സാധകര് ബാഹ്യസൗന്ദര്യം നോക്കി ജീവിക്കുവാന് പാടില്ല. അതു നശ്വരമാണ്. അതവനെ നശിപ്പിക്കും. സാധകന് ആന്തരികസൗന്ദര്യമാണു കാണേണ്ടത്. അതാണു ശാശ്വതമായുള്ളത്. അതാണവനെ വളര്ത്തുന്നത്. തീര്ത്തും ബാഹ്യത്തെ തള്ളിയാല് മാത്രമേ മുന്നോട്ടു നീങ്ങുവാന് കഴിയൂ. നല്ലതും ചീത്തയും ഒരുപോലെ സ്വീകരിക്കുവാനുള്ള ഒരു സമര്പ്പണം നിന്നില്ക്കണ്ടതുകൊണ്ടാണ് അമ്മ നല്ല കുട തന്നുവിടുന്നത്. മോന് മറ്റുള്ളവരുടെ സര്ട്ടിഫിക്കറ്റിനുവേണ്ടിയല്ലേ നല്ലതു നോക്കിയെടുത്തത്. മറ്റുള്ളവരുടെ പുകഴ്ത്തലില് വീഴരുത്. ഇന്ന് പുകഴ്ത്തുന്നവര് നാളെ നമ്മളെ താഴെയിടാം. മനുഷ്യന്റെ സര്ട്ടിഫിക്കറ്റ് നോക്കിയിരുന്നാല് ഈശ്വരന്റെ സര്ട്ടിഫിക്കറ്റ് കിട്ടില്ല. നമുക്ക് ഈശ്വരന്റെ സര്ട്ടിഫിക്കറ്റാണ് ആവശ്യം. അതിനു ബഹിര്മുഖമായ മനസ്സിനെ ഉള്ളിലേക്കു വലിക്കണം. ആന്തരികമായതിനെ മാത്രം അന്വേഷിച്ചു കണ്ടെത്തണം.
ഞാന് എന്റെ മക്കളുടെ ഓരോ കാര്യവും ശ്രദ്ധിക്കും. നിസാരമായ കാര്യം കൂടി ശ്രദ്ധിക്കും. നിങ്ങളുടെ ഓരോ കുറവും കണ്ടു പരിഹരിക്കുവാന് അമ്മയല്ലാതെ വേറെ ആരാണുള്ളത്. പക്ഷേ നിങ്ങള് ബാഹ്യമോടിയില് ശ്രദ്ധ നല്കുവാന് പാടില്ല. നിങ്ങളുടെ മനസ്സെപ്പോഴും ഈശ്വരചിന്തയില് മാത്രമായിരിക്കണം.
– മാതാ അമൃതാനന്ദമയീദേവി
