കോട്ടയം: കുമാരനല്ലൂര് ദേവീക്ഷേത്രത്തില് ചിങ്ങമാസത്തിലെ തിരുവോണനാളിനു ശേഷമുള്ള ഉതൃട്ടാതി ദിവസം ക്ഷേത്രാചാരങ്ങളോടെ നടത്തിവരാറുള്ള ഊരുചുറ്റുവള്ളംകളി വിവിധ എന്എസ്എസ് കരയോഗങ്ങളുടെയും ദേശവഴികളില്പ്പെട്ട കരക്കാരുടെയും ആഭിമുഖ്യത്തില് ഇന്ന് നടക്കും.
ഉതൃട്ടാതി നാളില് ഭഗവതി പള്ളിയോടത്തിലേറി ദേശവഴികളിലെ ഭക്തരെ അനുഗ്രഹിക്കുന്നതിനുവേണ്ടി ഊരുചുറ്റുന്നു എന്നാണ് ഐതീഹ്യം. ദേവീ ചൈതന്യം സിംഹവാഹനത്തില് ആവാഹിച്ച് രാവിലെ ക്ഷേത്രനടയില് നിന്നും വാദ്യമേളത്തിന്റെയും മുത്തുക്കുടകളുടെയും ശംഖനാദത്തിന്റെയും കരവഞ്ചിയുടെയും അകമ്പടിയോടുകൂടി ആറാട്ടുകടവായ പുത്തന്കടവിലെത്തിച്ചേരും. മന്ത്രി തിരുവഞ്ചൂര് രാധാകൃഷ്ണന്, കോട്ടയം നഗരസഭാ ചെയര്മാന് എം.പി. സന്തോഷ്കുമാര് എന്നിവര് സന്നിഹിതരായിരിക്കും. രാവിലെ 9മണിയോടുകൂടി സിംഹവാഹനവുമായി യാത്രതിരിക്കുന്ന പള്ളിയോടം നീലിമംഗലം, ചവിട്ടുവരി, ചൂട്ടുവേലി, തെക്കെ നട്ടാശേരി വഴി സൂര്യകാലടി മനയിലെത്തും. കാലടി ഗണപതിയെ വന്ദിച്ച് അനുഗ്രഹം വാങ്ങി ഇടത്തില് മണപ്പുറം, നാഗമ്പടം, പനയക്കഴിപ്പ്, ചുങ്കം, ഗോവിന്ദപുരം, തിരുവാറ്റ, കല്ലുമട, പുലിക്കുട്ടിശേരി, കുടമാളൂര്, പനമ്പാലം, കുമാരനല്ലൂര് വടക്കേ നട വഴി ഭക്തര് ഒരുക്കുന്ന പറവഴിപാടുകള് സ്വീകരിച്ച് വൈകിട്ട് 6മണിയോടെ ആറാട്ടുകടവില് തിരികെ എത്തിച്ചേരും. തുടര്ന്ന് കരവഞ്ചിയോടെ ക്ഷേത്രസന്നിധിയിലെത്തി സിംഹവാഹനം തിരികെ എല്പിക്കുന്നതോടെ ഊരുചുറ്റുവള്ളംകളി സമാപിക്കും.
ഈ വര്ഷം ദേവിയുടെ സിംഹവാഹനം വഹിക്കുന്നത് ഓടിവള്ളമായ ‘കോട്ടപ്പറമ്പന്’ ആണ് ഈ വള്ളത്തിന് ദേശവഴികളില്പ്പെട്ട കരക്കാരുടെ നേതൃത്വത്തിലുള്ള പ്രമുഖ കളിവള്ളങ്ങള് അകമ്പടി സേവിക്കുമെന്നും ഭാരവാഹികളായ ഉണ്ണികൃഷ്ണന് നവരൂര്, പി.എന്. ശശിധരന് നായര്, എം.ജി. ഭാസ്കരന് നായര്, രാധാകൃഷ്ണ പണിക്കര് എന്നിവര് അറിയിച്ചു.
കുടമാളൂരില് സ്വീകരണം നല്കും
കുടമാളൂര്: കുമാരനല്ലൂര് ദേവീക്ഷേത്രത്തില് നിന്നും പുറപ്പെടുന്ന ഉതൃട്ടാതി ഊരുചുറ്റുവള്ളംകളിക്ക് കുടമാളൂര് ഗോവിന്ദപുരം ശ്രീമഹാവിഷ്ണുക്ഷേത്രത്തില് ഇന്ന് വൈകിട്ട് 6ന് സ്വീകരണം നല്കും. നിറപറയും നിലവിളക്കും വച്ച് ക്ഷേത്രക്കടവില് പരമ്പരാഗതമായ രീതിയില്നടക്കുന്ന സ്വീകരണത്തിന് 1517-ാം നമ്പര് കുടമാളൂര് എന്എസ്എസ് കരയോഗ ഭാരവാഹികളായ മാത്തൂര് ഗോവിന്ദന്കുട്ടി, കുടമാളൂര് രാധാകൃഷ്ണന്, കെ.പി. നാരായണന് നായര്, എം.വി. രാജഗോപാലന് നായര്, ഗോപീകൃഷ്ണന്, ജയകുമാര് എന്നിവര് നേതൃത്വം നല്കും.
