ചങ്ങനാശേരി: മനയ്ക്കച്ചിറയിലുള്ള സ്വകാര്യ റിസോര്ട്ടിനു സമീപം ഉണ്ടായ സംഘട്ടനത്തില് പരിക്കേറ്റ ഡിവൈഎഫ്ഐ പ്രവര്ത്തകരെ മറ്റൊരു വിഭാഗം ഡിവൈഎഫ്ഐക്കാര് ആക്രമിച്ചു. ചങ്ങനാശേരി ഗവ. ആശുപത്രിയിലെ അത്യാഹിത വിഭാഗത്തില് കടന്നുകയറിയായിരുന്നു ആക്രമണം. 12 ഡിവൈഎഫ്ഐ പ്രവര്ത്തകര്ക്കെതിരെ ചങ്ങനാശേരി പോലീസ് ജാമ്യമില്ലാ വകുപ്പു പ്രകാരം വധശ്രമത്തിന് കേസെടുത്തു.
ചങ്ങനാശേരിയില് സിപിഎമ്മില് ഗ്രൂപ്പിസം ശക്തമാണെങ്കിലും ഡിവൈഎഫ്ഐയില് അത് ഇതുവരെ പ്രകടമല്ലായിരുന്നു. ലോക്സഭാ തെരഞ്ഞെടുപ്പു കഴിഞ്ഞ നാള് മുതല് പെരുന്ന പാറാട്ടു കോളനിയിലും മനയ്ക്കച്ചിറയിലുമുള്ള ഡിവൈഎഫ്ഐ പ്രവര്ത്തകര് തമ്മില് തര്ക്കങ്ങളും സംഘട്ടനങ്ങളും നടന്നിരുന്നു.
പെരുന്ന ഓട്ടോ സ്റ്റാന്ഡില് ഓടുന്ന സിഐടിയു യൂണിയനില്പ്പെട്ട ബിനോയി എന്ന ഓട്ടോ ഡ്രൈവറും പുഴവാത് ശശിമന്ദിരത്തില് രാഹുലും തമ്മില് കഴിഞ്ഞആഴ്ച വാക്കുതര്ക്കവും കയ്യേറ്റവും നടന്നിരുന്നു. കഴിഞ്ഞയാഴ്ച ചെത്തിപ്പുഴയിലുള്ള സ്വകാര്യ ആശുപത്രിയില് ഡിവൈഎഫ്ഐ സംഘങ്ങള് തമ്മില് ഏറ്റുമുട്ടുകയും ആശുപത്രി ഉപകരണങ്ങള് നശിപ്പിക്കുകയും ചെയ്തിരുന്നു. സിപിഎമ്മിലെ ഗ്രൂപ്പുനേതാക്കള് വളര്ത്തുന്ന ഗുണ്ടാ സംഘങ്ങളാണിവര് എന്നും ആക്ഷേപമുണ്ട്. ആശുപത്രി ഉപകരണങ്ങള് തല്ലിത്തകര്ത്തതിനെതിരെയും രാഹുലിനെ മനക്കച്ചിറയില് ആക്രമിച്ചതിനും പോലീസ് കേസെടുത്തിട്ടുണ്ട്.
