കോട്ടയം: എംജി സര്വകലാശാല കാമ്പസില് പ്രോ. വിസിയുടെ മുറിയിലേക്ക് അതിക്രമിച്ചു കടക്കാന് ശ്രമിച്ച എസ്എഫ്ഐ പ്രവര്ത്തകരെ തടഞ്ഞ സെക്യൂരിറ്റി ജീവനക്കാരെ മര്ദിച്ചതായി പരാതി. സന്ദര്ശക രജിസ്റ്ററില് വിവരങ്ങള് രേഖപ്പെടുത്തുന്നതിനെ ചൊല്ലിയുള്ള തര്ക്കമാണ് സംഘര്ഷത്തില് കലാശിച്ചത്. കാണക്കാരി പാലനില്ക്കുന്നതില് സി.എന്. വിജയന് (54), െവെക്കം മറവന്തുരുത്ത് എടമറ്റം സാബു (50) എന്നിവര്ക്കാണ് പരിക്കേറ്റത്. മര്ദനമേറ്റ രണ്ടു സെക്യൂരിറ്റി ജീവനക്കാരെ കോട്ടയം മെഡിക്കല് കോളജ് ആശുപത്രിയില് പ്രവേശിപ്പിച്ചു. കണ്ടാലറിയാവുന്ന 20 പേര്ക്കെതിരെ കേസെടുത്തതായി ഗാന്ധിനഗര് പോലീസ് അറിയിച്ചു.
ബുധനാഴ്ച രാവിലെ സര്വകലാശാല ഹെല്പ്പ് ഡെസ്ക്കുമായി ബന്ധപ്പെട്ട് എസ്എഫ്ഐ പ്രവര്ത്തകര് പ്രൊ.വിസിക്ക് പരാതി നല്കാനെത്തിയതോടെയാണ് പ്രശ്നങ്ങള്ക്ക് തുടക്കം. പ്രൊ.വിസിയെ കാണുന്നതിനായി സന്ദര്ശക രജിസ്റ്ററില് പേരും വിരങ്ങളും രേഖപ്പെടുത്തണമെന്നും തിരിച്ചറിയല് കാര്ഡ് കാണിക്കണമെന്നും സെക്യൂരിറ്റി ജീവനക്കാര് അറിയിച്ചു. ഇതിനു തയ്യാറാവാത്തതിനെ തുടര്ന്ന് ഇവരെ സെക്യൂരിറ്റി ജീവനക്കാര് തടയുകയായിരുന്നു. സന്ദര്ശക രജിസ്റ്ററില് വിവരങ്ങള് രേഖപ്പെടുത്താവരെ ഉള്ളിലേക്ക് കടത്തി വിടേണ്ടെന്നാണ് തങ്ങള്ക്കു ലഭിച്ചിരുന്ന നിര്ദേശമെന്ന് സെക്യൂരിറ്റി ജീവനക്കാര് പറഞ്ഞു. ഇതിനു തയാറാവാത്തതിനെ തുടര്ന്ന് വാക്കുതര്ക്കമുണ്ടാവുകയും എസ്എഫ്ഐക്കാര് മടങ്ങുകയുമായിരുന്നു. എന്നാല്, െവെകുന്നേരം മൂന്നുമണിയോടെ സംഘടിച്ചെത്തിയ 20 ഓളം വരുന്ന എസ്എഫ്ഐ പ്രവര്ത്തകര് പ്രൊ.വി.സിയുടെ മുറയിലേക്ക് തള്ളിക്കയറാന് ശ്രമിച്ചു. ഇത് തടഞ്ഞ സെക്യൂരിറ്റിക്കാരെ മര്ദ്ദിക്കുകയായിരുന്നുവെന്ന് പൊലീസ് പറഞ്ഞു. ബെല്റ്റും ചെടിച്ചട്ടികളും ഉപയോഗിച്ചായിരുന്നു ആക്രമണം. അഡ്മിനിസ്ട്രേറ്റീവ് ബ്ലോക്കിനുമുന്നില് ഉച്ചമുതല് സംഘര്ഷം സൃഷ്ടിച്ചുകൊണ്ട് എസ്എഫ്ഐ പ്രവര്ത്തകള് തമ്പടിച്ചിട്ടും സര്വകലാശാല അധികൃതര് പൊലീസിനെ വിളിക്കാതിരുന്നതാണ് മര്ദനത്തില് കലാശിച്ചതെന്ന് ഒരുവിഭാഗം ജീവനക്കാര് പറയുന്നു. സംഘര്ഷത്തെ തുടര്ന്ന് ഇടതുപക്ഷ ജീവനക്കാരടക്കമുള്ളവര് മര്ദനത്തിനെതിരെ രംഗത്തെത്തി.
