പാലാ: റബ്ബര്വില 200 രൂപയിലെത്തുന്നതുവരെ മാര്ക്കറ്റ് വിലയില് നിന്നും 5രൂപ അധികം നല്കി റബ്ബര് സംഭരിക്കാന് സര്ക്കാര് തയ്യാറാകണമെന്ന് ഭാരതീയ ജനതാ കര്ഷകമോര്ച്ച ആവശ്യപ്പെട്ടു. റബ്ബര്വില കഴിഞ്ഞ അഞ്ചുവര്ഷത്തെ ഏറ്റവും താഴ്ന്ന നിലയിലെത്തിയിട്ടും ഒരു നടപടിയും സ്വീകരിക്കാത്ത സംസ്ഥാന സര്ക്കാര് കര്ഷകരോടുള്ള അവഗണന അവസാനിപ്പിക്കണമെന്നും യോഗം ആവശ്യപ്പെട്ടു. കര്ഷകമോര്ച്ച പാലാ നിയോജകമണ്ഡലം പ്രസിഡന്റ് മണിലാല് മാടപ്പളളി അദ്ധ്യക്ഷത വഹിച്ചു. ബിജെപി ജില്ലാ വൈസ് പ്രസിഡന്റ് ടി.ആര്. നരേന്ദ്രന് കര്ഷക സമ്മേളനം ഉദ്ഘാടനം ചെയ്തു. മോഹനന് പനയ്ക്കല്, ബാലകൃഷ്ണന് പരായാത്ത, ജി. രഞ്ജിത്ത്, വി.ജി. ദിവകാരന്, ആര്. വിനോദ്, രവീന്ദ്രന് നായര്, മധു പുളിക്കല് എന്നിവര് പ്രസംഗിച്ചു.
റബറിന് ന്യായവില
ഉറപ്പാക്കണം: വൈക്കം വിശ്വന്
കോട്ടയം: സര്ക്കാരിന്റെ റബര് സംഭരണ പ്രഖ്യാപനത്തിലെ പൊള്ളത്തരം ഇപ്പോഴത്തെ വിലയിടിവിലൂടെ വ്യക്തമായെന്നും റബറിന് ന്യായവില ഉറപ്പാക്കാന് അടിയന്തരനടപടി സ്വീകരിക്കണമെന്നും എല്ഡിഎഫ് കണ്വീനര് വൈക്കം വിശ്വന് ആവശ്യപ്പെട്ടു. സമീപ വര്ഷങ്ങളിലെ ഏറ്റവും കനത്ത വിലയിടിവാണ് ഇപ്പോള് ദൃശ്യമാകുന്നത്. എന്നിട്ടും കര്ഷകരുടെ രക്ഷക്ക് സര്ക്കാര് നടപടിയൊന്നും സ്വീകരിക്കുന്നില്ല. തെരഞ്ഞെടുപ്പിന് മുമ്പ് റബര് സംഭരിക്കുമെന്ന് പ്രഖ്യാപനം നടത്തിയും കര്ഷകരെ വഞ്ചിച്ചു. വിപണിവിലയെക്കാള് കിലോയ്ക്ക് രണ്ടു രൂപ കൂട്ടി സംഭരിക്കുമെന്നായിരുന്നു പ്രഖ്യാപനം. ഇത് നടന്നാല് തന്നെ ഗുണം ചെയ്യില്ലെന്ന് കര്ഷക സംഘടനകളും മറ്റും ചൂണ്ടിക്കാണിച്ചിരുന്നു. ഇപ്പോഴാകട്ടെ സംഭരണനടപടികളും നിര്ത്തിവെച്ചു. എല്ലാ ദിവസവും വില ഇടിഞ്ഞ് 130 രൂപയ്ക്ക് പോലും റബര് ആരും വാങ്ങാനില്ലാത്ത സ്ഥിതിയിലായി. റബര് തടിക്കും കനത്ത വിലയിടിവാണ്. അടിയന്തരമായി ഇടപെട്ട് റബര് വിലയിടിവിന് പരിഹാരമുണ്ടാക്കാന് സംസ്ഥാന സര്ക്കാരിന് കഴിയണമെന്നും വൈക്കം വിശ്വന് പ്രസ്താവനയില് പറഞ്ഞു.
