കോട്ടയം: കോട്ടയം ലോക്സഭാ മണ്ഡലത്തിലെ ഏഴു നിയമസഭാ മണ്ഡലങ്ങളില് വോട്ടു രേഖപ്പെടുത്തിയ വോട്ടിംഗ് യന്ത്രങ്ങള് വോട്ടെണ്ണല് കേന്ദ്രങ്ങളിലെ സ്ട്രോംഗ് റൂമുകളിലേക്ക് മാറ്റി. വോട്ടെണ്ണല്ദിവസം വരെ വോട്ടിംഗ് യന്ത്രങ്ങള് കോട്ടയം നഗരത്തിലെ ഈ കേന്ദ്രങ്ങളില് കനത്ത സുരക്ഷയില് സൂക്ഷിക്കും. പൂട്ടി മുദ്രവച്ച സ്ട്രോംഗ് റൂമുകള് കേന്ദ്രസേനയുടെയും പോലിസിന്റെയും കാവലിലാണ്.
പാലാ, കടുത്തുരുത്തി, വൈക്കം നിയമസഭാ നിയോജക മണ്ഡലങ്ങളിലെ വോട്ടിംഗ് യന്ത്രങ്ങള് കോട്ടയം മൗണ്ട് കാര്മല് ഹയര് സെക്കന്ഡറി സ്കൂളിലും കോട്ടയം, പുതുപ്പള്ളി മണ്ഡലങ്ങളിലേത് കോട്ടയം എം.ഡി. സെമിനാരി ഹയര് സെക്കന്ഡറി സ്കൂളിലും പിറവം, ഏറ്റുമാനൂര് എന്നീ മണ്ഡലങ്ങളിലെ യന്ത്രങ്ങള് യഥാക്രമം കോട്ടയം ബി.സി.എം കോളേജ്, ബസേലിയോസ് കോളേജ് എന്നിവിടങ്ങളിലുമാണ് സൂക്ഷിച്ചിരിക്കുന്നത്.
