മീനച്ചിലിന്റെ ഭക്ഷ്യസംസ്‌കാരവുമായി ‘പാലാ ഫുഡ് ഫെസ്റ്റ് ‘

പാലാ: മീനച്ചിലിന്റെ തനതായ ഭക്ഷ്യസംസ്‌കാരവും തദ്ദേശീയവും വിദേശീയവുമായ രുചിക്കൂട്ടുകളുമായി മീനച്ചില്‍ ഹെറിറ്റേജ് കള്‍ച്ചറല്‍ സൊസൈറ്റി സംഘടിപ്പിക്കുന്ന മൂന്നാമത് ഭക്ഷ്യമേള ‘പാലാ ഫുഡ് ഫെസ്റ്റ് 2014’ 5 ന് വൈകിട്ട് 3 ന് പാര്‍വ്വതി ഷോണ്‍ ഭദ്രദീപം തെളിയിക്കും. വൈകിട്ട് 6 മണിക്ക് ജോയി എബ്രാഹം എം.പി. ഫെസ്റ്റ് ഔപചാരികമായി ഉദ്ഘാടനം ചെയ്യും. മുനിസിപ്പല്‍ ചെയര്‍മാന്‍ കുര്യാക്കോസ് പടവന്‍ അദ്ധ്യക്ഷത വഹിക്കും. മാണി സി. കാപ്പന്‍ മുഖ്യാതിഥിയായിരിക്കും. ടാലന്റ് ചില്‍ഡ്രന്‍സ് ഫെസ്റ്റ് സജി മഞ്ഞക്കടമ്പില്‍ ഉദ്ഘാടനം ചെയ്യും. ലിറ്റില്‍ പ്രിന്‍സ്, പ്രിന്‍സസ്, സിനിമാറ്റിക് ഡാന്‍സ് എന്നീ മത്സരങ്ങള്‍ നടക്കും. ഫെസ്റ്റ് ഇന്‍ഡ്യന്‍, തായ്, മലയാ, യൂറോപ്യന്‍, ചൈനീസ് തന്തൂരി ഭക്ഷ്യവിഭവങ്ങള്‍ക്കൊപ്പം നാടന്‍ ഭക്ഷ്യവിഭവങ്ങളും മേളയില്‍ ഒരുക്കിയിട്ടുണ്ട്. രുചിയേറിയ ബിരിയാണികള്‍, പഴയിടം മോഹനന്‍ നമ്പൂതിരി ഒരുക്കുന്ന 15-ല്‍പരം പായസങ്ങള്‍, സല്‍ക്കാര്‍ ബാബു ഒരുക്കുന്ന സ്‌പെഷ്യല്‍ സ്റ്റാള്‍, ഷാപ്പുകറികള്‍ തുടങ്ങിയവ മേളയ്‌ക്ക് കൊഴുപ്പേകും. 5-ന് 5 മണിക്ക് തേങ്ങാ ചുരണ്ടല്‍, കപ്പപൊളിക്കല്‍ മത്സരം എന്നിവ നടക്കും. വൈകിട്ട് 6 മണിക്ക് ഉദ്ഘാടന ചടങ്ങ് നടക്കും.6ന് വൈകിട്ട് 5ന് മീന്‍വെട്ട് മത്സരം, തേങ്ങാപൊതിക്കല്‍, തിരുവാതിര കളി മത്സരം ഫാഷന്‍ ഷോ മത്സരം.സായാഹ്ന സമ്മേളനം ജില്ലാ പോലീസ് മേധാവി കെ.പി.ദിനേശ് ഐ.പി.എസ് ഉദ്ഘാടനം ചെയ്യും. സമാപന ദിവസമായ 9ന് വൈകിട്ട് 7.30ന് നടക്കുന്ന സമാപന സമ്മേളനം മന്ത്രി കെ.എം മാണി ഉദ്ഘാടനം ചെയ്യും. റോഷി അഗസ്റ്റ്യന്‍ എം.എല്‍.എ മുഖ്യ പ്രഭാഷണം നടത്തും.ഫെബ്രുവരി 5 മുതല്‍ 9 വരെ പാലാ മുനിസിപ്പല്‍ സ്റ്റേഡിയത്തിനു സമീപമുള്ള കിഴക്കേക്കര-പുഴക്കര സ്റ്റേഡിയത്തിലാണ് ഫുഡ്‌ഫെസ്റ്റ് നടക്കുക. വൈകിട്ട് 3 മുതല്‍ രാത്രി 10 വരെയാണ് സമയം.

ഫെസ്റ്റിന്റെ പ്രചരണാര്‍ത്ഥം വിളംബര മത്സരമായി 4-ന് വൈകിട്ട് 5 മണിക്ക് പാലാ കുരിശുപള്ളി ജംഗ്ഷനില്‍ ദോശചുടീല്‍ മത്സരം ഉണ്ടായിരിക്കും. ഫെസ്റ്റിനോട നുബന്ധിച്ച് ‘പാലാ ഓട്ടോ എക്‌സ്‌പോ 2014’ പി.സി. ജോര്‍ജ്ജ് എം.എല്‍.എ. ഉദ്ഘാടനം ചെയ്യും. 10, 11 തീയതികളില്‍ നടക്കുന്ന സമ്പൂര്‍ണ്ണ വാഹനമേളയില്‍ കാളവണ്ടി മുതല്‍ ആധുനിക വാഹനങ്ങളുടെ പ്രദര്‍ശനവും വില്പനയും നടക്കും.

പത്രസമ്മേളനത്തില്‍ പ്രസിഡന്റ് അഡ്വ. സന്തോഷ് കെ. മണര്‍കാട്, ജോയി വട്ടക്കുന്നേല്‍, ഷാജി പന്തപ്ലാക്കല്‍, ജിജി പറമുണ്ടയില്‍, മാത്തുക്കുട്ടി ചെമ്പകശ്ശേരി, ജോമോന്‍ കുറ്റിയാങ്കല്‍, അഡ്വ. റോയി വല്ലയില്‍, സജി പുളിക്കല്‍, കെ.പി. രാജന്‍, സതീഷ് കെ. മണര്‍കാട് തുടങ്ങിയവര്‍ പങ്കെടുത്തു.