431. ഖാണ്ഡവദാഹകഃ – ഖാണ്ഡവം എന്ന വനത്തെ ദഹിപ്പിച്ചവന്. മഹാഭാരതത്തിലെ ഒരു സന്ദര്ഭവുമായി ബന്ധപ്പെട്ടാണ് ഗുരുവായൂരപ്പന്റെ ഈ പേര്.
പാണ്ഡവര് ഇന്ദ്രപ്രസ്ഥത്തില് വസിക്കുന്ന കാലത്ത് അതിനടുത്തായി ഖാണ്ഡവം എന്നൊരു വനം ഉണ്ടായിരുന്നു. തക്ഷകന് എന്ന നാഗരാജാവ് പത്നിമാരുമായി ആ വനത്തില് വസിച്ചിരുന്നു. തക്ഷകന് ഇന്ദ്രന്റെ സ്നേഹിതനായിരുന്നതുകൊണ്ട് അഗ്നിക്കു ഖാണ്ഡവവനം ദഹിപ്പിക്കാന് കഴിഞ്ഞിരുന്നില്ല. അഗ്നിഖാണ്ഡവം ദഹിപ്പിക്കാന് തുടങ്ങുമ്പോള് ഇന്ദ്രന് മഴ പെയ്യിച്ച് തീ കെടുത്തും. ഒരുദിവസം അഗ്നി ഒരു ബ്രാഹ്മണന്റെ വേഷത്തില് ശ്രീകൃഷ്ണനെയും അര്ജുനനെയും സമീപിച്ച് ഖാണ്ഡവം ദഹിപ്പിക്കാന് സഹായം അഭ്യര്ത്ഥിച്ചു. ഭഗവാനും അര്ജ്ജുനനും സഹായിക്കാമെന്നേറ്റു. അഗ്നി ഖാണ്ഡവം ദഹിപ്പിക്കാന് തുടങ്ങിയപ്പോള് ഇന്ദ്രന് മഴ പൊഴിച്ച് തീ കെടുത്താന് ശ്രമിച്ചു. അഗ്നിയുടെ അപേക്ഷയനുസരിച്ച് വരുണന് അര്ജ്ജുനന് ഗാണ്ഡീവം എന്ന ദിവ്യമായ വില്ലും അമ്പൊടുങ്ങാത്ത ആവനാഴിയും കപിദ്ധ്വജവും നാലുവെള്ളക്കുതിരകളുമുള്ള മനോവേഗമുള്ള തേരും കൊടുത്തു. ആ രഥത്തില് കൃഷ്ണാര്ജ്ജുനന്മാര് അഗ്നിയെ സഹായിക്കാനായി കയറി. അര്ജ്ജുനന് ഖാണ്ഡവ വനത്തിനു മുകളില് ശരങ്ങള്ക്കൊണ്ട് ഒരു കൂരയുണ്ടാക്കി മഴയില്നിന്ന് അഗ്നിയെ രക്ഷിച്ചു. ഇന്ദ്രന് ദേവ സൈന്യത്തോടുകൂടി കൃഷ്ണാര്ജ്ജുനന്മാരെ എതിര്ത്തു പരാജയപ്പെട്ടു. അസുര ശില്പിയായ മയന് തീയില്പ്പെട്ടുവെങ്കിലും കൃഷ്ണാര്ജ്ജുനന്മാര് മയന് അഭയം കൊടുത്തു.
ഖാണ്ഡവ ദാഹത്തിനു സഹായിച്ചതുകൊണ്ടു ഭഗവാന് ഇന്ദ്രന്റെ അഹങ്കാരം നശിപ്പിച്ചു. അര്ജ്ജുനന് ഗാണ്ഡീവധനുസ്സും അക്ഷയതുണീരവും കപിദ്ധ്യജമായ ദിവ്യരഥവും നേടിക്കൊടുത്തു. മയനെക്കൊണ്ട് ഇന്ദ്രപ്രസ്ഥം പുതുക്കിപ്പണി കഴിപ്പിച്ചു. അതിലെ സ്ഥലജലഭ്രമമുണ്ടാക്കുന്ന ശില്പ സംവിധാനമുപയോഗിച്ച് കുരുക്ഷേത്രയുദ്ധത്തിന്റെ പശ്ചാത്തലമൊരുക്കി. (നാരായണീയം 81-ാം ദശകത്തിലെ മൂന്നാം ശ്ലോകത്തില് ഖാണ്ഡവ ദാഹത്തെക്കുറിച്ചു പരാമര്ശിച്ചിട്ടുണ്ട്)
(തുടരും)
ഡോ. ബി.സി.ബാലകൃഷ്ണന്
