ഡോ. ബി.സി.ബാലകൃഷ്ണന്
തപസ്സവിതാ ഹംസഃ ചിന്താമണിരഹര്പതിഃ
അരുണോമിഹിരോമിത്രഃ നീഹാരക്ലേദനാശകഃ
665. തപനഃ – തപിപ്പിക്കുന്നവന്. തപനത്തിന് ചൂടു പിടിപ്പിക്കല് എന്നും വേദനിപ്പിക്കല് എന്നും അര്ത്ഥം. ഭൂമിയെ ചൂടിപിടിപ്പിച്ച് സസ്യങ്ങള്ക്കും ജന്തുക്കള്ക്കും ജീവിക്കാന് യോഗ്യമാക്കുന്നതിനാല് തപനന്. ഭൂമിയിലെ ജീവികള്ക്കും സസ്യങ്ങള്ക്കും ജീവിതം അസാദ്ധ്യമായിത്തീരത്തക്കവണ്ണം ചൂടുപിടിപ്പിച്ച് ദുഃഖിപ്പിക്കുന്നതിനാലും ഭഗവാന് തപനനാണ്.
666. സവിതഃ – സവിതാവ്. പ്രസവിക്കുന്നവന്. ഭൂമിയിലുള്ള എല്ലാ ജീവനും ജന്മം നല്കിയവനാകയാല് സൂര്യദേവന് സവിതാവായി. തേജസ്സിനെ സ്രവിക്കുന്നവന് എന്നും ഈ നാമത്തെ വ്യാഖ്യാനിക്കാം. അന്ധകാരത്തില് ഉറങ്ങിപ്പോകുന്ന ജീവികളെ ഉണര്ത്തി കര്മ്മം ചെയ്യാന് പ്രേരിപ്പിക്കുന്നതുകൊണ്ട് സവിതാവെന്നു പേരുണ്ടായി എന്നും വ്യാഖ്യാനിക്കാം.
667. ഹംസഃ – ഹംസന്. സൂര്യരൂപിയായ ഭഗവാന് പലവിധത്തില് ഹംസനാണ്. ഇരുട്ടിനെ ഹനിക്കുന്നവന്, പ്രകാശം കൊണ്ട് ഇരുട്ടിനെ നശിപ്പിക്കുന്നവന് ഹംസന് എന്ന് ഒരു വ്യാഖ്യാനം. ശിഷ്യന്റെ മനസ്സിലുള്ള അജ്ഞാനമാകുന്ന ഇരുട്ടിനെ അകറ്റി ജ്ഞാനമാകുന്ന പ്രകാശം വ്യാപിപ്പിക്കുന്ന അദ്ധ്യാത്മ ഗുരുവിനെയും ഹംസന് എന്നുപറയും. പ്രപഞ്ചപ്രവര്ത്തനത്തിനു കാരണക്കാരായ ബ്രഹ്മാവ്, വിഷ്ണു, മഹേശ്വരന് എന്ന ത്രിമൂര്ത്തികളില് ഓരോ മൂര്ത്തിയും ഗുരുവാകയാല് അവരെയെല്ലാം ഹംസശബ്ദം നിര്ദ്ദേശിക്കുന്നു. സഹവര്ത്തിത്വത്തിന്റെ പ്രകാശം പരത്തുന്ന കാമദേവനെയും ത്യാഗത്തിന്റെ പ്രകാശം പ്രസരിപ്പിക്കുന്ന സന്ന്യാസിശ്രേഷ്ഠനെയും അറിവി
ന്റെ ജ്യോതിസ്സ് പരത്തുന്ന ജ്ഞാനിയെയും ജീവാത്മാവിനെയും ഏതെങ്കിലും പ്രവര്ത്തനമണ്ഡലത്തില് ലോകത്തിനു മാര്ഗ്ഗദര്ശനം നല്കുന്ന മഹാനെയും നിര്ദ്ദേശിക്കാന് ഹംസ ശബ്ദം ഉപയോഗിക്കാറുണ്ട്. ഗുരുവായൂരപ്പന്റെ സൂര്യരൂപത്തിന് മേല്പ്പറഞ്ഞ നിര്വചനങ്ങളെല്ലാം യോജിക്കും.
668. ചിന്താമണിഃ – ആഗ്രഹിച്ചതെല്ലാം തരുന്ന ദിവ്യരത്നമാണ് ചിന്താമണി. ആദിത്യഹൃദയമന്ത്രത്തില് എഴുത്തച്ഛന് സൂര്യദേവനെ ”ചിന്താമണേ ചിദാനന്ദായ തേ നമഃ” എന്നു സ്തുതിക്കുന്നുണ്ട്. ഭൂമിയിലെ ജീവികള്ക്കു ജീവിക്കാനാവശ്യമായ ചൂടും വെളിച്ചവും മഴയും ഊര്ജ്ജവും ആഹാരവും സൂര്യനില്നിന്നാണ് ലഭിക്കുന്നത്. അതുകൊണ്ട് ഭൂമിയിലുള്ള എല്ലാ ജീവികള്ക്കും സൂര്യന് ചിന്താമണിയാണ്.
ദേവനായി സൂര്യനെ ആരാധിക്കുന്നവര്ക്ക് അപ്രാപ്യമായി ഒന്നും തന്നെയില്ല. എല്ലാ ദേവന്മാരുടെ ചൈതന്യവും ഏകീഭവിച്ചുണ്ടായ സൂര്യഗായത്രിമന്ത്രമോ ആദിത്യഹൃദയമന്ത്രമോ കൊണ്ടു സൂര്യദേവനെ പ്രസാദിപ്പിക്കുക. ഭഗവാന്റെ അവതാരമായ ശ്രീരാമന് രാവണവധത്തിനുവേണ്ട ശക്തി നേടാന് ആദിത്യ ഹൃദയമന്ത്രം ജപിക്കേണ്ടിവന്നതു മുന്പു സൂചിപ്പിച്ചിരുന്നു.
(തുടരും)
