502. ശാസ്താ – സ്നേഹമസൃണമായ ഉപദേശങ്ങളിലൂടെ സദാചാരത്തിനു പ്രേരിപ്പിക്കുന്ന മാതാപിതാക്കള്, ഗുരുവരന്മാര്, ഭാര്യ, ഭര്ത്താവ്, സ്നേഹിതര് തുടങ്ങിയവരില് സ്നേഹമായും പ്രേമമായും വാത്സല്യമായും കാരുണ്യമായും മറ്റും പ്രവര്ത്തിച്ച് പരോക്ഷമായ നിര്ദ്ദേശങ്ങളിലൂടെ വ്യക്തികളെ വിവേകികളാക്കുന്നതിനാലും ഭഗവാന് ശാസ്താവാണ്.
പലതരത്തില് ധര്മ്മാചരണത്തിനു ശാസിക്കുന്നതിനാല് ഭഗവാന് ശാസ്താവ് എന്നു നാമം.
503. ശംസിത – സ്തുക്കിപ്പെടുന്നവന്, പുകഴ്ത്തപ്പെടുന്നവന്. ഭഗവാനെക്കുറിച്ച് ആരെന്തുപറഞ്ഞാലും ഫലത്തില് അതു പുകഴ്ത്തലായിത്തീരും. എതിരാളിയായിക്കണ്ട് ആക്ഷേപിക്കാനുപയോഗിക്കുന്ന വാക്കുകളും ഭഗവത്പാദങ്ങളില് പുഷ്പങ്ങളായി പതിക്കും.
504. ശംസ്തവ്യ – സ്തുതിക്കപ്പെടേണ്ടവന്, പുകഴ്ത്തപ്പെടേണ്ടവന്. മുന്നാമത്തിന്റെ തുടര്ച്ചയും വ്യാഖ്യാനവുമായി ഈ നാമത്തെ കണക്കാക്കാം. സ്തുതി അര്ഹിക്കുന്നതായി ഭഗവാന് മാത്രമേയുള്ളൂ. അഭിലഷണീയമായും ആരാധ്യമായും പ്രപഞ്ചത്തില് ഉള്ളതെല്ലാം ഭഗവാന്റെ പ്രഭാവത്തിന്റെ അല്പമായ കണികകളാണ്. ജലത്തില് രസമായും സൂര്യചന്ദ്രാണികളില് പ്രകാശമായും വേദങ്ങളില് പ്രണവമായും പൃഥ്വിവിയില് ഗന്ധമായും തപസ്വിമാരില് തപസ്സായും ബുദ്ധിമാന്മാരില് ബുദ്ധിയായും പ്രാണികളില് ധര്മ്മവിരുദ്ധമല്ലാത്ത കാമമായും സ്ഥിതിചെയ്യുന്നതു താന് തന്നെയാണെന്നു ഭഗവാന് അരുളിചെയ്തിട്ടുണ്ട്. എല്ലാം നൂലില് മണികള്പോലെ ഭഗവാനില് ബന്ധമായിരിക്കുന്നു. ഭഗവദ്ഗീത 7-ാം അധ്യായത്തിലെ 7, 8, 9 ശ്ലോകങ്ങള് നോക്കുക.
505. വേദശാസ്ത്രവിഭാവിത – വേദങ്ങളാലും ശാസ്ത്രങ്ങളാലും വിഭാവനം ചെയ്യപ്പെടുന്നവന്. ശംസീതനും ശംസ്തവ്യനുമായി മുന്നാമങ്ങളാല് ഭഗവാനെ അവതരിപ്പിച്ചു. ഭഗവാന് സദാ നമ്മോടൊപ്പമുണ്ട്. നമ്മുടെ ശരീരത്തെയും മനസ്സിനെയും ചിന്തയെയും പ്രവര്ത്തനത്തെയും അറിഞ്ഞുകൊണ്ടും നിയന്ത്രിച്ചുകൊണ്ടും ജനനത്തിലും ജീവിതത്തിലും മരണത്തിലും നമ്മില്നിന്നു വേര്പെടാതെ കൂടെയുള്ള ഭഗവാനെ നമുക്ക് അറിയാന് കഴിയുന്നില്ല. വേദങ്ങളുടെയും ശാസ്ത്രങ്ങളുടെയും പഠനം നമ്മെ അതിനു സഹായിക്കും. ഭഗവാനെ മറയ്ക്കുന്ന മായാവരണം മാറ്റി ഭഗവാനെ സാക്ഷാത്കരിക്കാന് വേദശാസ്ത്രങ്ങള് സഹായിക്കും. വേദശാസ്ത്രപഠനം മാത്രംകൊണ്ട് അതു സാധിക്കണമെന്നില്ല. മറ്റു ചിലതുകൂടെ വേണം. അവയെക്കുറിച്ച് മറ്റു ചില നാമങ്ങള് നമ്മെ അറിയിക്കും.
(തുടരും)
ഡോ. ബി.സി.ബാലകൃഷ്ണന്
