ധാക്ക: ട്വന്റി 20 ലോകകപ്പില് സെമിഫൈനല് ലക്ഷ്യമിട്ട് ടീം ഇന്ത്യ ഇന്ന് മൂന്നാം പോരിനിറങ്ങുന്നു. ആതിഥേയരായ ബംഗ്ലാദേശാണ് ഇന്ന് ഇന്ത്യയുടെ എതിരാളികള്. ആദ്യ രണ്ട് മത്സരങ്ങളില് പാക്കിസ്ഥാനെയും വെസ്റ്റിന്ഡീസിനെയും തകര്ത്തെറിഞ്ഞതിന്റെ ആത്മവിശ്വാസത്തിലാണ് ധോണിപ്പട ഇന്ന് ആതിഥേയര്ക്കെതിരെ മൂന്നാം പോരാട്ടത്തിനിറങ്ങുന്നത്. ബംഗ്ലാദേശിന്റെ രണ്ടാം മത്സരമാണ് ഇന്നത്തേത്. ആദ്യ മത്സരത്തില് അവര് വെസ്റ്റിന്ഡീസിനോട് പരാജയപ്പെട്ടിരുന്നു.
ആറ് ദിവസത്തിനിടെ രണ്ട് പരിശീലന മത്സരം ഉള്പ്പെടെ നാല് മത്സരങ്ങളില് പങ്കെടുത്ത ടീമിന് മാനേജ്മെന്റ് രണ്ടുദിവസത്തെ വിശ്രമം അനുവദിച്ചിരുന്നു. വിശ്രമത്തിനുശേഷം കഴിഞ്ഞ ദിവസം ടീം ഇന്ത്യ കഠിന പരിശീലനത്തിലേര്പ്പെട്ടു. പാക്കിസ്ഥാന്, വെസ്റ്റിന്ഡീസ് തുടങ്ങിയ കരുത്തര്ക്കെതിരെയുള്ള വിജയം സമ്മാനിച്ച ആത്മവിശ്വാസം ഓരോരുത്തരിലും പ്രകടമായിരുന്നു.
അതേസമയം ഓപ്പണര് ശിഖര് ധവാന്റെയും മധ്യനിര താരം യുവരാജ് സിംഗിന്റെയും ഫോമില്ലായ്മയാണ് ടീം ഇന്ത്യയെ അലട്ടുന്നത്. പാക്കിസ്ഥാനെതിരെ യുവി ഒരു റണ്സും വിന്ഡീസിനെതിരെ 10 റണ്സുമെടുത്ത് യുവി പുറത്തായിരുന്നു. പാക്കിസ്ഥാനെതിരെ ശിഖര് ധവാന് 30 റണ്സെടുത്തെങ്കിലും വിന്ഡീസിനെതിരെ പൂജ്യത്തിനാണ് പുറത്തായത്. എന്നാല് രോഹിത് ശര്മ്മ, വിരാട് കോഹ്ലി, സുരേഷ് റെയ്ന എന്നിവര് മികച്ച ഫോമിലാണെന്നതാണ് ഇന്ത്യക്ക് മത്സരത്തില് മുന്തൂക്കം നല്കുന്നത്. ബൗളര്മാരും മികച്ച ഫോമിലാണ്. മൂന്ന് അന്താരാഷ്ട്ര ട്വന്റി 20 മാത്രം കളിച്ച അമിത് മിശ്ര തകര്പ്പന് ഫോമിലാണ്. കഴിഞ്ഞ രണ്ട് മത്സരങ്ങളിലും അമിത് മിശ്രയയായിരുന്നു മാന് ഓഫ് ദി മാച്ച്. അതേപോലെ മുഹമ്മദ് ഷാമിയും രവീന്ദ്ര ജഡേജയും ഭുവനേശ്വര്കുമാറും അശ്വിനും മികച്ച രീതിയിലാണ് കഴിഞ്ഞ മത്സരങ്ങളില് പന്തെറിഞ്ഞത്.
ഇതിനിടെ ഐപിഎല്ലിലെ ഒത്തുകളി വിവാദത്തെ തുടര്ന്ന് ഇന്ത്യന് നായകന് ധോനി മത്സരങ്ങളില് നിന്ന് വിട്ടുനിന്നേക്കുമെന്ന് സൂചനയുണ്ട്. അതേസമയം മത്സരത്തിന് മുന്പുള്ള വാര്ത്താ സമ്മേളനം ധോണി ഉപേക്ഷിക്കുകയും ചെയ്തിരുന്നു. വാര്ത്താസമ്മേളനം ഉപേക്ഷിച്ചതായി ടീം ഇന്ത്യ അധികൃതര് അറിയിക്കുകയായിരുന്നു. ഐപിഎല് ഒത്തുകളിയില് ധോണിക്ക് പങ്കുണ്ടെന്ന് അഭിഭാഷകനായ ഹരീഷ് സാല്വെ സുപ്രീംകോടതിയില് പറഞ്ഞിരുന്നു. ഈ പശ്ചാത്തലത്തില് മാധ്യമപ്രവര്ത്തകരുടെ ചോദ്യങ്ങള് ഭയന്നിട്ടാവാം ധോനി വാര്ത്താ സമ്മേളനം ഉപേക്ഷിച്ചതെന്നും സൂചനയുണ്ട്.
അതേസമയം വിന്ഡീസിനെതിരെ ബാറ്റിംഗിലുംബൗളിംഗിലും ഒരേപോലെ പരാജയപ്പെട്ടതിന്റെ നിരാശയിലാണ് ബംഗ്ലാദേശ് ഇന്ത്യക്കെതിരെ ഇറങ്ങുന്നത്. തമിം ഇഖ്ബാലും അനമുള് ഹഖും ഷക്കിബ് അല് ഹസ്സനും ഉള്പ്പെട്ട ബാറ്റിംഗ്നിര ദയനീയ പ്രകടനമാണ് വിന്ഡീസിനെതിരെ നടത്തിയത്. ബൗളിംഗില് മൊര്ത്താസ ഉള്പ്പെടെയുള്ളവര് പരാജയമായപ്പോള് അല് അമിന് ഹൊസൈന് മാത്രമാണ് മികച്ചുനിന്നത്. എന്തായാലും സെമി ലക്ഷ്യമിട്ട് ഇന്ത്യയും ആദ്യ ജയം ലക്ഷ്യമാക്കി ബംഗ്ലാദേശും ഇറങ്ങുമ്പോള് മികച്ച പോരാട്ടമാണ് പ്രതീക്ഷിക്കുന്നത്.
