531. ചക്രപാണിഃ – ചക്രം എന്ന ആയുധം കൈയില് ധരിച്ചവന്. ഭഗവാന്റെ ആയുധമായ ചക്രത്തിനു ‘സുദര്ശനം’ എന്നാണ് പേര്. അതു കാലത്തിന്റെ പ്രതീകമാണെന്ന് ആചാര്യന്മാര് പറയുന്നു. ഭഗവാനല്ലാതെ മറ്റാര്ക്കും അതിന്റെ ഗതി തടയാനാവില്ല. പന്ത്രണ്ട് അരക്കാലുകളും മൂന്നൂറ്റി അറുപതു ഛേദകങ്ങളുമുള്ളതും സഹസ്രകോടി ആദിത്യന്മാരുടെ പ്രകാശമുള്ളതുമായി ഇതിനെ പുരാണങ്ങള് വര്ണ്ണിക്കുന്നു. മനസ്സിന്റെ പ്രതീകമാണു ചക്രമെന്നും അഭിപ്രായമുണ്ട്. കാണാനും അറിയാനും നിയന്ത്രിക്കാനും ആകാത്തതുകൊണ്ട് ‘ആദര്ശനം’ എന്നു പറയാവുന്ന കാലരൂപമായ ചക്രത്തെ ‘ സുദര്ശന’ മാക്കി തന്റെ ഒരു വിരലില് സദാ ഭ്രമണം ചെയ്യിക്കുകയാണു ഗുരുവായൂരപ്പന്.
532. പാഞ്ചജന്യ പ്രഘോഷകഃ – പാഞ്ചജന്യം എന്ന ശംഖം മുഴക്കുന്നവന്. ചതുര്ബാഹുവായ വിഷ്ണുവിന്റെ ഇടതുകൈകളിലൊന്നില് ശംഖം ധരിച്ചിരിക്കുന്നു. ശ്രീകൃഷ്ണാവതാരത്തില് ശംഖ രൂപിയായ പഞ്ചജനന് എന്ന അസുരനെകൊണ്ട് ആ ശംഖത്തിന്റെ പുറന്തോട് ഭഗവാന് സ്വീകരിച്ചതായി പുരാണകഥ. മഹാവിഷ്ണുവിന്റെ കൈയിലുള്ള ശംഖത്തില്നിന്നാണ് പഞ്ചഭൂതങ്ങള് ഉണ്ടായതെന്നും അതുകൊണ്ട് അതിന് പാഞ്ചജന്യം എന്നുപേരുണ്ടായി എന്നും അഭിപ്രായമുണ്ട്. ”ഭൂതാദ്യഹങ്കാരരാത്മകം ശംഖം’ എന്നു ശങ്കരഭാഷ്യം ഭഗവാന്റെ ശംഖത്തില്നിന്ന് ശബ്ദബ്രഹ്മം ഉണ്ടായി എന്നും ആ ശംഖനാദത്തില് നിന്നു ലോകങ്ങള് ഉണ്ടായി എന്നും മറ്റൊരഭിപ്രായം.
ശംഖം എന്ന പദത്തിന് ദുഃഖത്തെ നശിപ്പിക്കുന്നത് എന്നും അര്ത്ഥം. ശംഖം കൈയിലുള്ളവനായോ ശംഖനാദം മുഴുക്കുന്നവനായോ വിഷ്ണുവിനെ സ്മരിച്ചാല് ദുഃഖം നശിക്കുകയും ഐശ്വര്യം വര്ദ്ധിക്കുകയും ചെയ്യുമെന്നു വൈഷ്ണവതന്ത്രങ്ങള്.
ശംഖനാദം മുഴക്കുന്നവനായി നാമം ഗുരുവായൂരപ്പനെ സ്തുതിക്കുന്നു.
ശ്ലോകം.109.
കുമോദക്കോ വിശ്വരൂപോ വിശ്വകര്ത്താ വിധിസ്തുതഃ
ആത്മനിഷ്ഠോളപ്രമേയത്ര്വ അനന്തഃ ജ്ഞാനവിഗ്രഹഃ
533. കുമോദകഃ – കുമോദകന്, വിഷ്ണു. ‘കു’ എന്ന പദത്തിനു ഭൂമി എന്നര്ത്ഥം. ഭൂമിക്കു മോദം നല്കുന്നവന് കുമോദകന്. ഭൂമി വിഷ്ണുഭഗവാന്റെ ഭാര്യയാണ് ഭഗവാന്റെ സാമീപ്യം ദേവിയെ സന്തോഷിപ്പിക്കും. ഭൂമിയില് അധര്മ്മം വ്യാപിക്കുമ്പോള് അത്തരം സന്ദര്ഭങ്ങളിലെല്ലാം ഭഗവാന് പലരൂപത്തില് അവതരിപ്പിച്ച് ഭൂഭാരം നശിപ്പിക്കും. അതിനാല് ഭഗവാനെ കുമോദകനായി സ്തുതിക്കുന്നു. ഭഗവാന്റെ ആയുധങ്ങളില് ഒന്നായ ഗദയുടെ പേര് ”കൗമോദകി” (കുമോദകനെ സംബന്ധിച്ചത്) എന്നാണെന്നും ഈ അവസരത്തില് ഓര്ക്കാം
.
(തുടരും)
ഡോ. ബി.സി.ബാലകൃഷ്ണന്
