നവനീതപ്രിയഃ സര്പ്യശി ദുഗ്ധഭക്ഷണതത്പരഃ
വൃന്ദാവനവിഹാരീ ച കാളിന്ദീക്രീഡനോത്സുകഃ
276. നവനീതപ്രിയഃ – നവനീതം ഇഷ്ടപ്പെടുന്നവന്. പുതിയ വെണ്ണയാണ് നവനീതം. അമ്മ തൈരുകടയുമ്പോള് ഉണ്ണികൃഷ്ണന് അടുത്തുചെന്നിരിക്കും. അമ്മ പുതുവെണ്ണ ഉണ്ണിക്ക് കൊടുക്കും. ഇതു ശീലമായപ്പോള് മറ്റു ഗോപസ്ത്രീകളുടെ അടുത്തും കൊതിയോടെ ചെന്നിരിക്കാനും വെണ്ണ കൊടുത്തില്ലെങ്കില് ചോദിക്കാനും തുടങ്ങി. കൊതി കൂടിയപ്പോള് വെണ്ണ മോഷ്ടിച്ചു തിന്നാനും മടിക്കാതെയായി. 258-ാം നാമത്തിന്റെ വ്യഖ്യാനം കൂടി നോക്കുക.
277. സര്പ്യശ്നീ – നെയ് ഭക്ഷിക്കുന്നവന്. (സര്പ്പി – നെയ്യ്, അശ്നീ – ആശിക്കുന്നവന്) വെണ്ണ മാത്രമല്ല, നെയ്യും തൈരുമൊക്കെ കൃഷ്ണന് ഇഷ്ടമായിരുന്നു. ഇവയില് ഏതിനുവേണ്ടിയും യാചനയും മോഷണവും നടത്താന് ഉണ്ണികൃഷ്ണന് മടിച്ചിരുന്നില്ല.
278. ദുഗ്ധഭക്ഷണതത്പരഃ – പാലുകുടിക്കുന്നതില് താത്പര്യമുള്ളവന്. തൈരും പുതുവെണ്ണയും നെയ്യും ഭക്ഷിക്കാന് ബാലകൃഷ്ണനുള്ള താത്പര്യം മുന് നാമങ്ങളില് നാം കണ്ടു. പാലും കണ്ണന് പ്രിയപ്പെട്ടതായിരുന്നു.
279. വൃന്ദാവനവിഹാരീ – വൃന്ദാവനത്തില് വിഹരിച്ചവന്. ആമ്പാടിയില് പൂതനതൊട്ട് പല രാക്ഷസരുടെയും ഉപദ്രം തുടര്ച്ചയായി ഉണ്ടായതുകൊണ്ട് നന്ദഗോപര് അവിടെ നിന്ന് താമസം മാറ്റാന് തീരുമാനിച്ചു. ഉപന്ദന് എന്ന ഗോപശ്രേഷ്ഠന് വൃന്ദാവനം എന്ന സസ്യഭൂയിഷ്ഠമായ പ്രദേശം നല്ല വാസസ്ഥാനമാണെന്ന് നിര്ദ്ദേശിച്ചു. നന്ദഗോപരും ഗോപന്മാരും ഗോക്കളുമെല്ലാം വൃന്ദാവനത്തില് പാര്പ്പുറപ്പിച്ചു. തുടര്ന്നുള്ള ഭഗവാന്റെ ലീലകള് വൃന്ദാവനത്തിലായിരുന്നു. നാരായണീയം 49-ാം ദശകം നോക്കുക.
(തുടരും)
ഡോ. ബി.സി.ബാലകൃഷ്ണന്
