492. ലക്ഷ്മീകഃ – നെഞ്ചില് മഹാലക്ഷ്മിയെ ധരിക്കുന്ന ഭഗവാന് ചതുര്ബാഹുവായ രൂപത്തില് തന്റെ വലതുകൈകളിലൊന്നില് താമരയുടെ രൂപത്തില് ആയുധമായും ധരിക്കുന്നു.
493. ലക്ഷ്മീഭൂമിനിഷേവിതഃ – ലക്ഷ്മീദേവിയാലും ഭൂമിദേവിയാലും സേവിക്കപ്പെടുന്നവന്. ലക്ഷ്മീദേവിയും ഭൂമീദേവിയും ഭഗവാന്റെ രണ്ടു ഭാര്യമാരാണ്. രണ്ടുപേരും പ്രേമത്തോടെ ഭഗവാനെ സേവിക്കുന്നു.
ഗുരുവായൂരപ്പന്റെ ഭക്തര്ക്ക് ഭൂമിയില് ഐശ്വര്യപൂര്ണമായ ജീവിതം ലഭിക്കുമെന്ന വ്യംഗ്യസൂചനയും ഈ നാം ഉള്ക്കൊള്ളുന്നു.
നാമം 104 വര്ഷിഷ്ഠോ വര്ദ്ധമാനശ്ച കാരുണ്യാമൃതവര്ഷകഃ
വിശ്വേ വൃദ്ധോ വൃത്തിഹീനോ വിശ്വജിത് വിശ്വപാവനഃ
494. വര്ഷിഷ്ഠഃ – ഏറ്റവും പ്രായം കൂടിയവന്. ഏറ്റവും വലിയവന്. ഭഗവാനില്നിന്നാണ് പ്രപഞ്ചമുണ്ടായത്. ഉണ്ടായവയ്ക്കു മാത്രമേ പ്രായം കണക്കാക്കാന് കഴിയൂ. അനാദിയായ ഗുരുവായൂരപ്പനു പ്രായമില്ല. എങ്കിലും പ്രപഞ്ചത്തിലുള്ള ഏതിനെക്കാളും പ്രായമുണ്ടെന്നു പറയാം.
ഈ പ്രപഞ്ചത്തിന്റെ വലിപ്പത്തെക്കാള് അല്പംകൂടി വലുപ്പമുള്ളതാണ് ഭഗവാന്റെ ശരീരമെന്നു പറയാറുണ്ട്. നാരായണീയം ”മഹീയസോളപി മഹിതം” എന്നാണ് ഗുരുവായൂരപ്പന്റെ രൂപത്തെ രണ്ടാംദശകത്തില് വര്ണിക്കുന്നത്. ഏറ്റവും മഹത്തായതിനെക്കാളും മഹത്ത് എന്നര്ത്ഥം.
495. വര്ദ്ധമാനഃ – വര്ദ്ധിക്കുന്നവന്. വലുപ്പത്തിലോ എണ്ണത്തിലോ ശക്തിയിലോ മറ്റോ പെരുകുക. വിഷ്ണു വ്യാപനശീലനാണ്. പ്രപഞ്ചമായി വ്യാപിക്കുന്ന ഭഗവാനെ വിശ്വം എന്ന പദംകൊണ്ടാണ് വിഷ്ണുസഹസ്രനാമം സ്തുതിച്ചു തുടങ്ങുന്നത്. പ്രപഞ്ചത്തിലുണ്ടാകുന്ന ജീവികള് വളരുന്നത് പ്രപഞ്ചത്തില്നിന്നു പലതും സ്വീകരിച്ചാണ്. ഭഗവാന് വളരാന് പുറത്തുനിന്ന് ഒന്നും വേണ്ട. ഭഗവാന്റെ അവതാരലീലകളില് വര്ദ്ധമാനനാകുന്നതിനു പല ഉദാഹരണങ്ങളുണ്ട്. സത്യവ്രതന്റെ കൈക്കുമ്പിളില് കുഞ്ഞുമീനായി പിറന്ന ഭഗവാന് കിണറും കുളവും തടാകവുമൊക്കെ നിറഞ്ഞുകഴിഞ്ഞ് കടലിലെത്തി ലക്ഷം യോജന നീളവും അതിനുചേര്ന്നവര്ണ്ണവുമുള്ള മഹാമത്സ്യമായി വര്ദ്ധിച്ചതു നാം കണ്ടു. കൂര്മ്മാവതാരത്തില് വജ്രത്തെക്കാള് കടുപ്പമുള്ള പുറന്തോടുമായി മന്ഥരപര്വ്വതം താങ്ങിയ കൂര്മ്മത്തെ ലക്ഷത്തിലേറെ യോജന വലിപ്പമുള്ളതായാണ് നാരായണീയം വര്ണിക്കുന്നത്.
(തുടരും)
ഡോ. ബി.സി.ബാലകൃഷ്ണന്
