കോട്ടയം: ജൂനിയര്‍ പബ്ലിക് ഹെല്‍ത്ത് നേഴ്‌സുമാരുടെ നിയമനം വൈകിക്കുന്നതായി ആരോപിച്ച് ഉദ്യോഗാര്‍ത്ഥികള്‍ സമരത്തിലേയ്‌ക്ക്. 2009ല്‍ നിലവില്‍വന്ന റാങ്ക്പട്ടിക അട്ടിമറിച്ച് താല്‍ക്കാലികമായി ജോലിക്കാരെ നിയമിക്കുന്നതിനെതിരെ സമരം ശക്തമാക്കാനാണ് റാങ്ക് ജേതാക്കളുടെ തീരുമാനം. രണ്ടരമാസക്കാലമുള്ള നിയമന കാലാവധിക്കു മുന്‍പ് നിയമനങ്ങള്‍ പൂര്‍ത്തികരിക്കണമെന്നാവശ്യപ്പെട്ട് രക്ഷിതാക്കളും ഉദ്യോഗാര്‍ത്ഥികളും മാര്‍ച്ച് 31ന് സെക്രട്ടറിയേറ്റ് പടിക്കല്‍ നിരാഹരമിരിക്കുമെന്ന് പത്രസമ്മേളനത്തില്‍ അറിയിച്ചു.
ആറു വര്‍ഷക്കാലമായി പ്രസിദ്ധീകരിച്ച് റാങ്ക് പട്ടിക സര്‍ക്കാരിന്‍െ്‌റ പലവിധത്തിലുള്ള നടപടികള്‍ മൂലം വൈകിപ്പിക്കുകയാണെന്ന് പത്രസമ്മേളനത്തില്‍ ആരോപിച്ചു. 2012 സെപ്തംബറില്‍ നിലവില്‍ വന്ന ഒരു സര്‍ക്കുലറില്‍ നിയമനം പിഎസ്‌സിയ്‌ക്ക് നല്‍കരുതെന്ന് നിര്‍ദ്ദേശം നല്‍കിയതായി കണ്ടെത്തിയതായും ഉദ്യോഗാര്‍ത്ഥികള്‍ പറഞ്ഞു. ലിസ്റ്റ് പ്രസിദ്ധപ്പെടുത്തിയതിനു ശേഷം പെന്‍ഷന്‍ ഏകീകരണവും ഇത് പിന്‍വലിക്കല്‍ നടപടിയും വന്നതോടെ രണ്ട് വര്‍ഷക്കാലം നിയമനം വളരെ കുറച്ചുമാത്രമെ നടന്നിരുന്നുള്ളു. അതിനുശേഷം ജെപിഎച്ച്എന്‍ ഗ്രേഡ് 2, ഗ്രേഡ് 1 തസ്തികകളുടെ അനുപാതം 2:1 ല്‍ നിന്ന് 1 : 1 ആയി മാറ്റിയതോടെ കോട്ടയം ജില്ലയില്‍ 57 പേരുടെ നിയമനം റദ്ദാക്കപ്പെട്ടതായും ആരോപണമുണ്ട്.
ആരോഗ്യവകുപ്പില്‍ ധാരാളം ഒഴിവ് ഉള്ളപ്പോള്‍ വൈകിപ്പിച്ച് നിയമനം നടത്താതിരിക്കുന്നതിനുള്ള ശ്രമമാണ് സര്‍ക്കാരിന്റെ ഭാഗത്തു നിന്നുമെന്നാണ് ആരോപണം. 174 പേര്‍ ഉള്‍പ്പെട്ട പട്ടികയില്‍ ചിലര്‍ക്ക് മാത്രമാണ് നിയമനം ലഭിച്ചത്. കേന്ദ്ര സര്‍ക്കാരിന്റെ എന്‍ആര്‍എച്ച്എം വഴി ജോലിക്കാരെ നിയമിക്കുന്നതും വകുപ്പില്‍ വന്‍ സാമ്പത്തിക അഴിമതി നടക്കുന്നതിനുള്ള നീക്കമെന്നും ആരോപണമുണ്ട്. 5,000 പേര്‍ക്ക് ഒരു നേഴ്‌സ് എന്ന അനുപാത പ്രകാരം ജില്ലയില്‍ 90 ഒഴിവുകള്‍ ഉണ്ടാകേണ്ടതാണ്. ഈ അനുപാതത്തില്‍ മറ്റ് ജില്ലകളിലായി 1094 ഓളം തസ്തികകള്‍ സൃഷ്ടിക്കപ്പെടും. ജെ. പി. എച്ച്. എന്‍. നേഴ്‌സുമാര്‍ക്ക് ഒരു വര്‍ഷത്തെ മിഡ്‌വൈഫറി ആന്‍്‌റ് ഓക്‌സിലറി കോഴ്‌സാണ് മുന്‍ഗണനയെങ്കിലും ബിഎസ് സിക്കാരും എംഎസ്‌സിക്കാരും ഹെല്‍ത്ത് നേഴ്‌സ് തസ്തികയില്‍ കയറിപ്പറ്റിയതായും ഉദ്യോഗാര്‍ത്ഥികള്‍ ആരോപിച്ചു. നിമനം സംബന്ധിച്ച് നിരവധി തവണ മുഖ്യമന്ത്രിക്കും വകുപ്പ് മന്ത്രിക്കും നിവേദനം നല്‍കിയിട്ടും ഫലമുണ്ടായില്ലെന്നും ഉദ്യോഗാര്‍ത്ഥികള്‍ ആരോപിച്ചു. പത്രസമ്മേളനത്തില്‍ ജില്ലാ റാങ്ക് ഹോള്‍ഡേഴ്‌സ് അസോസിയേഷന്‍ പ്രസിഡന്റ് സീമാദേവി, സെക്രട്ടറി പ്രിയാ എസ.് എന്നിവര്‍ പങ്കെടുത്തു.
