
കണ്ണമ്മൂലയില് വന്നല്ലോ
ജന്മംകൊണ്ടിവനെങ്കിലും
കാണാമൂലകളെല്ലാം നിന്
ശാന്തിവൈഖരികേട്ടുപോല്.
സമാധി സ്ഥാനമെന്നേക്കും
പന്മനയ്ക്കു കൊടുത്തവന്
വിദ്യാധിരാജ പാദത്തില്
നമസ്കാരങ്ങള് സദ്ഗുരോ!
-തകഴി നാരായണണന്
