434. ഗംഭീരഃ – മനുഷ്യനും മൃഗവും ചേര്ന്ന രൂപത്തില്, മനുഷ്യരുടെ രൂപത്തില്, ശിഷ്യന്റെയും ഗുരുവിന്റെയും രൂപത്തില്, ബാലന്, യുവാവ്, സ്ത്രീ, പുരുഷന്…. എത്രയെത്ര രൂപങ്ങള്, എത്രയെത്ര ഭാവങ്ങള്. ഇവയില് ഏതാണ് ഭഗവാന്? ഏതാണ് ഭഗവാനല്ലാത്തത്? വായിച്ചറിയാനോ ചിന്തിച്ചറിയാനോ അറിഞ്ഞതിനെ ഭാഷയിലൊതുക്കാന് ഭട്ടതിരിപ്പാടു ശ്രമിച്ചു. നാമോരുത്തരും ശ്രമിച്ചു. എന്തൊക്കെയോ അറിഞ്ഞു. എന്തൊക്കെയോ പറഞ്ഞു. “അജ്ഞാത്വാ തേ മഹത്ത്വം യദിഹ നിഗദിതം വിശ്വനാഥ ക്ഷമേഥാഃ” എന്നുപറഞ്ഞു പിന്മാറുന്നതിനുമുമ്പ് ഭഗവാനെക്കുറിച്ചു നമുക്കുള്ള ധാരണകളെ ഒറ്റവാക്കില് ഒതുക്കാം”. ഗംഭീരഃ.
435. ഗര്വനാശകഃ – ഗര്വത്തെ നശിപ്പിക്കുന്നവന്. ഗര്വം അഹങ്കാരമാണ്. തന്റെ കഴിവുകളെയും മേന്മതെയയും സ്വയം പെരുപ്പിച്ചുകണ്ട് മറ്റുള്ളവരെക്കാള് മേലേയാണു താന് എന്നു കരുതുന്നത്. അത് അംഗീകരിക്കാത്ത എല്ലാവരേയും ശത്രുക്കളായി കരുതി എതിര്ക്കാന് പ്രേരിപ്പിക്കുന്ന ഔദ്ധത്വം. അത് ആര്ക്കുണ്ടായാലും ആ ഗര്വത്തെ ഭഗവാന് നശിപ്പിക്കും. ഗര്വിതന്നെയല്ല, ഗര്വിനെയാണ് നശിപ്പിക്കുന്നത്. നാരായണീയത്തില് അതിഗര്വിതരായ പലരുടെയും ഗര്വം ഭഗവാന് നശിപ്പിക്കുന്ന അനേകം സന്ദര്ഭങ്ങളുണ്ടെങ്കിലും ഏറ്റവും കൂടുതല് തവണ ഇന്ദ്രന്റെ ഗര്വമാണ് ഗുരുവായൂരപ്പന് നശിപ്പിക്കേണ്ടിവന്നത്. ലോകാധിപതിയാണ് ഇന്ദ്രന്. ഇന്ദ്രന് അക്കാര്യത്തില് അഭിമാനിക്കാം. ലോകാധിപതിയുടെ പദവിക്ക് ആവശ്യം വേണ്ട വിനയം ഇന്ദ്രനില്ലാത്തതുകൊണ്ട് ഭഗവാന് പലതവണ ഇന്ദ്രന്റെ ഗര്വം നശിപ്പിക്കേണ്ടിവന്നു. തപശക്തികൊണ്ട് അഹങ്കരിച്ച ദുര്വാസാവിന് ഭഗവാന് ഒരു ഉപദേശം കൊടുക്കുന്നുണ്ട്.”ജ്ഞാനവും തപസ്സും വിനയത്തോടുകൂടിച്ചേര്ന്നാലേ ബഹുമാനം അര്ഹിക്കുന്നുള്ളൂ എന്നര്ത്ഥം. അധികാരവും പദവിയും ശക്തിയും വീര്യവുമെല്ലാം ആവശ്യം തന്നെ. വിനയമില്ലെങ്കില് ഇതെല്ലാം തനിക്കും ലോകത്തിനും ഭാരം മാത്രം. ഇത് ഉപദേശത്തിലൊതുക്കാതെ നടപ്പിലാക്കാന് വേണ്ടിയാണ് ഭഗവാന് തനിക്ക് താല്പ്പര്യമുള്ളവരുടെ ഗര്വം നശിപ്പിക്കുന്നത്
(തുടരും)
ഡോ. ബി.സി.ബാലകൃഷ്ണന്
