കൊച്ചി: കഴിഞ്ഞ രണ്ട് രാത്രികളിലായി പെയ്ത കനത്ത മഴയെതുടര്ന്ന് കിഴക്കന് മേഖലയും വടക്കന് മേഖലയും തമ്മിലുള്ള ദുലീപ് ട്രോഫി സെമിഫൈനല് മത്സരത്തിന്റെ ആദ്യ ദിനം കളി നടന്നത് 17 ഓവര് മാത്രം. വൈകിട്ട് 4.15ന് തുടങ്ങിയ ടോസ് നേടി ബാറ്റിംഗ് തെരഞ്ഞെടുത്ത ഉത്തരമേഖലാ ടീം ആദ്യദിനം കളിനിര്ത്തുമ്പോള് വിക്കറ്റ് നഷ്ടപ്പെടാതെ 33 റണ്സെടുത്തിട്ടുണ്ട്. വൈസ് ക്യാപ്റ്റന് ഉന്മുക്ത് ചന്ദും (12), ജീവന്ജോത് സിംഗുമാണ് (18) ക്രീസിലുള്ളത്.
രാവിലെ 9.30ന് മത്സരം തുടങ്ങാനാണ് നേരത്തേ നിശ്ചയിച്ചിരുന്നത്. ബുധനാഴ്ച പുലര്ച്ചെ പെയ്ത മഴയെ തുടര്ന്ന് ഗ്രൗണ്ട് നനഞ്ഞതിനാലാണ് നിശ്ചിത സമയത്ത് മത്സരം തുടങ്ങാന് പറ്റാത്തത്. ആദ്യ ദിനം 18 ഓവര് കളിക്കാനാണ് നിശ്ചയിച്ചിരുന്നതെങ്കിലും വെളിച്ചക്കുറവ് മൂലം ഇത് 17 ഓവറാക്കി കുറയ്ക്കുകയായിരുന്നു. പരിശീലനത്തിനിടെ ഇടതുകൈക്ക് പരുക്കേറ്റ കിഴക്കന് മേഖലാ നായകന് വൃദ്ധിമാന് സാഹ ഇന്നലെ കളിക്കാനിറങ്ങിയില്ല. പകരം അനുസ്തപ് മജൂംദാറാണ് വിക്കറ്റ് കാവല്ക്കാരനായത്.
ചെന്നൈയില് നടക്കുന്ന മറ്റൊരു സെമിഫൈനലില് മധ്യമേഖലയ്ക്ക് ബാറ്റിംഗ് തകര്ച്ച. മഴകാരണം 50.2 ഓവര് മാത്രമാണ് കളി നടന്നത്. ആദ്യ ദിവസത്തെ കളി നിര്ത്തുമ്പോള് ദക്ഷിണ മേഖലക്കെതിരെ മധ്യമേഖല അഞ്ച് വിക്കറ്റ് നഷ്ടത്തില് 123 റണ്സെടുത്തു. 18 റണ്സോടെ ശലഭ് ശ്രീവാസ്തവയും 4 റണ്സുമായി പിയൂഷ് ചൗളയുമാണ് ക്രീസില്. മുഗുള് ദഗാര് 45 റണ്സും നമന് ഓജ 23 റണ്സുമെടുത്തു. മൂന്ന് വിക്കറ്റ് വീഴ്ത്തിയ അഭിമന്യു മിഥുന് ബൗളിംഗില് മികച്ച പ്രകടനം നടത്തി.
