കോട്ടയം: ജലഗതാഗതത്തിലൂടെ കോട്ടയത്ത് നിന്നും ആലപ്പുഴയ്ക്ക് എളുപ്പത്തില് എത്താവുന്ന കോടിമത ബോട്ട് ജെട്ടിയില് ബോട്ട് എത്തിയിട്ട് മുന്നുവര്ഷം പിന്നിടുന്നു. 60ലക്ഷം രൂപ മുടക്കി ആധുനിക യാത്ര സൗകര്യങ്ങളൊരുക്കി ജലഗതാഗത വകുപ്പിന്റെ പുതിയ ഓഫിസും ജെട്ടിയും കോടിമതയില് പ്രവര്ത്തനം ആരംഭിച്ചെങ്കിലും ഇവിടെ ബോട്ട് എത്താത്തത് മൂലം ജെട്ടി ആളൊഴിഞ്ഞ നിലയിലാണ്. കൊടുരാറിന് കുറുകെയുള്ള കാഞ്ഞിരംപാലത്തിന്റെ നിര്മ്മാണം വൈകുന്നതാണ് കോടിമതയിലെ ജെട്ടിയില് നിന്നുമുള്ള ജലഗതാഗതത്തിന് തിരിച്ചടിയായിരിക്കുന്നത്.
ഇടതുതൊഴിലാളി യുണിയനുകളുടെ നേതൃത്വത്തില് പാലത്തിന്റെ നിര്മ്മാണപ്രവര്ത്തനങ്ങളില് തടസം സൃഷ്ടിക്കുന്നതാണ് പാലം നിര്മ്മാണം വൈകുന്നതിന് കാരണമെന്ന് ആരോപണം ഉയര്ന്നിട്ടുണ്ട്.കഴിഞ്ഞയാഴ്ചയും നിര്മ്മാണപ്രവര്ത്തനത്തിന് വിഘാതം ഉണ്ടാക്കുന്ന തരത്തില് ഇടതുതൊഴിലാളി യുണിയനുകള് ഇടപെട്ടിരുന്നു.കോട്ടയം സ്റ്റേഷന്റെ രണ്ട് ബോട്ടും ആലപ്പുഴ സ്റ്റേഷന്റെ ഒരു ബോട്ടുമാണ് സര്വ്വീസിനുള്ളത്.കോട്ടയത്ത് നിന്നും ജോലിക്കാര്ക്ക് ഉപകാരപ്രദമാകുന്ന തരത്തില് രാവിലെ ആലപ്പുഴയ്ക്ക് സര്വീസ് ഉണ്ടായിരുന്നതാണ്.ആലപ്പുഴയില് നിന്നും കോട്ടയത്തേയ്ക്കും രാവിലെ ബോട്ട് സര്വീസ് നടത്തിയിരുന്നു. പാലംനിര്മ്മാണം നടക്കുന്നതിനാല് നിലവില് കാഞ്ഞിരംപാലത്തിന് സമീപം വരെമാത്രമെ ബോട്ട് എത്തുകയുള്ളു.
ഇവിടെയാണ് ബോട്ട് കിടക്കുന്നത്. തുടര്ന്ന് ആലപ്പുഴയ്ക്ക് പോകണമെങ്കില് യാത്രക്കാര് കോട്ടയത്തു നിന്നും ബസ് കയറി കാഞ്ഞിരത്തെത്തണം.വൈകിട്ട് ആലപ്പുഴയില് നിന്നും തിരിച്ചെത്തുന്നവര് കാഞ്ഞിരത്തു നിന്നും കോട്ടയത്തേയ്ക്കും ബസ് കയറണം.ഇത്തരത്തില് ദുരിതം നേരിടുകയാണ് യാത്രക്കാര്. കോട്ടയത്തു നിന്നും ആലപ്പുഴയ്ക്ക് പുതിയതായി ലിമിറ്റഡ് സ്റ്റോപ്പ് ബോട്ട് സര്വീസ് ആരംഭിക്കുന്നതിനുള്ള നടപടി ക്രമങ്ങള് പൂര്ത്തികരിച്ചിരുന്നു. എന്നാല് നിലവിലത്തെ സാഹചര്യം പ്രതികൂലമാകുകയായിരുന്നു. വിനോദസഞ്ചാരികള്ക്ക് കുട്ടനാടും വേമ്പനാട് കായലും കണ്ട് ആസ്വദിക്കുന്നതിന് പ്രത്യേകം ബോട്ട് സര്വീസും ജലഗതാഗത വകുപ്പിന്റെ പദ്ധതിയിലുണ്ടായിരുന്നു.
വയസ്കര കുന്നിന് താഴെ കച്ചേരിക്കടവ് ബോട്ട് ജെട്ടിയിലായിരുന്നു പണ്ട് ബോട്ട് എത്തിക്കൊണ്ടിരുന്നത്.ബോട്ട് യാത്രക്കാര്ക്ക് ബസില് കോടിമതിയിലെത്തി ബോട്ടില് കയറാമെന്നുള്ളതിനാല് കാലക്രമേണ ജെട്ടി കോടിമതയിലേയ്ക്ക് മാറുകയായിരുന്നു.
