കോട്ടയം: കേരള സയന്സ് സിറ്റിയുടെ ഉദ്ഘാടനം ഫെബ്രുവരി ഒന്നിന് രാവിലെ ഒന്പതിന് കുറവിലങ്ങാട് സെന്റ് മേരീസ് ബോയ്സ് സ്കൂള് ഗ്രൗണ്ടില് നടക്കുമെന്ന് ജോസ് കെ. മാണി എംപി അറിയിച്ചു. ഉദ്ഘാടനത്തോടനുബന്ധിച്ച് സംഘടിപ്പിക്കേണ്ട വിവിധ പരിപാടികള് അവലോകനം ചെയ്യുന്നതിനായി എഡിഎം ടി.വി.സുഭാഷിന്റെ അധ്യക്ഷതയില് കളക്ട്രേറ്റില് നടന്ന സംഘാടക സമിതിയോഗത്തിലാണ് അദ്ദേഹം ഇക്കാര്യം അറിയിച്ചത്.
പ്രതിരോധ മന്ത്രി എ.കെ. ആന്റണി സയന്സ് സിറ്റിയുടെ ഉദ്ഘാടനം നിര്വ്വഹിക്കും. മുഖ്യമന്ത്രി ഉമ്മന് ചാണ്ടി, ധനകാര്യമന്ത്രി കെ.എം. മാണി, വിദ്യാഭ്യാസ മന്ത്രി പി.കെ. അബ്ദുറബ്ബ്, ഗതാഗത മന്ത്രി തിരുവഞ്ചൂര് രാധാകൃഷ്ണന്, കൃഷിമന്ത്രി കെ.പി. മോഹനന്, സിവില് സപ്ലൈസ് മന്ത്രി അനൂപ് ജേക്കബ്, ഐ.എസ്.ആര്.ഒ ചെയര്മാന് ഡോ.കെ.രാധാകൃഷ്ണന്, എംപിമാര്, എംഎല്എമാര്, ജനപ്രതിനിധികള്, ഉദേ്യാഗസ്ഥര് തുടങ്ങിയവര് പങ്കെടുക്കും.
സയന്സ് സിറ്റിയുടെ ഒന്നാംഘട്ടത്തില് വാനനിരീക്ഷണകേന്ദ്രം, സ്പേസ് തീയറ്റര്, ആധുനിക ശാസ്ത്രത്തിന്റെ ചരിത്രവും വളര്ച്ചയും വികാസവും വിശദമാക്കുന്ന പോപ്പുലര് സയന്സ് ഗാലറി, ആനിമേഷന്, ഗ്രാഫിക്സ്, ലേസര് മള്ട്ടിമീഡിയ എന്നിവയിലൂടെ ഇന്ററാക്ടീവ് രീതിയില് അവതരിപ്പിക്കുന്ന നൂറിലധികം ശാസ്ത്രതത്വങ്ങളുടെ പ്രദര്ശന ഗാലറികള്, വാട്ടര് ഫൗണ്ടേന് വിത്ത് ലേസര് മള്ട്ടിമീഡിയ (വാട്ടര് തീം സയന്സ് പാര്ക്ക്), മോഷന് സിമുലേറ്റര് സംവിധാനമുള്ള മള്ട്ടി ഡയമണ്ഷണല് ത്രില് ഏരിയം, സയന്സ് പാര്ക്ക്, ത്രീഡി തിയേറ്റര്, ഹൈടെക് ക്ലാസുകള്, ഫുഡ്കോര്ട്ട്, സ്റ്റുഡന്റ് റിക്രിയേഷന് സെന്റര്, ഓഡിറ്റോറിയങ്ങള്, സെമിനാര് ഹാളുകള്, ആധുനിക ലൈബ്രറി എന്നിവ സജ്ജീകരിക്കും.
രണ്ടാം ഘട്ടത്തില് റോബോട്ടിക്സ്, അസ്ട്രോണമി ആന്റ് എയ്റോ സ്പേസ് ഓഷ്യാനോഗ്രഫി, ദിനോസോര് മുതലുള്ള ജീവികളുടെ പരിണാമം വിശദമാക്കുന്ന ഇവലൂഷന് പാര്ക്ക്, ബയോ പ്രൊഡക്ട്സ് ആന്റ് റബര് എന്വയോണ്മെന്റ് ബയോടെക്നോളജി, നാനോ ടെക്നോളജി തുടങ്ങി വൈവിധ്യമാര്ന്ന തീമാറ്റിക് ഗാലറികള്, ആകാശ ഗതാഗതം സാധ്യമാക്കുന്ന റോപ് കാര്, വൈ-ഫൈ, വൈ മാക്സ് സൗകര്യങ്ങളോടുകൂടിയ കാമ്പസ്, അടിസ്ഥാന ശാസ്ത്രപരീക്ഷണശാലകള്, ഹാം റേഡിയോ/അമച്വര് റേഡിയോ സ്റ്റേഷന്, സഞ്ചരിക്കുന്ന ശാസ്ത്രപ്രദര്ശന യൂണിറ്റുകള്, ലേസര് പ്രദര്ശനങ്ങള്, ശാസ്ത്ര ഉദ്യാനങ്ങള്, വാക് വേ മ്യൂസിയം, അകേ്വറിയം, ബൊട്ടാണിക്കല് ഗാര്ഡന്, ബട്ടര്ഫ്ളൈ ഗാര്ഡന് എന്നിവയുണ്ടാകും.
മുപ്പത് ഏക്കര് സ്ഥലത്ത് 100 കോടി രൂപയിലധികം മുതല്മുടക്കുള്ള കേന്ദ്ര-സംസ്ഥാന സര്ക്കാരുകളുടെ സംയുക്തസംരംഭമാണ് ദക്ഷിണേന്ത്യയിലെ ആദ്യത്തേതും ഇന്ത്യയിലെ നാലാമത്തേതുമായ കുറവിലങ്ങാട് യാഥാര്ഥ്യമാകുന്ന സയന്സ് സിറ്റി.
